[حمساوية غزة]

ثوار ثوار .. ولآخر مدى ثوار
مطرح مانمشى يفتح النوّار
ننهض فى كل صباح بحلم جديد
ثوار نعيدك يا انتصار ونزيد
و طول ما إيد شعب العرب فى الإيد
الثوره قايمة و الكفاح دوّار

من أرضنا هل الإيمان و الدين
عيسى و محمد ثورتين خالدين
و العلم ثورة و من هنا قامت
و الفن و الحرية و التمدين
ثوار نهزك يا تاريخ تنطلق
نحكم عليك يا مستحيل تنخلق
نؤمر رحابك يا فضا تمتلئ
و الخطوة منا تسبق المواعيد


الشعب قام يسأل على حقوقه
و الثوره زى النبض فى عروقه
واللى النهارده يحققه و يرضاه
هوّ اللى بكره بهمته يفوقه
ثوار مع البطل اللى جابه القدر
رفعنا راسنا لفوق لما ظهر
بوسنا السما ويّاه و دوسنا الخطر
و العزم ثابت و العزيمة حديد


تعالوا يا أجيال يا رمز الأمل
من بعد جيلنا و احملوا ما حمل
وافتكروا فينا و اذكرونا بخير
مع كل غنوة من أغانى العمل

هيلا هيلا ثورتنا عمل و جهاد !
هيلا هيلا هبوا و اصنعوا الأمجاد !
هيلا هيلا و ابنوا فوق بُنا الأجداد
أول طريقنا بعيد ! .. و آخره بعيد !
و طول ما إيد شعب العرب فى الإيد
الثورة قايمة و الكفاح دوّار ! ...