منتديات شباب فلسطين - الجدة وحفيدها .... من الواقع الفسطيني

كعادتي ... دخلت حجرة جدتي المعمره لأقبل اياديها الطاهره
واتناول ابمعيتها قطعة من خبز الطابون بالزيت والزعتر البري
..اللي بتعملو إمي كل يوم الصبح.
ولكن هذا الصباح كان مختلفا" عن غيره.. فالخبز لم يكن طازجا" من الطابون ولا الزعتر بريا"،
وفوجئت برفض جدتي تناول افطارها.. واعتقدت حينها ان والدتي او احدا" من اهل البيت
ازعجها وهذا الرفض يدل على الاحتجاج .
سألت جدتي عن السبب
فقالت .. هذا الخبز والزعتر ... روح طعميه لمرتك واولادك..
صحتي غاليه عندي .. وين خبز الطابون
والزعتر البري ..
كون على ايدين إمك وبناتك نقش الحنه
مش قادرات يعجنن ويلقطن الزعتر من الجبل.
قلتلها يا جده علمك بالبلد قريه .. اليوم صارت مدينه.. والقمح اللي حصدناه من البيدر خلص ..
وهذا خبز من الطحين الامريكي الممتاز والزعتر مطحون على ماكنات حديثه ونظيفه.
قالت خذني على قد عقلي يا جده..
القمح اللي عندنا خلص .. طيب واللي عند الجيران؟؟؟
بتصدقي يا جده انوالبلد كلها مافيها شوال قمح واحد؟
بسم الله الرحمن الرحيم.. هي الناس صارت تعمل القمح سندويش ولا شو؟
يا جده لا ساندويش ولا شو.. الناس صارت تشتري طحين و خبز جاهز اليوم..
قالت جدتي يعني مفيش ارض ولا بذار ولا الناس قليلة حيل؟
لأ يا جده .. في ارض وفي بذار ..
بس الناس قليلة حيل زي ما بتحكي.. بدها كل شي على الجاهز بدون تعب..
يعني ياجده كون الناس مسترخصه الطحين الأمركاني ؟؟.. ويا مسترخص اللحم عند المرقه تندم.
لأ ياجده كل شي امركاني غالي واحنا بنشتغل ثلاثه في العيله ودخلنا كله رايح للأمركان ..
ليش يا جده .. هو انت وابوك واختك بتدفعوا الجزيه للأمركان؟
ياريت الجزيه يا جده... بندفع الجزيه وعشر المال ودم قلبنا... مش بس للأمركان ولأروبا كمان.
مين هاي اوروبا وشو بتبيع؟؟
حرام عليكي يا جده .. بتأخريني عن الدوام .. خليني اتسهل بلاش ينخصم علي اليوم.
ينخصم عليك اليوم للحكومه.. احسن متوخذه منك اوروبا عالبارد المستريح.
بصراحه يا جده احنا بطلنا نزرع ونفلح ولا نحصد..
ارتحتي هيك والا في عندك اشي ؟؟؟
اسمع ياجده.. انا محوشه اكمن عسمليه جوا مخده الصوف الحمرا .. بدي اعطيك اياهن بس على شرط
تقعد معي وتسليني هاليوم.. يعني انا شو بدي اخذ معي غير عملي لما اموت.
شو شو... شو بتقولي ياجده.. اكمن عسمليه.. وين .. في مخدة الصوف الحمرا..
آه ياجده.. في مخدة الصوف الحمرا.. قوم جيبها وخذهن حلال عليك وعلى ولادك.
لأ..لأ..لأ.. مش معقول.. امي اليوم وبعد اربعين سنه رايحه تتطلق من ابوي.
فال الله ولا فالك ياولد.. شو تتطلق هاي صبرت معاه على الحلوه والمره.. وين يرميها .
ياجده.. اللي بدري بدري .. واللي ما بدري بيقول كف عدس.
بعدين معاك يا ولد خلينا في القمح .. وين غيرت الموضوع على العدس.
يا جده .. إمي اعطت المخده للزبـــــــــــــــــــــــــال صدقه لـلــــــــــــــــــــــــه.
