[روان فلسطين]

المشاركة الأصلية كتبت بواسطة limar رورو حبيبتي راح احكيلك طلبات الاردن كيف

خلي خالتك تساعدك كمان اكيد عندها خبرة

هلاء عندك ورئ الطلب فيها 30 خيار

انتي حابة مثلا طب

بدك تحطي طب مثلا بالجامعة الاردنية

هي اول خيار

تاني خيار طب بجامعة العلوم والتكنولوجيا

تالت خيار مثلا طب بالجامعة الهاشمية

وهكزا

يعني بدك تركزي على التخصص الي بدك ياه وتزكريه بكل الجامعات الي موجود التخصص فيها

هلاء ازا اهلك ما بيئبلو الا جامعة بعمان

مافي ئدامك الا الاردنية

لانها الوحيدة الحكومية بعمان

بائي الجامعات بتتوزع على المحافظات

هلاء ازا كان خيارك الوحيد الاردنية

بدك تحطي اول شي طب

تاني خيار مثلا صيدلة

تالت خيار هندسة

وفروع الهندسة الي انتي حابة تتخصصي فيها

لانو مو كل الهندسات بتنفع للبنات

انتي حكيتي عن المدنية انها مو صعبة شفتي موادها فيها كالكولاس ( تفاضل وتكامل ) مادة وحدة بس

حبيبتي هاي مادة الكالكولاس اغلب تخصصات الجامعة كلية طب وهندسة وصيدلة وتمريض وعلوم بجميع فروعها بياخدوها

العلوم العسكرية

كل الجامعة بتاخدها وهاي متطلب لجميع طلاب الجامعة

بس الهندسة المدنية متل ما حكت امون بهدلة للبنت

بهدلة مرتبة يعني لانو اغلبها معاينات بمواقع البناء وانك تتعاملي مع العمال وهالشي صعب لبنت

عمارة ممكن

وازا بتحكي انو انتي ما الك بالرسم

فانا راح احكيلك انو ببلشو معك من الصفر

وبعلموكي حتى اساسيات الرسم من الصفر

عندك كمان هندسة ديكور للبنات حلوة كتير

عندك جرافيك ديزاين شغلها تمام ممتاز

بس الجرافيك ديزاين مو موجود بالجامعة الاردنية

عندك كمان تحاليل طبية الي انضربت على عيني ودرستها

اكيد ما بنصحك فيها ازا راح تعيشي بالاردن

اما ازا رجعتي للرياض فشغلها ممتاز كتير هناك وبرواتب ممتازة

وبكون احسن ازا كملتي فيها ماستر

بدها ئوة الب صحيح بس على الئليلة اخف من الطب

في كتير فروع هندسة شو ما يخطر عبالك

هندسة اتصالات كمان حلوة كتير

هندسة جينات هاي بتهتم بالجينات والوراثة ولسا جديدة كمان

مممممممم

شو كمان

عندك تخصص كيمياوفي فيزيا وفي رياضيات وفي بيولوجي وفي جيولوجيا

بس حرام بمعدلك تفوتي كلية علوم بدك شي اعلى

هندسة او صيدلة او طب

بس بدك اتضحي بالطب كتير

راح احكيلك ليش

اول شي الطب دراستو طويلة

ونظامو غير الانظمة كلها

يعني مثلا انا طالبة بتخصص معين بجامعة معينة

باخد مثلا بالفصل 15 ساعة بما يعادل 5 مواد

هلاء كل فصل 4 شهور

اخر الاربع شهور بدي امتحن بالمواد الي عندي

هلاء ازا لا سمح الله حملت مادة لازم اعيدها باي فصل بدي ياه

اما الطب نزامو سنوي

ازا رسبتي بمادة وحدة

بدك تعيدي السنة كاملة مع كل موادها

مافي رحمة يعني

بدك تفكري منيح ئبل اي خطوة لحتى ما اتضيعي عحالك سنين

والطب بدو كتير من حياتك وجرئتك وئوة البك

راح اتضيع سنين من عمرك فيه

بس بالاخر انتي والي بدك ياه

حاولت اشرحلك كل الي خطر ببالي هلاء واي مساعدة انا جاهزة حبيبتي

يا حبيبتي يا لموووورتي

كيف بدي اشكرك انا

يا ربي يرزقك ابن الحلال الي يستاهل طيبتك يا غاليه

ويسعدلي اياكي

اها طبعا راح اسأل اسووم وهيي ما بتئصر

بس انا كنت حابه اخد اكبر عدد اراء ممكن

هلا انا حابه ادرس بالاردنيه

او الهاشميه

وازا التكنو معليش

بس بابا قلي انو لا تحطي

طب لكل جامعه ورا بعض

لانو ممكن يضيع عليكي الفرصه

او يعطوكي سوء اختيار

هفاد يلي رابطني

عرفتي كيف

وبالنسبه للطب صعوبتو

المده عاديه يعني انا راضيه ادرسها

وانا ان شاء الله ما بخاف ارسب كل خوفي ما اطلع الاولى ع القسم اما اني شغله تحت الخمسه وتسعين ان شاء الله هاي ولا بفكر فيها حتى تفكير لا سمح الله

وبالنسبه للعلوم العسكريه اان شفتها والله خفت من المقرر تبعها ما في لعب فيها بتخوف يعني

بس هلا بما انو الكل بياخدوها خلص امري لله

وكمان التفاضل والتكامل ( الكولكلاس ) هو يلي مربطني وشفت انو في اقسام بتاخد مقرر واحد في اقسام بتاخد مقررين وفي اقسام اكتر فانا بدي ابعد عنو قدر الامكان او اخد اقل قدر ممكن


يا ربي يسعدلي اياكي يا لموووره والله ما في منك تنتين

ميرسي بحجم السما والارض وكل شي

منوره يا غاليه