[ღ حورية فلسطين ღ]

المشاركة الأصلية كتبت بواسطة أمل السلام عليكم و رحمة الله

الليلة غير مع ضيفنـآ الغير غير

و ليكون الترحيب لـآئقا يمقـآمه

وجب حضور هذا الطبق



بعرف ما فيه شي رح يوفي برمك غير هالفلفل الحـآر

يلا يما شعليها و خلي الي ما يشتري يتفرج :p


.
.


على بركة الله نبدأ

.
.



- كيفَ كان حالُكَ قبلَ دقائِق ؟
-مَا هُو شُعُورُكَ حينَ تتَجولُ فِي رئِيسيةِ شَبابِ فلسطِين وَ أقسَامِها؟ قُـلها و لا تخفْ ؟
-[ حورية فلسطين] فِي أَسطُر؟
- حِكمَة ، مَوعِظة، أو بيتُ شِعر، تنطَبِق على شخصِك ، تُطبِقهَا فِي حَيَاتِك أو تُحبُ تردِيدها؟
- طُـمُوحاتُك و آهدافُكَ بينَ الحاضِر و المُستقبلْ ..حدثنَا عنهَا ؟
- لا بُد و أن لكَ هِواية ..دعنَا نستكشِفها معكْ؟
- شَخصٌ أو جِهةٌ تخطُر فِي بالِكَ بِأولِ الفرَح و آخِر الحُزن؟
- هلْ تنَاولتَ وَجبةَ إِفطاركَ وحيداً اليومْ ؟ أ مُعتاد عليها أم هِي حالَة طارِئة؟
- مَا الذِي يدعُو حاجِبيْكَ للتقطِيبِ و العبس فجأة ؟
- متَى تغارُ بِشدةٍ وَ تُثيرُ القلقَ كفُوهة بُركان؟
- نـمُرُ جَميعاً بِمواقف مُحزنة آومُفرحة آو مُضحكة ،، حدثـنَا عـنْ موقِف مرَ معـك ؟
- الموت ،، الحياة ،،النعيم ،، الجحيم ،، الوداع ،، اللقاء ،، الصداقة ،، الخيانة ..ماذا تعني لَكْ؟
- رُوح في شَباب فلسطين .. تُصغِي إليها باجتهاد و اهتمام ... تطلُب مِن حروفِها المزيد و المزيد..من يكون / تكون؟
- تَوقيع عُضو من آعضاءِ شَباب فلسطين أعجبَكْ ..؟
- مِصباحُ عَلاءِ الدين بين يديَكْ ..إِمسح سطحَه و ابتسم ..و تمنَ شيئاً؟
- لديكَ ثلاثة كلمـآت وجههـآ لمَنْ شِئتَ مِنْ الآعضَاء.. ؟



.
.


و الـآتي رح نفرجيكي ياه قريبا

بعرف ما فيه شي رح يوفي برمك غير هالفلفل الحـآر

يلا يما شعليها و خلي الي ما يشتري يتفرج :p

جاهزين للطيبين

كيفَ كان حالُكَ قبلَ دقائِق ؟

يعني مطعميتني فلفل ولسا بتسألي عن حالي

ما بيحتاج اقلك يما انتي ادرى

حالي قبل دقائق ومازلت ولحتى يجي وقت امتحاني وانا متلبكة وخايفة وشايلة هم هالإمتحان

مَا هُو شُعُورُكَ حينَ تتَجولُ فِي رئِيسيةِ شَبابِ فلسطِين وَ أقسَامِها؟ قُـلها و لا تخفْ ؟

شو قصدك يعني انا بكره شباب فلسطين عشان هيك بتطمنيني اقولها وما اخاف بعرفك بعرفك امول انتي صايرة درصانة


ياستي بشعر بالإستمتاع والراحة النفسية والفرحة تملؤ نفسي عن جد والله
حتى اني بس اكون مدايقة اول مكان بحب افوت عليه عالنت هوا المنتدى لأني بجد بحبو كتير

