رد: هل يفضل الاباء .. الاولاد على البنات ؟
راح احكي بشكل عام بغض النظر عن الاسئلة
هالشي اكيد موجود ومنتشر عند الجميع
نسبة قليلة جدا الي ما بتفكر بهاي الطريقة
الاسباب كتيرة
بس بيرجع للتماسك الاسري القوي بالعائلة العربية عنا
يعني الشب راح يتزوج ويصير عندو اولاد
هدول الاولاد بيحملو اسم العائلة
اما البنت لما بتتزوج اولادها راح يكونو من عائلة تانية
سبب تاني
من ناحية الاشخاص الي بينظرو للموضوع نظرة مادية
انو الورثة الشباب المال ما راح يضيع لانو بيضلو لنفس العائلة
اما البنت نصيبها حيروح لشخص غريب
للاسف تفكير مادي متخلف
سبب تالت ويمكن يعد من اهم الاسباب
تربية البنت بنظر المجتمع صعبة جدا على الاهل
يعني الشب شو ما كانت طريقة تربيتو وشو ما عمل بحياتو بنظر المجتمع شب مافي شي بعيبو
صار للاسف مفهوم قلة الادب للشب رجولة
يعني ممكن بتخبيصاتو يبين رجولتو ماشالله
اما البنت ازا غلطت فما بتقضي على حالها بس
على سمعة العيلة كلها
غير هيك حتى ازا البنت تربت ترباية صحيحة وتوجهت بطريقة صحية
راح تتزوج وتصير عند ناس اغراب ورجل غريب
والبيوت اسرار
يعني دائما الاهل بيضلو يفكرو يا ترى مبسوطة ومرتاحة بحياتها او لا
زوجها محترمها او لا
منيح او لا
وازا كان لا واحد من تنين
يا بتتحمل البنت وبتسكت لحتى الحياة تستمر
لانها بتخاف من نظرة المجتمع فيما لو صار طلاق
وهادا كمان موضوع لحالو
يا اما ما بتتحمل واهلها بيتدخلو يا بتنحل يا ما بتنحل
وانحلت او لا فهالشي راح يكون هم كبير على الاهل
انو المشاكل الي صارت ممكن تتكرر معها
او بترجع لبيت اهلها
وبهالوضع كتير مشاكل بتترتب عليه ... نظرة المجتمع و خراب عائلة تشرد اولاد
تفكير يمكن بعيد المدى
بس هادا الواقع حئيئة الي بخلي الاهل يفضلو الشباب على البنات
الغرب كل هالاشيا ما بتسبب مشاكل بالنسبة الهم
لانو البنت بتصير مسؤولة عن حالها بعمر معين
وحياتها وطريقها بتختارو لحالها بدون قيود او حلال او حرام
بيرجع لتفكك كبير بالروابط الاسرية عندهم
بس برايي ان كان بمجتمعنا او بمجتمع الغرب في اخطاء كبيرة بيرتكبها الاباء بحق البنات
يمكن اغلاط الغرب اكبر بالنسبة النا
بس ضغوط متل الي ذكرتها قبل
لو صارت عند البنت بمجتمعنا فهي بتاسر كتير على نفسية البنت
وعلى حياتها بشكل عام
الحق على مين ما بعرف
من حق الاهل خوفهم على مستقبل البنت
وهالخوف بجيب هموم كبيرة يمكن
بس تخلف المجتمع سبب رئيسي بوجود هاي الفكرة عند معظم العوائل العربية
مو من هلاء من ايام الجاهلية
مع انو المفروض دينا يكون غير هاي النظرة السيئة
عطول منسمع انو هم البنات للممات
بهيك مجتمع شي طبيعي
الحل !! ما بعتئد انو في حل
يمكن لنهاية العالم نظرة المجتمع ما راح تتغير
فينا نغير نسبة قليلة جدا
اما مجتمع بحالو صعب كتير
اد ما اتطورنا
مو الكل راح يمشي على تعاليم دينا بالشكل الصحيح
لو كل المجتمع طبق الدين بالشكل الصحيح كان ممكن يكون في حل
والله قادر على كل شي
مشكور اخي
حاسة حالي رغيت كتير
يسلموو عالموضوع
|