[لالا-فلسطين 48]

يسعد صباحك قاهر الصعاب...


رح فوت بالنقاش دغري...

أولا : ظاهرة في الاعراس والمناسبات : قيام الامهات بتزيين البنات الصغار من سنتين فما فوق في الصالونات . فمثلا بنت صغيرة عمرها لسا 3 سنوات مكياج وتسريحة وعطر ولبس اخر موضه .
طبعا هذه التسريحة واللبس غالي الثمن والبنت لسا ما هي واعية على الدنيا يعني تضييع اموال .
كذلك الامر لما البنت وهي صغيرة تتعود على اللبس المفصل والمكياج والتسريحات ايش بتصير حياتها لما تكبر ( بصير هدفها فقط الصالونات والتزين) .

بدي احكيلك شغلة انو هالظاهرة منتشرة كتيييييير عنا ومش من اليوم من زماااااااان، من لما وعيت عالدنيا وانا اشوف انو اللي عندهم عرس او حفلة زفاف كل اهل الدار من كبيرهم لصغيرهم بروحوا بلبسوا بالصالون، وتسريحة ومكياج ولبسة بتليق بسهرة...

انا مش شايفة انو في مبالغة بهالشغلة ازا اللبس بالصالون اقتصر فقط على اعراس الاشخاص القريبة من الدرجة الاولى في القرابة، يعني مش كل ما صار عرس بالبلد من قريب والا بعيد العيلة بالليلة تركض عالصالون...
يمكن انو سبب تجذر هالعادة فينا خلاني اشوفها انو اشي عادي بس لما بالاشي المعقول...

بس الاشي اللي عم نلحظو بهالايام انو بكونوا الناس ناطرين الحفلة تبلش بس علشان يتفرجوا اهل العروس/ العريس شو لابسين وشو عاملين، يعني بالزبط بتكون الناس قاعدة لتنتقد وتنقد مش بس مظهر العرسان كمان اهاليهم والايام الاخيرة صرنا نلحظ انو هالانتقادات مش موجهة بس عالبني ادمين نفسهم،كمان على مراسيم الاحتفال: يعني كيف زينوا القاعة، استخدموا الالعاب النارية والمفرقعات، أي فرقة موسيقية جابوا، عملت العروس "نوف" (هالكلمة عبرية والله ما بعرف شو بتحكولها بالعربي، بس القصد فيها انو العرسان بطلعوا قبل العرس على شي محل يتصوروا ويعملوا فيديو كليب)>> بصراحة عادات سيئة، بس متجذرة فينا وللاسف!!!!!!

ولدرجة انو الترقب والانتقادات لا تقتصر فقط على اهل الحفل وكمان عكل المشتركين بالحفل، يعني الام بتكون ناظرة كمان فلانة شو لابسة وشو عاملة وكيف ملبسة بناتها (ان كان الها دخل بالعرس ا ولع)
وبشكل تلقائي هالعادة رح تنتقل من الام لبناتها ومن وهني زغار ويصيروا يطلعوا عالبنات كيف ووين وشو بلبسوا.. ورح يبلشوا بتطلبوا كمان!!! فاشي طبيعي انهم رح يقتدوا بامياتهن!

كمان انا ضد انو البنات وامياتهن ما يخلين ولا عرس يزعل عليهن والا لازم يحضرنو (بغض النظر عن تزينهن) لانو بصير الاشي مبالغ فيو ومش حلو انوالواحد يعودحالو عمتل هي طبع، انو ازا في عرس لازم نكوناول المشرفين، طبعا بس اللي من واجبو الواحد يحضرو ومالوش خلاص منو هاداشي تاني...


وبحب الفت نظرك انو عنا كمان الاشي دارج عند الذكور بس بنسبة اخف!!!!!