قولكم هوا بحبني

-[ حورية فلسطين] فِي أَسطُر؟

فلسطينية ضفاوية جنينية وساكنة في السعودية
انسانة بسيطة كتير وهادية كتير مابحب المشاكل ابدا وبحب كل شي طبيعي

بريئة وكتومة وهالصفتين بتعبولي نفسيتي كتير بس يلا مافي شي عند ربنا بضيع

الحمدلله بترك بصمة حلوة عند أي انسان بتعرف عليه او بأي مكان بكون فيه

يعني الحمدلله ما بنذكر الا بالخير

اكره ماعلي اتعامل بتكليف ونفاق ولئامة مع اي حدا وما بحب حدا يعاملني هيك بحب الشخص اللي بتعامل معو يكون صفحة مفتوحة قدامي بنفس برائتي وطيبتي ما يكون مشكلجي وخبيث

اكتر شي بكرهو بحياتي بجد المشاكل والنكد دايما بحب اتعامل مع الكل بهدوء وعقل وتفاهم


تنويه : عالمنتدى شخصيتي غير عن شخصيتي بالحياة العادية بتختلف 180 درجة

وهالشي عرفوه اكتر من بنت بالمنتدى قابلتهم وجها لوجه وانصدمو بس شافوني

لأني عالمنتدى فرفوشة كتير وبتهبل كتير ودايما صوتي معبي الدنيا لسا هالفترة هديانة وعقلانة يمكن طلعلي ضرس العقل

بس عالطبيعة هادية كتير ورايقة كتير وراكزة عكس المنتدى طبعا ما بتخلو حياتي الشخصية من الهبل بس مو زي الهبل اللي بتهبلو بالمنتدى يعني هبل بعقل


كأنكم طلبتو مني اوصف حالي بأسطر مو مجلد كامل

حِكمَة ، مَوعِظة، أو بيتُ شِعر، تنطَبِق على شخصِك ، تُطبِقهَا فِي حَيَاتِك أو تُحبُ تردِيدها؟

الدنيا حلوة & طنش تعش تنتعش

طُـمُوحاتُك و آهدافُكَ بينَ الحاضِر و المُستقبلْ ..حدثنَا عنهَا ؟

وحدة بوضعي وبقصد وضعي يعني المكان اللي انا عايشة فيه ووضعي من ناحية السفر ما بساعد انو يكون عندي طموحات واهداف اعملها

ممكن نسميها امنيات بتمناها وانا عارفة انها ما رح تتحقق

رح احكي عن الشي اللي اتمنيتو واتمنيت ادرسو بس كان مجرد حكي :)

كنت بتمنى من انا وصغيرة بس اكبر اصير محامية مش عارفة ليش بس كان شي حاببتو يعني


بس طبعا صعبة كتير اسافر وادرس بعيد عن اهلي واصلا ما بصحلي اروح اي مكان بحكم الوثيقة وبحكم انو الفلسطينية بكل مكان معترين ^_^

نيجي للطموحات والأهداف كل واحد فينا بطمح لشغلات معينة براسو ..في اللي بقدر يوصل لطموحاتو بشطارتو وفي اللي ما بيقدر يوصل بهبالتو

انا مابقدر اوصل بسبب اني ساكنة في السعودية

وعنا هون في تفرقة كبييييييييييييييييرة بين السعوديين وغير السعوديين وانا شخصيا عم بعاني من هالتفرقة بشغلي

حقنا ضايع ومستقبلنا ضايع هون وبحكيها قدام الكبير والصغير ومابخاف من حدا لأنو هاد الواقع اللي هون

وماحدا رح يقدر يناقشني فيه

ابسط حقوقنا بالشغل مش ماخدينها كيف بدنا نحلم ونطمح ونحقق اهداف واحنا اصلا اول كلمة بتنحكالنا


