[.. ليآل ~]

أنا بحب الشعر كتير ،، وخاصةً الشعر الجاهلي

بحب أقرأ لطرفه بن العبد / بشـآر بن برد / الحطيئه / قيس بن الملوح

وبحب كمان أقرأ للمتنبي وللشافعي ونزار قباني

من فتره مش بعيده كتير ، كنت أكتب خواطر بس ما احتفظ فيها

أحس انو كلام سخيف مابيستاهل احتفظ فيه عندي

اروح أئطع الورئه أو احرئها

كتير ندمانه اني كنت اعمل هيك

بس هلأ اي خربوشه بخربشها بحتفظ فيها


::


بسنه تانيه جامعه ،، قررت جامعتنا تعمل مجله تصدر بشكل شهري

نكتب فيها عن نشاطات الجامعه والمؤتمرات الي بتصير فيها وهالشغلات

وكانت المجله مقسمه لتلات اجزاء جزء ثقافي وجزء ادبي وجزء عملي

وطلبوا من اي وحده بتحب تشارك تئدم طلب

انا بعد تردد كبير قررت ائدم طلب بحكم اني بعرف الى حد ما اكتب

وعبيت طلب وئدمتو،، تاني يوم اجاني اتصال من مدير تحرير المجله والي هوي دكتور عنا بالجامعه اسمو استاز طارق

حكالي اروح لعندو على المكتب حتى يختبر قدرتي على الكتابه

تاني يوم لما رحت لعندو طلب مني اكتب موضوع عن حب الوطن وعن الشوق لله عز وجل وعن الحياه بدون أمل

طلب هالتلات مواضيع تكون جاهزة خلال تلات ساعات

طبعاً هالشي صعب كتير

بالنهايه انا راح اكتب خاطره مش مقال

كتبت الي عندي والي ئدرت عليه وتركتلوا الورق

تاني يوم اتصلوا علي وحكولي انو انئبلت وصار فيني اكتب بمجله الجامعه

فرحت كسيراً كسيراً

كنت كل شهر اكتب عن موضوع من اختياري ،، ويمرء هالموضوع على الإستاز طارق لحتى يعطي رأيو فيه

بس الله وكيلكم بحياتو ماجبر خاطري بكلمه

يمسك الورق ويطلع فيه هيك من فوق لفوق ويحكيلي ماشي الحال

يلا احكيلهم يطبعوه

بمره المرات انئهرت منو كتير ،، وسألتو بشويه تعصيب

طالما الي بكتبو مابيعجبك ،، ليش وافقت علي

اتطلع فيني وابتسم بسخريه وحكالي لأ مش هيك انتي بتعرفي تكتبي وعندك احساس منيح

بس ماعندك ابداع

وكتاباتك كلها تقليديه وبتشبه بعضها

وازا ضليتي هيك مش راح تتئدمي خطوه وحده لئدام

و ........ الخ

طلعت من عندو مسموم بدني

متل الي طالع من السجن بكفاله

وقررت انو خلص ماراح ارجع اكتب شي ونزلوا بالمجله

اجا موعد النشر وانا مابعتت شي ،، ويبعتولي ويزكروني وانا ولا انا هون

اخر شي اجا الإستاز طارق لحدي وحكالي انا بحب اتعامل مع المبدعين بفوقيه مشان مايصيبهم غرور

يلا بسرعه اكتبي شي من الي بتكتبيه خلينا ننشرو

الصراحه

الصراحه

اتمنيت ارزعوا كف ،، بس كتمتها بئلبي

ئال شو مشان مايصيبهم غرور

واجابةً على السؤال ،، طبعاً كتبت ،، هو انا أئدر