يقصف عمرها اذا هالحكي صحيح؟؟؟ بتستاهل طلق بين عيونها مش طلاق وبس.
إسمعي ياجده خليني الحق شغلي وبس ارجع بنكمل الحكي عن القمح.
انوشغل... قوم وديني على الحكيم.. انا صابتني جلطه على عملتها امك الله يسامحها..
يعني ما لقيت غير المخده الحمرا.. تعطيه الخضرا والمخدات زي الهم على القلب.
اوعى يا جده تجيب سيره لأبوك .. ترى انا عارفاه من قلة الشغل والطفر مش بس بيطلقها .. وبيفش غلو فييه يا جده.
أمري الى الله يا جده .. خليني انادي على إمي تحضرك ثوبك علشان نروح على الحكيم..
إمك.. ولا بدي اشوفها ولا لساني يناطق السانها على عملتها السودا.
قوم ناولني هالثوب ولبسني اياه يا جده الله يرضى عليك.
ولبست جدتي الثوب وتوكلنا على الله .. وراسها والف سيف غير تروح على الحكيم مشي..
والحكيم في آخر القريه... ابو كمال الحلاق... بداوي كل الامراض .
ومشت جدتي .. ايدها اليمين على العكازه وايدها الشمال على كتفي.. وامشي ولا تمشي
..وين لما اوصلنا ابو كمال.. صارت الدنيا قريب الظهر..
ومن يومن ما شافنا ابو كمال صار يرحب ويهلل ويصلي على النبي .. وماشاء الله ياحجه صدقيني
اللي بيشوفك بيقول عنك بنت عشرين سنه .. ومين هالختيار اللي بيتعكز عليكي..
جدتي نعنشت وقالت ارفع ايدك عني يا ولد .. خليني اسلم على سعدات ..
هلقيت اسمه صار سعدات ؟؟ مش ابو كمال.. تفضلي يا جده سلمي عليه.
وكيف حالك يا سعدات وكيف عيالك وصغارك..
كلهم بيبوسوا على ايدك يا انتصار.
يقصف عمرك .. زي ما إنت .. ما تغير فيك اشي.
بتعرفي لو ما جيتي اليوم عندي .. كنت ناوي بكره ازورك..
اهلا وسهلا .. بتشرف يا سعدات.. سدر البيت الك.. اذا ما وسعتك عيونا بنحطك في قلوبنا
خير اللهم اجعله خير.. يا سعدات
خير .. خير .. خير انشاءالله.. يا إنتصار
امبارح رحت عند واحد اسمه ابو محمد .. بتعرفيه.. مرته الجديده.. اللي اسمها نهايه ..
عشان اداويه .. وصارلو اكمن يوم في الفرشه..
ومش قادر يلقط نفسه..
والحمد لله اعطيته اللي فيه النصيب من هالعشبه ورجعت عفيته اصلح من الاول بس نصحته
يرتاح اكمن يوم حتى يتعافى كويس.
لا والله الف سلامه الو ابو محمد..مسكين الله يكون في عونه ..
عنده قطاطيم لحم من مرته الجديده
اللي اسمها نهايه.. انا خايف اتجيب نهايتو..
وين بشتغل ومين بيساعدو .. مهو كل خلفته بنات من الاولنيه اللي اسمها منتهى.
المهم يا انتصار .. اعطاني الك هالأمانه.. وبقيت بكره بدي ازورك واعطيك اياها..
حاكم هاي الامانه غاليه وما بقدر ابعثها مع اي واحد من جيل اليوم
... ربنا الله .. فيهم ناس كويسين..
خلص خليها معك وبكره بتيجي ونكسبك على الغداوبتجيبها معاك.
دخيلك يا انتصار انا ما سدقت وانا اشوفك .. الدنيا حياه من موت.. والامانه غاليه..
بعد اذنك يا بنيي..
بدي احكي مع جدتك على خلاوي.
آه ومالوا .. روح يا ولد غاد خليني اشوف سعدات شو بدو.
حاضر يا جده.
خذي هذي الصره من ابو محمد والله ما فتحتها ولا بعرف شو جواتها..
