الســلآم عليكم ورحمة الله وبركـاته

:

:

للى حابب يعرف الموضوع بخصوص إيه باالظبط يتفضل هنا
http://www.shabab.ps/vb/showthread.php?t=98948

ويتابع الردود .. ،، والموضوع نقاش ورد على ردود عضو معين

ياللى بتقول انك مصرى
اشك انك مصرى
لأنو لهجتك مش مصرى ابداً.. او بمعنى اصح بتحاول تخلى لهجتك مصرى
بس غالب عليها لهجة اخرى
على كل حال مش موضوعنا !



بتحكى انك من المنوفية
المنوفية اكتر بلد فيها صراع
كل يوم عشرات المُعتقلين ..
كـلآم مؤكد بالوثائق روح شوف سجلات نيابة المنوفية
وإذا تم الاحتجاج من قبل الاهالى بيكون الرد بكل سبل القمع
ويُطلق على المواطنين لفظ ارهابيين .. ده غير لو شاب لحيته طويلة شوى
علطول على النيابة وتحقيق انه أرهابى او بمعنى اصح .. مُنتمى لجماعة الاخوان المحظورة
إيه اللى حظرها ؟؟!
لأنهم يحاولون تطبيق الاسلام !


وبتتكلم عن راس السلطة .. !
طيب قولى تعرف رأس السلطة عملت ايه فى المنوفية ؟؟!

لمعلوماتك ومعلومات المُتابع والزائر .. ، المنوفية بلد زراعى فى المقام الاول
والزراعة بطبيعة الحال بتعتمد على المياه ( للرى )
هل تنامى لمعلوماتك قرارات الحكومة الاخيرة فى المنوفية بخصخصة مياه الرى
بمعنى وجود فاتورة لأستخدام مياه الرى .. تكلفتها 4 الاف جنيه مصرى عن الفدان الواحد
وبما انك من المنوفية وأدرى بالوضع
هل يا ترى حال أهل المنوفية يسمح بدفع مبلغ كهذا عن كل فدان ؟؟!
ليه هما بيكسبوا كام اصلاً !

بخـلاف القمح وغيره .. بالتحديد القمح ،، بعد ما مصر كانت بتنتج القمح وتصدره لكل الدول
أصبحنا للأسف بنستورده !
ده غير الكهرباء .. احكيلى الكهرباء فى المنوفية بتيجى كام ساعة فى اليوم؟؟!
وازاى الحال فى مُستشفيات المنوفية .. ازاى بتقدر تتم اعمالها فى انقطاع الكهرباء ؟؟!
والميه ايه اخبارها ؟؟!
إحنا بلد النيل والسد العالى ،، اكبر همومنا مياه وكهرباء .. حسبى الله ونعم الوكيل

طبعاً كل الكلام المذكور اعلاه للتوضيح بس ياللى بتحكى عن رأس السلطة


طيب يا مصرى
انا شخصياً اعرف انو أهل المنوفية مُمتازين بالعلم ..
مُعظمهم يُجيدون الفصحى بطلاقة ،، ومنهم كتير أدباء وشعراء
عزيم >> تُكتب هكذا ( عظيم )
بخلاف كل الاخطاء الاملائية اللى وقعت فيها .. والاسلوب الركيك بالكتابة
مع العلم انك بتكتب .. مش بتتكلم وبس !

وبالنسبة لمُبارك .. وبما انى مصرية ،، فـأنا على خلافك بشوف انو فى كتير من الشعب المصرى
مبيحبش سياسة مُبارك ابداً .. وبسمع كتير دعوات عليه
دعوات من ناس بتقف فى طبور العيش الصبح بالساعات علشان تشترى رغيف العيش ، اللى فى الاخر بيطلع غير قابل للأستخدام الادمى .
دعوات من موظفين من افضل الموظفيين شركتهم اتخصخصت واترموا فى الشارع .. ومبقووش عارفين يعيشوا .. لأن الدخل انعدم
دعوات من ام بنتها ماتت نتيجة فيرس فى الكبد ناتج عن مواد مسرطنة موجودة بكل الخضروات >> حالياً المُبيدات الزراعية كلها مُسرطنة
ودعوات من اهل لأنهم واطفالهم الامراض هدتهم وطول الوقت مُلازمين للفراش لأن مفيش صرف صحى فى مدينتهم
دعوات من أسرة كل يوم بتروح تشترى المياه اللى بتشربها .. وفى الاخر بتكون مياه مش نضيفة
دعوات من شباب عاطل كان بيحلم بوظيفة بعد ما اتخرج من الجامعة علشان يلاقى نفسه فى الاخر
واقف فى طابور طويل ملهوش اول من اخر اسمه طابور البطالة
الناس ديه مبتدعييش عليه ، هو واللى معاه غير بعد ما بتلجئله ،، وتكتشف انها دقت باب غلط
لأن بأختصار بيكتشفوا انهم وللأسف عايشيين تحت رحمة شوية حرامية
حاميها حراميها !

انا شخصياً مبكرهش مُبارك .. بس مبحبووش
دايماً بدعى الله يهديه بس !
فقط لأنى مُسلمة قبل ان اكون مصرية ..

بالنسبة للوضع السياسى فى مصر .. فهو عجب العُجاب
طبعاً معروف اكبر كُتلتين الحزب الحاكم
والمُعارضة .. اللى بتتمثل بشكل كبير فى جماعة الاخوان المُسلمون ( الجماعة المحظورة)

لا والادهى بالنسبة للسؤال العادى فى مصر .. انت ايه اتجاهك السياسى ؟؟!
وطبعاً بيكون نهارك اسود من الحكومة لو كنت مع المُعارضة
نهارك كحل من المُعارضة لو كنت مع الحكومة
يومك مش فايت لو مكنتش مع حدا
:: عذراً ولكن هذا هو واقع الحال !


