[لالا-فلسطين 48]

هلا فيك خيو........ تسلم كتيييير!

بس قبل كل اشي، اعجبتني لغتك الفصحة المتينة "والجزلة" (بحطها بين قوسين اقتباس لاني كل ما استعملها بتحكيلي صاحبتي هاي الكلمة لالي وانت عم تعملي سرقة ادبية)....

لسا امبارح كان المحاضر ببهدلنا لانو 90% من اللي قدموا الوظايف لغتهم فيها "ركيكة" (بس انا لع!)!


اولا: بالنسبة لنقطة الدين والوطن معتقدش اني بختلف معك بهالنقطة. بالعكس امور زي هيك لازم نكون حازمين فيها عالاخر! لانو مش من حق اي حدا على وجه البسيطة يسببللي شعور مش حلو بطريقة بحقلوش يتبعها! لازم ندافع وبقوة وبجرأة ووقاحة عقلانية حتى عن ابسط واتفه حقوقنا!


ثانيا:

لا أحب ألا أن اكون أنا

جملة بتجنن كتير بحب ازرعها بحذافيرها بذاتي وبذوات من حولي، بس كمان واطبقهاش بطريقة متطرفة او مغلوطة لحتى ما احيِّد امكانية تطوير ذاتي للاحسن!

وبالنسبة للناس اللي بينوا متسامحين من خلال ردودهم، بحكي حرام انو نحكم عليهم كلهم انهم بحاولوا يعملوا تمويه او انو يكونوا غير واقعيين. لانو بهيك مجال احنا عم نحكي شو منفكر عن حالنا ويمكن بلحظة نعمل النقيض لكل هالنظريات اللي منلوَّح فيها! وبالاخر انا بشوف انو تطابق النظري مع التطبيقي عند كل انسان هي مهارة تُكتسب وتتطور مع التجربة على مر الزمن، طبعا لالي معنبي يطورها!

فلسفتي بالحياة قائمة على الصدق مع نفسي لأستطيع أن اكون صادقا مع الآخرين

فلسفة حلوة! حلو يكون لكل انسان فلسفة يتمسك فيها ويحاول يطبقها بكل مجالات حياتو!

عفكرة انا شايفة انك انت هيك عحالك صريح، فلا تتمنى انو تكون اشي تاني وتكون صريح لتظهر هالاشي التاني، لانو يمكن وقتها تبطل صريح!

لأ ستي صريح

شكلك مفهمتنيش، انا قصدي انك لما انت هيك عحالك، زي ما ظهرتلنا، بشوف انك صريح، فلا تتمنى تكون اشي تاني، لانو وقتها، لما تيجي تظهر هالاشي التتاني اللي تمنيتو رح تبطل تكون صريح!

الا اذا تمنيك هاد استخدم "كمفارقة"!

بتمنى تكون فهمت عليّ هسا!

ولدي القدرة أن اضع اصبعي فوق الجرح
وإذا استلزم الأمر بداخله
لإخراج ما يلهبه

اي بوجع!

ما اقواك، بس هالقدرة مطلوبة جدا في الحالات الحرجة، انا مش هيك بس بحاول اني انميّ هالقدرة!

أعجبني رأيك باللجوء إذا اقتضى الأمر
في حالات معينة الى التجاهل

والله بهالدنيا كلو مطلوب، والتجاهل مرات بكون انجع حل! (مراااااااات!!!!!!!)

يعني أحيانا الكي مطلوب
وأحيانا أخرى قد نضطر للبتر

واحيانامداواة الجراح ووووووو...... (استنى بس القى الكلمة المناسبة!) التضميد مطلوب!

اليس كذلك؟!




تحياتي لالك.. وطريقتك حلوة في النقاش، يا ريت تتواجد بمواضيع النقاش اللي مخططة اطرحها (ازا مانضغطتش بالوظايف هالفترة اكتر من حالة الضغط هاي وكان عندي مجال اشرف عنقاشات)، لانو شكلها ارائك (شو ما كانت) رح تثريها!
لالا-فلسطين 48.