رد: { .. | اخر رسالة ارسلتها | .. }
يا صاحبي الدنيا حكايات وعلوم
قصص عجيبة تذهل اللي قراها
الدنيا لو تضحك معك دايم الدوم
خلك فطين ولا يهمك رضاها
كم واحد تبنى له آمال وحلوم
يفنى وغيره يهتني في بناها
ياما افرحت قوم واحزنت قوم
وكم اعشقت عين وخانت غلاها
ياصاحبي شفت امس شف حالنا اليوم
دنيا تقلب يكفي الله بلاها
اليوم لامنه بغت عيني النوم
تنكدت روحي وعافت كراها
ما كل من علا بالاصوات مفهوم
وما كل روحي تلتقي في مناها
وما كل من يشكي معذب ومحروم
وما كل من يضحك همومه نساها
بحر الحياة ان صرت ما تعرف العوم
يرميك في غبة بعيده مداها
من راح يستسلم من احزان وهموم
يموت حي وحاجته ما قضاها
واجه هبوب الوقت بايمان وعزوم
لابد ما ربك يهدي هواها
واصبر اذا شمسك حجب نورها غيوم
الغيم يتفرق ويشرق سناها
|