وبالنسبة لأخطاء مُبارك تعدت الملايين
مفيش حد ممكن ينكر انه كان فى يوم من الايام وطنى وسياسى بارع
ولاحد ممكن ينكر انه صاحب اول ضربة جوية فى حرب اكتوبر .. ولا .. ولا
عادى كلنا مُتفقين ..
لكن العبرة بالنهاية .. عمل ايه فى الاخر بوظ كل تاريخه للأسف
سواء داخلياً او خارجياً
سواء علاقته بشعبه او علاقته بالشعوب العربية !
احنا مُسلمين قبل ما نكون مصريين ،، الرابطة الاسلامية اللى بتجمعنا اقوى من الوطن !
وعنه صلى الله عليه وسلم ." من لم يهتم لأمر المُسلمين فليس منهم "
إلى متى نرضى بسياسة التطبيع !
الوضع اصبح لا يُطاق .. والبركة فى رأس السلطة

انا مبقولش انه يحارب .. ( للعلم ليك وللجميع )
انا شخصياً ضد تحريك حرب على أرض مصر ,, لأن ده هدف اساسى من اهداف الصهاينة
وللأسف الشعب المصرى حالياً غير مؤهل عسكرياً وفنياً لأى حرب
لأنها وبأختصار هتكون معركة غير مُتكافأة ونهايتها .. الفشل !
لكن لازم يكون فى تأهيل سياسى وعسكرى وفنى ..
لازم نعد انفسنا فقد قال تعالى ( وأعدوا لهم ما أستطتعتم من قوة ومن رباط الخيل تُرهبون به عدو الله وعدوكم ...)

ولكى اكون صادقة ،، انا لست مع إلقاء اللوم الكامل على الحكام سواء مُبارك او غيره فقط
صحيح هما اس البلاء والفساد
لكن احنا كمان كأفراد وكشعوب مقصرين
إحنا كمسلمين مقصرين مش بس مع الفلسطينيين ،، مقصريين مع اهل العراق واهل فلسطين والشيشان
وافغانستان واخيراً وليس اخراً مقصرون مع مسلمين الصين ،، والمسلمين فى كل مكان
تقدر تقولى انا او انت ولا غيرك ، إحنا بنعمل ايه ؟؟!
لازم نعمل حاجة بقى
لازم نغير من انفسنا لازم نتعلم وندرك الواقع ،، لازم يكون لنا بصمة بشكل او اخر
لازم نربى اولدنا صح
وتذكر قول الله تعالى ( إن الله لا يُغير ما بقوم حتى يُغيروا ما بأنفسهم )


طيب وانت فرحان انك اخدت تأجيل من الجيش
سبحان الله فى أمرك !

ولا كلمة من مُشاركتك ديه بالذات تنفع تمشى لهجة مصرية
ولامنوفى ولا شرقاوى ولا بحراوى ولا صعيدى ولا قاهراوى ولا اسكندرانى
ولا اى لهجة من اللهجات المصرية بالمرة
بغض النظر عن الحروف البايظة .. بس حتى لو بتتكلم بالعامية ملهاش اى علاقة
بتثبت كل شويه انك مش مصرى !
على كل حال ماعلينا !

وبعدين ياللى بتحكى عن اسم شهيد
والله من اروع الاسامى
الله ينولهلنا يارب ..

وبعدين حسنى مبارك مين ده اللى هيديه الشهادة
استغفرك يارب !


انا كمان مازلت اشك
بالنسبة للمنوفية .. بلد رائعة بس مش لأنها بلد الريس لأنها جزء من مصر
والريس هيروح وهيجى الف غيره
اما مصر بكل مكان فيها .. فهى باقية ان شاء الله تعالى

تانى شيئ متتكلمش بصيغة الجماعة .. لأن انا مصرية ولا اتفق مع اى كلمة من كلامك

تالت شيئ
اذا سمحت انت حاول تقرأ شويه فى الدين الاسلامى واسلوب الحوار
وممكن تتصل بدار الافتاء لو حابب اديك الرقم من مصر 107 علشان تسأل عن حُكم الحوار بين الرجل والمرأة
عن طريق الانترنت
وعلشان أسهل عليك هتكون الاجابة انه له ضوابط من ضمن الضوابط
اسمع قول رسول الله صلى الله عليه وسلم اولاً ( طلب العلم فريضة على كل مُسلم ومسلمة )
والحوار عن طريق النت مباح بل مرغوب طالما انو الهدف منه إظهار الحق وبيانه ودمغ الباطل وإبطاله
وطبعاً من اداب الحوار سواء بين الجنسين او الحوار بصفة عامة
عدم إستخدام الفاظ غير لائقة
وإذا راجعت الردود هتلاقى انك خرجت عن اداب الحوار
ومتنساش انو الكلمة الطيبة صدقة ومش من شيم المُسلمين رد الاهانة بإهانة
يعنى حتى لو افترضنا جدلاً انك بترد على حد بدء
مش صح اسلوب الحوار
وتذكر قول الله تعالى ( وإذا خاطبهم الجاهلون قالوا سلما)



وطبعاً الموضوع كله تعليقاً على ردك وتصحيحاً لوجهة نظرى الشخصية بما انى مصرية إذا تبادر اراء لزهن احد من الاعضاء بناءاً على كلامك
وعذراً لو كان ردى جاف بعض الشيئ !

إحترامى للجميع :)