انتو اجانب المقصود منها يعني انتو مو سعوديين ^_^

اكمل ولا خليها بالقلب تجرح ؟؟

لا بُد و أن لكَ هِواية ..دعنَا نستكشِفها معكْ؟

السباحة والسفر وركوب الخيل ودايما بحكي اني ما بمارس ولا وحدة فيهم بس بحبهم
وانجبرت حاليا اهوى الفوتوشوب لأنو الشي الوحيد اللي بحبو والحمدلله قادرة اوصلو
ياخوفي بعد فترة ما اقدر واجي افتح الفوتوشوب الاقي صفحة بتطلعلي بوجهي مكتوب عليها بالأحمر

انتي اجنبية

وقتها رح انتحر من سطوح بيتنا مش اكتر

شَخصٌ أو جِهةٌ تخطُر فِي بالِكَ بِأولِ الفرَح و آخِر الحُزن؟

اهلي الله يحفظلي ياهم

هلْ تنَاولتَ وَجبةَ إِفطاركَ وحيداً اليومْ ؟ أ مُعتاد عليها أم هِي حالَة طارِئة؟

بحب وجبة الفطور كتير لأنها بتعدل مزاجي وبتحلي يومي بالذات اذا كانت مع اهلي

وهالأيام صايرة افطر مع ماما لأنو بنكون انا وياها لحالنا بالبيت بفطر معها قبل ما اطلع على شغلي

اليوم ما فطرت

مَا الذِي يدعُو حاجِبيْكَ للتقطِيبِ و العبس فجأة ؟

لما اعصب وانقهر بس نادرا ما يتقطبو حاوجبي
لأني معروفة بس اعصب او ما يعجبني شي برفع حاجب وبنزل حاجب والكل بخافو بس اعمل هالحركة

لأني باردة مو على اي شي بعصب وبكونو متأكدين اللي حولي ما بعصب الا على شي محرز عشان هيك بتقوم الدنيا وما بتقعد بس اعصب

بس حتى لما اعصب بعصب بهدوء

متَى تغارُ بِشدةٍ وَ تُثيرُ القلقَ كفُوهة بُركان؟

لما شخص يكون بحبني ومهتم فيني كتير وفجأة الاقيه مهتم بحدا تاني وبحب حدا تاني

وانا اصلا نادرا ما اغار وهالشغلة ما بتصير معي دايما عشان هيك بليدة انا ماعندي احساس بالغيرة من اي شي

ياعيني عالبساطة ياعم

نـمُرُ جَميعاً بِمواقف مُحزنة آومُفرحة آو مُضحكة ،، حدثـنَا عـنْ موقِف مرَ معـك ؟

طيب اعطيكم ال 3 مواقف هيك عالسريع ومواقف صارت معي بهالفترة يعني وهية اللي ببالي حاليا


موقف حزين ومستحيل انساه لما طلعت من شغلي بسبب السعودة .. يعني التفرقة .. يعني الكلمة اللي انحكتلي انتي اجنبية مش سعودية فعلا كان موقف محزن إلي ولكل اللي كنت اشتغل معاهم وبالمناسبة في منهم سعوديات ومو عاجبهم الوضع كان << الحق يقال ^_^


موقف مفرح من شهر تقريبا زوج اختي شاف فيني رؤيا رااااااااااااااااائعة وان شاء الله تتحقق وكتير فرحتني هالرؤيا



موقف مضحك من يومين طلعت مع اخوي ايمن هاداكبر مني بــ 3 سنين طلعنا شربنا موكا وسحلب

ولما خلصنا كاساتنا الأخ ايمن مو متحمل يضلو الكاسات بسيارتو راح وقفني جمب برميل زبالة الله يكرمكم وفتحي الشباك عشان اكب الكاسات وانا بكبهم لسا قاعدة بحكي ان شا الله ما تطلعلي بسة من الزبالة

