[لالا-فلسطين 48]

صباح/ مسا الخير :)

كيفكو..؟!



بعد الاحداث المتتالية والمتراصة زمنيا والمتراكمة كما.. لا بدلنا ان نلقي نظرة بل ونتأمل فيما وراء الاشياء.. ومن عدة زوايا.. ومن مختلف المواقف...



بالنسبة للاحداث في تونس والاحداث التي تلتها في مصر...

رغم عدم وجود فاصل زمني بين الاحداث للطرفين وتشابه طبيعة المطالب للطرفين.. بل ووجود علاقة تناظر بينهما..

نجد ان مجرى الاحداث في تونس اختلف عما هو في مصر.. اذ ظهرت تونس موحدة الكلمة.. ولم نشهد انقسام في اطرافها كالحاصل في مصر... حاليا هذا اهم الفروقات...!!!


ولكن، هنالك عدة تساؤلات يجب ان نأخذها بعين الاعتبار قبل ان نتخذ موقفا ازاء ما يحصل..

ارجو منكم ان تتطرقوا لها في نقاشم للموضع... فلنبدأ:



1. برأيكم، شو سبب هالثورات المتتالية اللي عم نشهدها في العالم العربي، بدءا من تونس وصولا بمصر والله اعلم من المنتظر... اليس مفاجئ بنظركم ان يتحرك الشعب دفعة واحد..؟!

رح تحكولي انو الشعب ما عاد يحتمل تراك ظلم وتجويع ووعودات باطلة... رح اقولكم: "يم سبحان الله.. بهالفترة بالزات طفح الكيل وما عاد الوضع يُحتمل.. أي مالهم سنين بل دهور على هالحال وراضخين لاللي همي فيو.. كل همهم انهم يركضوا ورا لقمة العيش ويأمنوها ليومهم الحالي على الاقل... كل هالسنين من الشقى مش كفيلة انها تخليهم زمااااان هبوا وانتفضوا"

** تعالوا نطلع عالموضوع من زاوية تانية... مش يمكن تكون امريكا حبت تغير وجوه وتجدد النظام فجابتها بلفة وبطريق ملتوية عن وكأنه عن طريق الشعب... مع العلم انو الست امريكا ما بصير الا تكون راضية عن كل الحكام الحاليين والقادين...؟؟؟!!!

* * *

2. خلينا نفترض انو هالانقلابات وهالثورات ذات مصداقية وصادرة عن الشعب نفسو وبقرار الشعب... وبالزات ثورة مصر... برايكو ليش كتييير وكتيير كمان من الشعب المصري ضد هاي المظاهرات اللي بتصير.. وعم يتفقوا انهم ما ينزلوا اليوم ميدان التحرير.. وعم بدعوا انو اللي قام بهاي المظاهرات همي من جنسيات مختلفة غير مصرية.. وهدفها تهديد استقرار وامن مصر.. ناهيكعن المصالح الشخصية لكل واحد منهم من وراء المظاهرات...

يعني اللي منهم اندفعلوا علشان يقوم بالمظاهرات.. واللي هدفو يسقط النظام ليسهل الطريق قدام احزاب تانية انها توصل للحكم.. سواء كانوا من الاخوان المسلمين او غيرهم...

** تعالوا نطلع عالموضوع من زاوية تانية.. مش يمكن انو استمرار هالمظاهرات يجيب الاذى للشعب المصري اكتر من انو يكون لالو نتائج ايجابية.. بالزات انو مشكل الشعب متوحد فيها وفي انقسام بين صفوفهم.. هاد غير للقتل اللي بيصير والمجزرة اللي عم يحكوا عنها.. سواء الشعب نفسو او المحطات المصرية او حتى شيوخ معروفين بمصر...؟؟؟!!!

* * *

3. بالنسبة لقصة مين يمسك الحكم بمصر... احنا هون والقصد الفلسطينية غير الفلسطينية عارفين ومتأكدين وواثقين بمدى فظاعة مبارك كرئيس.. ومش محتاجة بنظرنا انو يحكوا فيها اتنين...

