قفشة من نوع أكاديمي...!
المحاضِرة لطلابها بنبرة مؤنبة، عاضبة وصاخبة: "في البريزنتيشن (العرض) اللي بدكم تعملوه، بديش حدا يروح ينسخلي كلمات من الكتب وييجي يصفها على العارضة، بدي اياكم تلخصوا بكلماتكم... وكمان بديش يكون مكتوب عالعارضة كلمات كتير، لازم تكتفوا برؤوس اقلام. واللي بدو يعرض بدو يشرحلنا شرح وعن فهم ومش يقعد يقرأ قراءة عن العارضة!... اظن انو بنعرف نقرأ.. بدي يكون في ابداع..."
المحاضرة في مناسبة أخرى، تمسك دفتر اصطفت عليه مصفوفات من الكلمات المتراصة: "استراتيجيات التدريس هي...--------------------------------------------------------------------------------------------------------------".
عند توجهي بعد المحاضَرة إلى المكتبة مع زميلتي: "ولك شو هاي المحاضِرة، عدنو قاتلينلها قتيل.. انتقمت منّا ونزلت فينا تسمايّ ملحقتش اشي منها شو مفكرتنا ماكنات، هاتي نفحص بالكتب عن نفس موضوع المحاضرة؛ استراتيجيات اللي بعرفش ايش.. مالكل بحكي عن امتحاناتها انها حفظ وتبصيم وكتير بتعتمد فيو على المادة اللي مررتها خلال المحاضرات.. يعني لازم نحصل عالمادة!"
زميلتي، بعد أن تناولت أول كتاب عن الرف ميقنة انه يحوي المادة المطلوبة، فلم تتجه اليه عبثا فهو يضم كل عناوين المحاضرات على امتداد الفصل: "ولك شوفي.. شوفي، بحياتك ما نفس اللي بتسميلنا اياه بالمحاضَرة، بالحرف الواحد، تعالي تعالي نكمِّل المحاضَرة من الكتاب... وافضيحتاه (منصدمة، واخذت تتصفح الكتاب) وكمان نفس وصف الحالة تبعت المحاضرة الماضية ونفس الامثلة بنفس الترتيب... ازا هيك القصة بدي ابطل اكتب بمحاضراتها!"
:
لم تعتمد المحاضِرة في تحضيرها لمادة المحاضَرة على النسخ من الكتب،
ولم تعتمد طريقة القراءة التقليدية على مسامع الطلاب
ليسجلوا حرفيا ما تقول خلال عرضها للمادة بل لجأت إلى طرق ابتكارية-ابداعية،
ولم تقم بالاثقال علينا بالكثير من المواد
بل اكتفت بعرض كلمات مفتاحة تستثير تفكيرنا الحر-الابداعي!
يا لها من محاضِرة مثالية ومعلمة قدوة للاجيال الصاعدة...!
حقا تقول وتفعل بدقة مبالغ بها!!!!!!!!!!!