كبيت الكاسات نطتلي البسة بوجهي انجلطت وفزعت الدنيا وهداك ايمن فارط ضحك وانا صفرنت وكرهت البسس اكتر ما بكرههم

الموت ،، الحياة ،،النعيم ،، الجحيم ،، الوداع ،، اللقاء ،، الصداقة ،، الخيانة ..ماذا تعني لَكْ؟

صعب اوصف شو بيعنولي اسفة ^_^

رُوح في شَباب فلسطين .. تُصغِي إليها باجتهاد و اهتمام ... تطلُب مِن حروفِها المزيد و المزيد..من يكون / تكون؟

مامتي امون (بنت فلسطين المجروحة )
وبالمناسبة نسيت احكي من كتر ما انا بشيل بقلبي امون دايما بتسميني جمل

بجد انا ما بنسى اللي بغلط بحقي مش حقد بس بشيل بقلبي ونادرا ما اسامح يعني ديرو بالكم

تَوقيع عُضو من آعضاءِ شَباب فلسطين أعجبَكْ ..؟

في توقيع إلي انا إنهدالي من الأخ مؤيد الله يذكرو بالخير

ما بعرف اذا حدا من الموجودين هلأ بتذكرو بس امون اكيد بتتذكرو خليني احطلكم ياه هلأ واحكيلكم قصتو






هاد التوقيع بحبو كتير واول ما نزل التوقيع هديك الأيام صارت مظاهرات ههههههههههههههههه

لأنو كل البنات انجنو عالتوقيع واولهم الأفندية امون

وكلهم طلبو من الأخ مؤيد يعمللهم نفس التوقيع ما رضي وبيني وبينكم انا مارضيت كمان

راحت امون الطحشة سرقت التوقيع وفتحت موضوع خاص لطلبات هالتوقيع بالذات وحكت للبنات اي وحدة بدها التوقيع بإسمها بس تحكيلي

وفعلا الطحشات اجو كلهم طلبو التوقيع وراحت حضرتها عالفوتوشوب وغيرت اسمي وعملت لكل بنات المنتدى نفس التوقيع وانا انحرق دمي

وعملنا قصة كبيرة وقتها واتهبلنا كتير عن جد كانت ايام روعة كنا رح ننطرد انا وامون ومؤيد وكم حدا كانو معنا من المنتدى لأنو قلبنا الدنيا

مِصباحُ عَلاءِ الدين بين يديَكْ ..إِمسح سطحَه و ابتسم ..و تمنَ شيئاً؟

بتمنى اروح عالإمارات مش عشان الإمارات بس عشان .... يآآآآآآآآآآرب اتوفق


وبتمنى انجح بإمتحاني الشامل اللي ضايلو 18 يوم هوا اللي رح يحدد مصيري اذا بنجح بتخرج واذا ما بنجح ما بتخرج ومستقبلي بضيع اكتر ما هو ضايع وفرحة عمري وفرحة اهلي رح تصير دمار

لديكَ ثلاثة كلمـآت وجههـآ لمَنْ شِئتَ مِنْ الآعضَاء.. ؟

بصراحة كنت بدي اوجههم لأكتر 3 اعضاء بكرههم بالمنتدى

بس فكرت وقررت انو الأعضاء اللي بحبهم اولى بكلامي لأنو كلام الملوك مو لأي حدا بنقال


وردة الأقصى توأمي وحبيبة قلبي ما اشتقتي لأيامنا بالمنتدى مع بعض؟؟

ام الوليد ملك حاولي تسامحي وتفتحي قلبك وفكري بالشي الإيجابي بالمنتدى :)

ليمار & بو هبة ما بدنا شي غير نطمن عليكم الكم اكتر من سنة غايبين وماحدا بعرف عنكم شي

و الـآتي رح نفرجيكي ياه قريبا

الله يستر بكفيني الأول كمان في تالي