بس الاشي المثير للاستغراب وبصدم كمان هو... شو اللي بخلي شريحة كبيرة وواسعة جدا من الشعب المصري تقول انها مع مبارك وما بدها انو يسطنظام مبارك.. العكس، بآمنوا انو هو احسن رئيس ممكن يحكم مصر.. بالاضافة الى انه رحيلو بهالفترة الصعبة ممكن يكون الها كتييييييير انعكاسات سلبية ورح يصير انفلات امني.. وممكن الليصار بالعراق بشكل عام من تدخل اجنبي يصير بمصر فيما لو مبارك ترك الحكم...

** تعالوا نطلع عالموضوع من زاوية تانية.. يعني معقول شعب متل مصر مش عايش بمقومات المعيشة بالحد الادنى.. وبالرغم من ردائة الوضع يقول انو مع استمرار حكم مبارك وانو اللي بتظاهروا بميدان التحرير وضد مبارك نهايتهم 2 مليون بينما 80% من الشعب معو لمبارك... (هون بنرجع لقصة انو اساس الثورة تحريض خارجي... خارج عن مصر)..

شو اللي عم بصير هون.. يعني معقول الشعب مش عارف مصلحتو وين او لانو من حد ما وعي عالدنيا وهو بنفس الحاكم فما صار فرصة انهم يميزوا عنجد ازا هو سيء او لا، لانهم مجربوش غيرو اصلا ... والا هالاشي نابع من التخوف انو يجي رئيس افظع من مبارك (مع اني بتخيلش انو لو كان فظيع حتفرق كتير عن الوضع الحالي)... والا هالتفكير هاد بدافع الخوف من دكتاتورية الرئيس وكل اللي بعترض طريقو لانو معروف شو مصيرو...

او شو رايكو بالراي انو شعب بوضع مصر من ناحية كثافة سكانية وكل الاوضاع التانية فعلا متل ما بفكروا.. مش رح يقدر يمسكهم ويسيِّر امورهم غير واحد زي مبارك مع كل فظاعته ودكتاتوريته.. وبالفعل متل ما متمسكين بمقولتهم: "مينفعشي غير مبارك لمصصر!!"..

* * *

4. برايكو شعب زي مصر اللي الو 30 سنة ما حدا بخلقتو غير مبارك.. مش يمكن يكون معو حق انو بكفي مظاهرات لاسباب كتيرة:

اولا: لانو المظاهرات عحسب قولهم كان الهدف منها التغيير ومش بالضرورة اسقاط الحكم... وهياها الحكومة بلشت تستجيب لمطالبهم...

ثانيا: بالاضافة للادعاء السائد انو اساس الثورة نشر الفتة والتفرقة لعناصر خارجة عن الشعب المصري... او لعناصر الها مصالح شخصية من ورا كل اللي بصير...

ثالثا: والمظاهرات بهالوقت بلشت تبعدعن الهدف اللي اقيمت مشانو... وصارت تحرض للانقسامات وفتن ومتوقع مجزرة بين ابناء الشعب الواحد...

رابعا: اللي خلى الشعب يتحمل مبارك 30 سنة مش حتفرق كتير كمان 9 اشهر.. ورح يصير انتخابات.ز وكمان هالـ9 اشهر بمثابة اعطاء فرصة للحضرة مبارك.. ازا بالفعل حيقوم بتغيير الوضع ولا لا...

* * *

5. في ظل هذا وذاك.. ما منقدر انو نصم اذاننا عن الناس اللي بتنادي: "لا للاستسلام لا للاستسلام.. حتى يسقط النظام".. وطبعا الهم كامل الحق بهيك دعوى (هاد من نظرنا احنا).. بناء على اعتقادهم بانو اجى الوقت اللي حضرة مبارك يستقيل ويعطي فرصة لغيرو سواء سيء او منيح لانو همي مجربوش غيرو اصلا... لانهم عايشين بالجوع وولا لاقيين شغل ولا قادرين يحصلوا شهادات.. وازا حصلوا فمش رح يقدروا يتوظفوا بشهادتهم.. في حين انو الرئيس عايش ومبسوط وحسابو وحساب ابنو بالبنك بضمن يعيشو كمان سنين لقدام...

* * *

طرحت تساؤلاتي وتخبطاتي.. واللي يمكن كتار بحملوا افكار شبيهة....

تعالوا نرتب افكارنا، نبسطها ونطرحها بشكل دقيق وواضح ...

تعالو نناقشها بكل مصداقية وواقعية..


والله يعطيكو العافية:)