وصفتلك الظاهرة، بس اللي انا بشوفو معقول انو اوكي عندكو عرس روحوا تزينوا بالصالون واشتروا الاواعي اللي بتحبوها، حلو انو العيلة اللي عندها عرس يعملو تغيير بطريقة لبس وتزينهن الاعتيادية، بس شرط تناسبكو وتناسب ازواقكو ومش عشان فلانة وبناتها اشترين من هاد المحل ولبسن هيك، وبالاضافة الى انها تناسبكو من ناحية مادية ومش لازم تشنقوا حالكو علشان تبينوا يوم العرس بهالمظهر!!!

بس السؤال كيف انو عادة الاسراف واللبس اللي بناسب السهرات متتعودش عليه البنت، هون بيجي دور الام وشطارتها انها تربي بنتها انو كل مناسبة وكل موقف الو اللبس اللي بناسبو واكيد لبس السهرات غير عن لبس اليوم يوم، والتزين بالصالونات مش والمكياج هاد يقتصر بس ازا كان العرس عند حدا قريب جدا من العيلة ومش لازم عكل عرس..

بالاضافة انو البنت الزغيرة مش لازم ترافق امها عكل عرس>> والله شو بدو يطلع منها هالبنت ازا من زغرة تعودت متفوتش ولا عرس؟؟؟؟؟؟؟!!!!!!!!!

ثانيا : قيام الفتاة المنقبة بحمل ابنها الرضيع في عربة وجر العربة في الطريق(يعني تحضر ) طيب هذا المراة المسلمة المنقبة مش قادرة تحمل ابنها الي وزنة 4-5 كيلو وحتى 8 كيلو .
والمشكلة لما تصل هذه المراة المسكينة لطريق مرتفعة (صعود) بتصير تجر في العرباية والناس بينظروا لها . طيب ليش ها المعاناة فقط من اجل الموضه وتبين للناس انو وضعها المادي ممتاز ومتحضرة . الله يعينها على الجر .

هل انت مع او ضد جر العربة .
ما رايك بهذه الظاهرة؟

بالنسبة للظاهرة التانية: يعني المستهدف هون بس المسلمة المنقبة؟! انو شو دخل ازا كانت منقبة بالظاهرة؟!

شوف، رح احكيلك كيف الوضع عنا..

العرباية والسلة اللي بنحط فيها البيبي وبتنحمل بالايد، من مرة ما بتدل على وضع مادي ممتاز ولا حتى على تحضر..

هاي مستلزمات للمولود الجديد لازم تكون جاهزة مع قدومه عالدنيا!!!

بس كيف ووينتا نستخدمهن ونطلع فيهن هاد الاشي برجع للام نفسها والمشوار اللي طالعة عليه..

متلا ازا طالعة على مشوار ترفيه متلا رحلة ومعها ابنها، فحلو انها تاخد معها العرباية، لانو ما بصير انها تضل حاملة ابنها عايدها طول الرحلة... وكمان ازا كانت الاغراض اللازمة للبيبي اللي لازم تصحبهن معها كتار فالحل كمان انها تاخد معها العرباية لانها بتشيل كتير من هالاغراض...

بس انا ضد انو أي مشوار، بسيط كان او بعيد انو الام تحط ابنها بهالسلة او بالعرباية وتاخدو..

اولا بكون الاشي متعب لالها خصوصي انو المشوار مش مستاهل كل هاد وهي نفسها بتعرفش كيف تدبر السلة او العرباية خصوصي انهن تقال وكبار بالحجم!

والاشي التاني والاهم، انو الطفل الزغير بحاجة لانو يحس بحنان امو، فمن وين الحنان اللي رح يحس فيو ازا دايما راميتو بهالسلة او بهالعرباية؟؟؟!!!!!!

يعني لازم يكون الاشي بالعقل وبالمعقول وحسب الحاجةوهون الام لازم توظف رايها ازا الموقف بحاجة او مش بحاجة!!!

يعني بصير اتخاذ قرار متل هيك تلقائي وعالسريع ومش بحاجة لانها تناقش في او تتطلع بهيك نظرة تحضر وناحية مادية، لانو ازا تفكيرها بهالشكل بصير الاشي اسمو تخلف ومش تحضر!!!!!


* * * * *


مشكور عالطرح..

ويعطيك الف عافية!