افتحها يا سعدات هو انت غريب؟؟
وقام ابو كمال فتح الصره .. وقلها هذه الصره فيها سبع عسمليات يا انتصار..
هو خبرها من هين .. واغمي عليها من هين.. وصار ينادي على ابن ابنها.. الحقني يا ولد..
هات الكلونيا والميه .. جدتك اغمي عليها..
واجا الولد يرمح .. شو اللي سويتوا فيها .. والله ان صارلها اشي ..لأوخذ روحك يا بو كمال.
يا بنيي والله ما مديت ايدي عليها ولا اعطيتها اي عشبه.
وصرت ارش عليها كلونيا .. وابو كمال بيقول شوي شوي.. خلصت القنيه يا ولد.
تخلص روحك.. خايف على القنيه ومش خايف على جدتي.
والله وربك حميد.. شوي وبلشت تصحصح.. وانا وابو كمال ندعي .. يارب يا الله .. يا كريم
وشوي.. الا هي قايمه زي الغزال.
وقالت وينك يا جده.. شايف مال الحلال..
انو مال يا جده وانو حلال.. احنا فيش وانت فيش.. كيف صحتك هلقيت.. طمنينا.
العسمليات يا جده.
هو انت لسه بتفكري فيهن .. مش رح تنسيهن.. راحن لصاحب النصيب.
يا جده انت صاحب النصيب..
ابو محمد الله يجزيه الخير ويعطيه الصحه ويقيمه سالم لولاده.. اعطاهن لابو كمال عشان يجيبهن الي.
معقول يا جده .. في ناس في هالأيام بيرجعوا اللي بيوخذوه.
أه يا جدي .. اللي تربى على خبز القمح والطابون والزعتر البري..
الخير بيضل جواه لما يموت.
خذ يابو كمال عسمليه حق قزازة الكلونيا .. وروح معنا خلينا نزور ابو محمد.
عسمليه بحالها يا جده.. كثير ..
لأ.. مش كثير على اصحاب الأمانه.
ومشينا على دار ابو محمد تصارت الدنيا قريب العصر.
واحنا ماشيين في الطريق .. بتقول جدتي لأبو كمال .. مش شايف الأرض مزروعه لا شعير ولا قمح
.. وين اصحابها .. قلها اصحابها بشتغلوا عند الخليج..
قالت جدتي انتوا بعدين معاكوا مره واحد بيقولي اوروبا والثاني الخليج ..
هي الاسامي الحلوه انقطعت
.. وين فاطمه ويوسف ومحمد ومريم ويامنه وعبدالله.. مالهن... مفيش احسن من بركتهن.
المهم اوصلنا دار ابو محمد الا الصياح معبي الدنيا ..
خير يا ناس .. شو في .
قالوا.. ابو محمد العمر الكم.
لا حول ولا قوة الا بالله العلي العظيم .. انا لله وانا اليه راجعون.. رحمة الله عليك يا بو محمد
كل من عليها فان.
وقالت جدتي .. يا بو كمال خذ هالعسمليه واعطيها لإم محمد .. انا مش قادره اشوفها بهالحاله.
وراح ابو كمال يودي العسمليه..
قلتلها يا جده فكرك بيوصل الامانه؟؟
قالت وبعدين معك يا ولد اللي اتأمن على سبع عسمليات بدو يخون الامانه.. والا انت ما فهمت
انو اللي تربى على خبز القمح والطابون عمره ما بيخون.
خلص يا جده حقك علي وهاي حلق في ذاني عمري ما بنساها.
طيب يا جده خذ هالخمس عسمليات .. بس قلي شو بدك تسوي فيهن؟؟؟
شو يا جده .. بتفكريني انسيت..
بدي اروح اشتري بذار قمح وابذرها .. علشان الخير والامانه تظل موجوده لولد الولد.
الله يرضى عليك يا جده..
شاطر .. شاطر
وشو بدك تقول لأروبا لما تشوفها..
بتخفش تزعل عليك هي والخليج؟؟
سؤالك صعب يا جده .. بدي اجعل حالي ما اسمعتوش.......
نقل عن الأستاذ : سمير الأحمد