[limar]

مرحبا للجميع

انشالله تكونو باحسن حال

راح احاول اكون خفيفة الطل

من الاول مشان ما تضحكو على طريقتي بالكتابة

والله ما بتدلع ولا بتأصد اكتب بلغتي العامية الي بحكي فيها بجميع حالاتي

هيك مرتاحة وبتمنى ما دايئكم بهالشي

صراحة انا بكره اكون جدية مع انو كل العالم آخدة عني هادا الانطباع

اول شي بدي اشكر ريا وسكينة حبيباتي

الله يخليلي ياهن

وتاني شي راح اعرف عن حالي ازا سمحتولي





اسمي الحقيقي : روان





انولدت ب 23/3/1986







يعني عمري 23 الا شهر ونص

ترتيبي بالعيلة التانية الي اخت اكبر مني ورح تتزوج عن قريب

احنا كلنا 8 مع ماما وبابا

4 بنات وشبين







اما دراستي فأنا معي : دبلوم تحاليل طبية وعم كمل بالجامعة الاردنية بيولوجي لكن حاليا وئفت الدراسة







اصلي من يافا حي المنشية







اهلي عاشو بسوريا بفترة من الفترات

اما انا عايشة بالأردن طول عمري









انا وصغيرة كنت ئردة مع احترامي للسامعين

اهلي كانو يحكولي مشان الله تهدي

ما بعرف شو صرلي فجأة

هديت وبطل يطلعلي صوت الا ما ندر

يمكن زروف الحياة تغيرت او اشيا صارت بحياتنا غيرتنا

حاليا بحب كتير اقرأ ئصص لجميع انواع الكتابات

وصراحة ما بهتم كتير للكاتب او حتى ما بحفز اسمو

او ما بهمني تكون الرواية معروفة او لا

بقرأ الي بيعجبني لو كان بنزر غيري تافه

المهم انا اكون مستمتعة

بحس بمتعة كبيرة صراحة

حتى احيانا لما ما بلائي شي اقرئو بدور على روايات بالنت

بحس انو ازا كنت متدائة برتاح وبئضي وئت

والغريب انو مع كل حبي للقرائة اكتر شي بكرهو هوة الدراسة

بكره اقرأ اشيا بدها تشغيل مخ كتير

والله يمكن تضحكو علي احيانا بحس مخي بيجعني ازا شغلتو زيادة

اهلي بيستغربو مني

كيف بترك كتب الدراسة وبروح لكتب تانية










صداقاتي محدودة مع انو كتير عالم حوالي بس مو كل الناس بتدخل مزاجي

بس كل الناس خير وبركة

تعاملي مع الاشخاص الي ما بعرفهم سطحي كتير

يعني كاشخاص بتعامل معهم لاول مرة

كتير بيحكو شايفة حالها حتى من قبل ما بيتعاملو معي

ما بعرف ليش شكلي بدل على هالشي

بس بالنسبة الي مو مسببلي مشكلة

اماا تعاملي مع الاشخاص القريبين بيختلف 180 درجة

يعني الي بشوفني مع صاحباتي واهلي ما بيحكي هاي روان الي بتكون ماشية بالشارع

خلص هادا طبغي

كتير ناس ئالولي كتا مفكرينك متكبرة بس طلعتي طيوبة

صراحة مو غرور بس حكي الناس ما بهمني من هالناحية






بكفي لليوم

الساعة 1.33 صباحا

بشوفكم بكرا ومنتابع

انشالله تكونو حبيتو البداية