[أســ{ــمــرآنــ}ــي]

إتفضلو أشربوا نسكافيه ، لساتها سخنة , هلأ اللي طلعتها من التلاجة .

خليني أكمل حكي , بلاش يضيعوا الكلمات من راسي،

بعد نجااحي بالتوجيهي , وبعد ما خلصت الحفلات والكناافه والمشاوي وما بعرف شو ,,
كاان النقااش محتدم بالبيت وين بدي أدرس ، وكل انسان يطرح رأيه ،
الموهم حكيت لأبوي بدي أساافر أدرس برا ،؟ كنت افكر ادرس الطب بألمانيا ،
هلأ بجد هديك الفتره كنت كتير ملخبط , ومش عااارف شو القراار الصح،
إنو أدرس برا فلسطين , ولا أدرس داخلها ،، ضليت بهاد الحاال ليوم أبوي حكالي
إسمع يا إبني , أطلع ع الأردن فتره أسبوع إتنين بتغر جو ,. وبعدها بتقرر وين تدرس ,
والله أنا ما كزبت خبر ,, بعد يومين حملت شنطة السفر ,, وطلعت للجسر عشان اروح ع الاردن ،
وهووون كانت المصيبة , ع الجسر الإسرائيلي ما سمحولي أغادر الضفة ، حاولت مرة وتنتين وتلات
عشان اسافر وكل مرة نفس النتيجة .
للأسف ما أتحقق حلمي بالدراسة برا فلسطين, لهيك أخترت جامعة بيرزيت ودرست فيها برمجة كمبيوتر،

الجامعة بتقع بالقرب من مدينة رام الله (( إسئلو اياد أكيد بيعرفها )), بس بالفتره الي سجلت فيها بالجامعة كان المشوار بين جنين ورام الله يقعد 5- 12 ساعة ، بسبب حواجز الاحتلال وتسكيرهم للطرق ,,

واجهت بالبدايه صعوبه كبيره بالتعود على جو الجامعة , والسكن بعيد عن أهلي،
خاصة إني كنت مدلل بالبيت، وما كنت أعتمد على حالي بشيء ، إزا كاسة شاي ما كنت أعرف أعملها ،

بأول شهر اللي بالجامعه كنت أتصل على أبوي وأصير أبكي وأحكيله بدي ماما هههههههه
لا بجد كانت لحظات صعبة جدا ، لقيت حالي بمفردي ، ولازم أعمل كل شيء بإيدي...
أصعب شيء بالبداية ما كنت أعرف شو بدي أطبخ ، أولا لاني ما بتقبل أي أكل ، تانيا ما بعرف أعمل شيء من الاكل ابدا ابدا , وأكل المطاعم ما كان يعجبني هئ هئ هئ كنت أنام بالجوع

لا كله يهووون قداام الغسيل , أول مرة بوقف فيها قداام الغسالة ، حطيت ملابسي فيها كلهم مع بعض
الأبيض والملون ,, وحطيت الماااي ومسحوق الغسل ،، وحكيتلها سيري على بركه الله ,,
والله لا يفرجيكم شو صااار . طلعو ملابسي بشكل تااني ، الأبيض عله بقع ألواان ، والي كان لونه أسود صار أبيض ,, شو بدي أحكي لأحكي ،، شيء عجيب وغريب اللي صار فيهم

ولما جليت أول مرة ,, كسرت صحون وكاسات ، كانو يضلو يسقطوا من إيدي ، ما بعرف ليش !! معقول لأني أهبل ؟

بس وين ؟ مع الأيام صرت أحسن من الشيف رمزي بالطبيخ ، وأحسن من نانسي عجرم بالغسيل ،
وبالشطف والجلي والمسح وما بعرف شو ، ست بيت أصيله ، صار شغلي مية مية