الخشم الزعول ، ياسر التويجري

يامعديـت الأدب ويـن الأصــول
... ويامعتـقـت العـنـب مانشتهـيـه


لو نطـول الغصـن قلنـا ما نطـول
... ولـو نبـي سكـره قلنـا مانبـيـه


كـرم الله خشمـي الخشـم الزعـول
وبيض الله وجهي المبيـض .. أيـه


وأن سألنـي مـن تطفلـه العـذول
وقال لي : يامكبـر الهقـوات ليـه


قلت مابه شخص يشبهنـي واقـول
... يعطـي المحتـاج فـي كلتـا يديـه


انوجدنا فالزمـن !! حتـى نـزول
... والـدروب اثنيـن محمـود وكريـه


النهايـه شـي ما يعنـي الوصـول
... والوصـول بمجملـه ماهـو نزيـه


والصبـر ماهـو مفتـاح القـفـول
... دام ماللشخـص شــيٍ يحتـريـه


بين رفض العقـل الآخـر والقبـول
...عقل ثالـث مالـه اسـم إلا السفيـه


وإن بغينـا ناخـذ الدنيـا فـصـول
... الفصل بالضبـط مثـل اللـي ياليـه


ماقتنعـت بفلسفـه غيـر المـيـول
... كـل مـا مـال الخفـوق لمهتويـه


واحـدٍ يـروي معاطيـش الدحـول
... لاتفجـر واغـدق العـذب ارتويـه


عالـيٍ يبـدع بتكتـيـك الـنـزول
... كـل ماحـول يــدوس معانـديـه


مابخـل إلا ليـا ذكـر الـرسـول
... وهـو مسترخـي ولاصلـى عليـه


والحكم فـي مثـل هالحالـه يقـول
... يعـذر النائـم ويسقـط مـزدريـه


أستتبـت الفكـر واعلنـت العـدول
... عن قرار الطعـن فالـراي الوجيـه


لوعرفنـا نفتـح ابـواب العـقـول
... كان نعـرف نفتـح القـدس ونجيـه


شلت مدري !! بس شلت من الحمول
... واستمـريـت بعـذابـات المتـيـه


طاقتـي للحـزن تشبـه للكـحـول
... كـل ما افنـي كـاس ودي أبتـديـه


ليـت رجمـي ماتريـث بـالأفـول
... وليت رجمي طاع يسقط مـن عليـه


وليتني ماصرت حل مـن الحلـول
... كـل مـغـدي درب وده يهتـديـه


العصاء والخرج وخطـام الرحـول
... والطريـق وكـل ضلـمٍ يحتـويـه


علمـن صـدرٍ المسافـات الملـول
... كيف ضلعه كـل مـا انفـل يحنيـه


الهـدوء إحسـاس تقتلـه الطبـول
... والـفـراق الله يلـعـن والـديــه