|
كـيف تعرف الفلســطيني ؟
بيفهم في الطب وبيشخص المرض وبيوصفلك الدوا وبيفهم في الكهرباء وتصليح السيارات والطبخ والسياسة والقانون والواجب و الدين و الحسابات والكورة وهو أبيض ياورد . ها في احلام اليقضة تتوارثها الاجيال جيل بعد جيل* بيحط الريموت كونترول في كيس نايلون حتى ما يتغبر ولا يضيع ولا يتوسخ . * أكثر إنسان عنده عضلات قد ما ولاده أكلو منه قتل . * بس يقعد يتفرج على التلفزيون بيضل ينقل من محطة لمحطة كل دقيقة * بيوقف يتكلم على الباب نص ساعة بعد إنتهاء الزيارة والسلام . * في خزانة المطبخ عنده عشرين مرطبان مربى فاضي منشان اذا احتاج يستخدمها ومازال مُصِر على جمع المزيد. *ييجي بعد الموعد بساعة وربع دون ان يعتذر. * يتكلم بصوت عالي في المكالمة الدولية منشان التاني يسمعه . * بيعتبر حاله أفضل واحد في الشراء والمفاصلة ثم يكتشف إن الشي في المحل اللي جنبه أرخص من غير مفاصلة. * بيحتفظ بأكياس محلات اللبس والأحذية وورق الهدايا تحت فرشة التخت لسنوات . *عنده صينية مكسرات مقسمة لتلات او أربع أقسام منشان المزاج لكن لايستخدمها ابدا. *بيشتري قبل الإفطار في رمضان مواد استهلاكية متوفرة عنده في البيت . عنده منقل شوي للرحلات وسياخ طبعا ومولع فحم وعدة رحلة كاملة وخلافه موجودين بالسيارة كجزء أساسي من حياته الأسبوعية . * أول ما يشوف منظر طبيعي وزرع وخضار بصير يحكي بينه وبين حاله ( بدها هش ونش ) . * دايما ماشي بالسوق هو ومرته وإبنهم الصغير ( دايما بعيط ) والولد بحكي الجملة المشهورة ( بدي هــــاي ) مع تنهيده قوية تنم عن القتلة اللي باقي ماكلها من أبوه طبعا أكيد بوسط السوق وعلى مرأى من البشر. * بيتخانق ساعة دفع الحساب بحرارة شديدة على إنه هو اللي لازم يدفع. * بيفرش شرشف التخت على طقم الكنبايات منشان الكنباية ما تتوسخ، ولما يجوا الضيوف يترك الشرشف وما بشيله. * بيطفي سيجارتو بفنجان القهوة مع انو في منفضة على الطاولة . * دايما بدور على الاشي الكويس والرخيص وابن الناس وبموت في اشي اسمه " لقـــطة " * بفهم بالسياسة ورأيو دايما هو المزبوط وكل العالم خونة والقضية باعوها وقبضو حقها. * دائما يعيش ضمن الحلم ولا يقبل بان يخرج مما يحلم. * دايما عامل حاله أكثر واحد عنده كرامه في العالم. * دايما بوصي اولاده " اوعى الناس تضحك عليك ".. واكيد طول انهاره بذل اولاده وبقولهم شوف ابن فلان احسن منك وعامل مقارنة بينهم وجايب لولاده احباط. * بتفوت عنده في المطبخ راح تلاقي " تنكة زيت زيتون" , " نصية جبنة " , " تنكة زتون غير المراتبين اللي فيها زتون " بالاضافة للاعشاب هاي " زعتر نوعين عالاقل , ميرامية وبكون حاططهم في خيشه , انواع متفرقة من الاعشاب " لكي يمارس الطب فيها على البشر. * اكلاته المفضلة " قلاية البندورة" واكيد لازم يدعي انه مافي حدى بيعرف يعملها زيوو ودائما بيفتخر فيها وبيفتخر في قرنين الفلفل اللي بيحطهم عليها وبضل يحكي عنهم قديش بيحرقو وتعتبر من الاكلات اللي بتناسب جميع الأوقات وكل الاماكن يعني ممكن يفطر او يتعشى او يتغدى عليها كلو بصير مع قلاية البندورة لامستحيل ابدا, طبعا بالاضافة للاكلات الاخرى زي المجدرة , شوربة العدس وطبعا بيحاول يفهم اولاده دايما على السفرة قديش هي مفيدة واذا واحد رد عليه وقلو اللحمة يابه كمان مفيده بظربه قتله وبقوله قوم عن السفرة على اساس انه طارده من على سدر منسف واكيد اخوانه بصيرو يطلعو عليه وبستجريش حدا يحكي مرة ثانية على الاكل انو مش زاكي. * "قتلة الاولاد ماقبل النوم" هي بمثابة قصة ماقبل النوم عند الشعوب الاخرى لان القتل قبل النوم هو اسهل وسيلة فعالة للنوم السريع علشان هيك بس يكبرو اولاده بتمسحو وببطلو يحسو بالقتل اللي بوكلوه وطبعا لازم هو ومرتو يفتخرو قدام الناس ويحكو عن القتلة اللي الاب طعماها لابنو والمصيب انو الابن بكون بسمع ومبسوط انهم بحكو عنو . * كل مايشوف محل شغال كويس بصير يحسب للمحل قديش بطلع في الشهر واكيد تراوده " في احلام اليقضه " فكرة انو بدو يفتح محل وبدو يعمل مشروع كل ماشاف واحد صار معاه شوية مصاري وبضل طول عمره يحلم ويفكر قي هالاشي ولاكن تبقي كل |
رد: كيف تميز الفلسطيني عن غيره ؟؟؟؟؟؟؟
يعني موضوع من الاخر جد بس ظلمتيهم في منووو الحكي يسلموووو يا عسل ^^ |
رد: كيف تميز الفلسطيني عن غيره ؟؟؟؟؟؟؟
إيه ، كإنو في مبالغة بالموضوع :) ممكن هل صفات تنوجد بالغير فلسطيني .. الناس مختلفة عن بعضها :) :: ع العموم شكرا ع الموضوع حبيبتي منوريتنـآ :) |
رد: كيف تميز الفلسطيني عن غيره ؟؟؟؟؟؟؟
ههه مش لهالدرجة .. ^^ أحسن نآس الفلسطينية .. مآ شآء الله عليهم بينضرب فيهم المثــــل :) .. شكرآ ـع الموضوع .. |
رد: كيف تميز الفلسطيني عن غيره ؟؟؟؟؟؟؟
يا الله موضوعك شو حلو وبيشيل الغصه من القلب ما تتصوري قديش ضحكت
وتقهقهت خفت يقولوا يلي بالبيت عني شيء كلامك صحيح ومظبوط انت قديش عمرك 60 سنه حتى مارق معك كل هالشي يسلمو دياتك على هالضحك حبيبتي |
رد: كيف تميز الفلسطيني عن غيره ؟؟؟؟؟؟؟
ممم نوعآ مآ في مبآلغة ^*
يعطيكِ الف عافية يارب :) |
رد: كـيف تعرف الفلســطيني ؟
هههههههه
في من بعضهآ والله يسلمو يا الغالية :) ربي يعطيك الف عآفية =) |
رد: كـيف تعرف الفلســطيني ؟
يا امير الظلام هي حكت هيك بس لانو مزح ما قصدها الكل هون فلسطيني واحنا فلسطينه وما بنرضى حد يحكي علينا كلامة اصلا ما حد بطلعلو يحكي علينا هدي اعصابك انت والله الصبايا ما في منهم وفلسطينيات اصيلات |
رد: كـيف تعرف الفلســطيني ؟
اقتباس:
اولا يا محترم .. البنت بتحكي بمجرد الفكاهة .. والمزاح .. ثانياً : والله كل الصفات اللي كتبتها عن الفلسطينين (اللي هم برأيك تجاوزت الحد فيها) .. والله صفات بتضلها منيحة وكويسة جنب الصفة الي حضرتك بتتصف فيها .. وهي قلة الاحترام وعدم معرفة اختيار الكلام المناسب في حق المشاعر الإنسانية معقول هاي اخلاق الفلسطينية؟ اوك فيها مبالغة بالموضوع بس ما قربت جنب الشرف والكرامة .. عادي امور بتصير مع كل الناس .. ما بدها هلقد شتم وتكبير كلام .. كل واحد حر برأيه .. احترم غيرك .. ام الحسن امي يا محترم !! |
رد: كـيف تعرف الفلســطيني ؟
اقتباس:
يا حج انتا اهنت البنات واهنت الموقع واهنت الفلسطينية ليش يعني شو عاملينلك عشان تتهجم عليهم هيك؟ وانتا بصفتك شو جاي ترد ع الموضوع وتنتقد الاعضاء وتعلق ع الردود اه؟ يا زلمة لو انك زلمة بكون حكيك ع قد عقلك مش تروح ترمي الحكي وما تسألأ عن حدا انتا الي تعرضت الهن بناتنا وخواتنا ولو انك زلمة ما بتتهجم ع الفلسطينيين هيك وبتهين صاحبة الموضوع وباقي الاعضاء يا زلمة استحي ع حالك وبعدين انو انتا عشان تقول عنها مدسوسة بينا؟ ليش بتعرفها ولا بتعرفك ولا ابوها وانا مش داري؟ |
رد: كـيف تعرف الفلســطيني ؟
اقتباس:
كإنك عارف انو في شي غلط بردك وانو رح يتم حذفه :) وين شايف الدفاع عن الوطن واولاده ، وانت عم تتهجم وتهين بنت بلدك بألفاظ بشعة ؟ صرخة فلسطين ما أهانتك ، ولا جابت سيرة الكرامة والشرف .. ليش يعني الفلسطينية يلي دخلوا وردوا ع الموضوع ، ما ردوا بنفس طريقة ردك وأخدوا الموضوع من جانب تاني .. كموضوع فكاهي لا غير ! معناها انهم بدون " شرف وكرامة " ؟ :: يا أخ أمير الظلام الشي يلي حكيته ممكن انت شايفه صح وهل شي بيرجع الك ! لكن بالنسبة النا .. خطأ ، وخطأ كبير كمان ! كون على يقين .. بانو منتديات شباب فلسطين ما بتقبل بالإهانة لأي شخص كان بالمنتدى وهل شي ما بنرضاه أبداً .. ممكن تعتبر هل كلام تحذير الك .. وإن تكرر هل شي ، حيكون في كلام تاني :) |
رد: كـيف تعرف الفلســطيني ؟
لآ حول ولا قوة الا بالله ! يعني عنجد عيب .. :icon9: |
رد: كـيف تعرف الفلســطيني ؟
(حياة الروح) هع هع موضوع ما بضحك ليش يتضحكي والموضوع ما في 1 في المئة كلام صحيح الضحك بدون سبب قلة ادب
أخي هادي مالها قلة أدب ثاني شي هاد موضوع فكآهي ثالث شي ليش انت متعصب للموضوع ممكن الفلسطينيين منهم يكونوا بهالصفآت وممكن لا لان مو كل العقول وحدة .. وبصراحة وبما انك فلسطيني ما الك الحق ترد بهذه الطريقة وصرخة فلسطين اعتبرته موضوع فكاهي وما عليها غلط ..! بالعكس هي مشكورة كل الشكر |
رد: كـيف تعرف الفلســطيني ؟
اعزائي الشباب والصبايا في المنتدى السلام عليكم
شو صار معكو هالقد عصب يلي عصب وقامت القيامه يا ترى كل الكلام مزح بمزح مجرد فكاهه ليش لا سمح الله حدا قرب على الكرامه ولا على الشرف هو مش وطني اكتر مني فلسطين بدمنا قبل قلبنا انا ملسطينيه وتقبلتها على انها نكته بس كل واحد حر بأرائه يا ابني واحتم اراء الغير عشان يحترموا أرائك |
رد: كـيف تعرف الفلســطيني ؟
هههههههههه
هم الفلسطينيين فعلا هيك؟ نتمنى المرة الجاية تجيبيلنا الصفات الايجابية يا عسل. مشكووووووووورة. |
رد: كـيف تعرف الفلســطيني ؟
هههههههه
في من بعضهآ والله يسلمو يا الغالية :) ربي يعطيك الف عآفية |
رد: كـيف تعرف الفلســطيني ؟
ههههه طريقة اسهل اللي بمشي وراسه مرفوع ما بعرف ذل ولا خضوع اللي دمه فداء لوطنه وامته ... اللي شرفه ما بنباع فخور بأصله واهله.... ارضه هي عرضه اغلى من دمه كل البنات تتمناه وكل الاعداء تهابه وتخشاه سلاحه هو الحجر وامله ما بنكسر كرامته ابدا ما تنداس وهو اعز الناس هاذ هو ابن فلسطين |
رد: كـيف تعرف الفلســطيني ؟
يعطيكي العافية على الموضوع
أكيد كل واحد الو رأيه بس انا شايفة انو الكلام مش تمام فية كتير مبالغة وحتى الكلام مش حلو بحق الفلسطينية أكيد مش كلنا واحد بس مو لهاي الدرجة ::ShababSmile116::ShababSmile116: |
رد: كـيف تعرف الفلســطيني ؟
هو صحيح مبالغ فيه كتير اصلا نحنا فلسطينيه مو لازم نكتب عن حالنا شي متل هيك
بس بردو موضوع حلو وبيضحك |
رد: كـيف تعرف الفلســطيني ؟
ممممم موضوع نايس بس بضل الفلسطيني رافع الراس
|
رد: كـيف تعرف الفلســطيني ؟
روئوا ايش مالكم كلكم هجمتوا علبنت عادي الشي بمزح يعني بس نغيير جو مهياتهم الحماصنه ما خلوش عليهم وما أشتكوش من شي ويلا الخلايله مساكين كل يوم بنكته عادي كلو مزح يعني بصراحه يا ريت أي حد معارض يحكي بطريئه حلوه بضل في زوء بالحكي سدئوني بتكبروا بعينين بعض أكتر
|
رد: كـيف تعرف الفلســطيني ؟
صح لسانك:ShababSmile236:
|
رد: كـيف تعرف الفلســطيني ؟
هههههههههههههههههههههههه بالوجع. * بيطفي سيجارتو بفنجان القهوة مع انو في منفضة على الطاولة . |
رد: كـيف تعرف الفلســطيني ؟
بفهم بالسياسة ورأيو دايما هو المزبوط وكل العالم خونة والقضية باعوها وقبضو حقها.
انا بظن انو هاي من كل الكلام صح لانو فعلا باعوا الفضيه ومن زمان هو فاهم سياسية لانو بتغدها وبتعشها وبفطرها وجبه اساسيه يعني بس انو راي صح ممكن الكل بظن انا هو على صواب مو بس هوووووووو يعني ممكن انتي انا الكل شكرا ع الموضوع |
| الساعة الآن 06:31 AM. |
Powered by vBulletin® Version 3.8.4
Copyright ©2000 - 2026, Jelsoft Enterprises Ltd.
new notificatio by 9adq_ala7sas