ليلة القبض على شاعر الجندول

[فلسطيني من الناصرة]

ليلة القبض على شاعر الجندول
http://www.odabasham.net/images/kamalyounes0307.JPG
د. كمال يونس

Kamalyounes_55@yahoo.com (غارة جوية..صوت انفجارات وقصف شديد..مع إضاءة مناسبة..يفتح الستار على قبر يرقد فيه الشاعر..الإضاءة خافتة ..تزداد تدريجيا..يظهر ثلاثة شباب ..شاِِب1،2، فتاة..يجرى كل منهم فى إتجاه..وهم فى حالة من الهلع.. يجلس كل منهم بعيدا عن الآخر..يتردد صوت الشاعر بصدى هائل مناديا..أخى..أخى..أخى..ينتبه الشباب..ويبحثون عن مصدر الصوت..يقف الشاعر وسط دائرة ضوئية..يلتفون حوله ..وتبدأ الأحداث مع استخدام قصيدة فلسطين.. من غناء الموسيقار محمد عبد الوهاب.. لتحل محل كلام الشاعر في عدة مواضع مناسبة )
شاب1 : وربنا عارف و شايف..واللى مايشوفش م الغربال يبقى أعمى..ما هو كله على عينك يا تاجر..وعلى وشك يبان يانضاغ اللبان.
شاب 2 : ليه يا جدعان تقليب المواجع..دى نار قايدة فى جسمى .
الفتاة : دماغي..دماغي يا عالم..دماغى يا هووه..كابوس مزعج..هو أنا صاحية ولا نايمة..حد يقوللى.
شاب1 : كل ظالم وله نهاية..ولو دامت لغيره..ماكنتش وصلت ليه .
شاب 2 : الظلم الحقيقي يا إخوانا..هو ظلم الإنسان لنفسه .
شاب1 : يعنى إذا المرء هان على نفسه..كان على غيره أهونا .
العدو : قشة فى مهب الريح..لا يملك فعل..ولا رد فعل .
الفتاة : ( تغنى ) أنا وأنتم ريشة ف هوا..طايرة من غير جناحين إحنا النهاردة سوا..وبكرة هنكون فين ف الدنيا..ف الدنيا
الشاعر : أخي جاوز الظالمون المدى .
شاب 2 : المدى شئ نسبى..بيختلف من واحد للتانى .
شاب1 : القادر مداه غير العاجز..وكل برغوت على قد دمه.
الفتاة : (ساخرة ) ده إذا كان لسه عنده دم .
الشاعر : أخي جاوز الظالمون المدى..فحق الجهاد وحق الفدا.
شاب 2 : هس..وطى صوتك..عدى يا ليلة..عدى ياليلة..ماقلش حاجة..اللهم اجعل كلامنا..خفيف ع البعدة .
شاب1 : جهاد!!..جهاد إيه؟! .
الفتاة : دا كلام أولد فاشون..راحت عليه .
شاب 2 : باينها ليلة مش فايتة..قصدى مش فاشون.
شاب1 : يللا..إحنا ورانا إيه..أهى كلها ليالى ليلاء .
( ويدخل المسحراتى ويغنى.. ويتخلل غناءه صوت الطبلة)
أنا اللى شايل روحى على كفى وضربة واحدة ع الراس تكفى
والأيام فضاحة بتظهر ولا تخفى
ما كان وهيكون من ولاد العم سام مكايد يوم ورا يوم وعام ورا عام
وياما دقت على راسى طبلات
فلسطين شفطوها والعراق لهطوها حوالينا ضلمة خانقة وتوهة
عجز وقلة حيلة وليالى عليه طويلة وشخيركم حفر ف ودنى مطبات
بيب بيب يا أهلى وكلامى عن علم مش لجهلى
وكبدى أنا المهرى وأحوالى شقلباظات
من كتر صحيانى وفنجلة عينى طرطقت ودانى
طناشكو بكانى ومنكو آه يا نى والعاقبة فيتوهات
مسحراتى عربى قطاع عام وحبك ياعروبة ف قلبى هام
وبأقول ماعندى لأخويا وولدى والمحبة فعل مش كتر كلام
اصحى يا نايم ..يانايم اصحى
الشاعر : فحق الجهاد وحق الفدا
شاب1 : ( مقاطعاً ) أبوس ايدك..خف شوية..ليعتبروك إرهابي .
الفتاة : أمريكا لها عينين وودان .
شاب 2 : اخفض صوتك..لا..اكتم صوتك يا أخي..إحنا فى عهد البوشية .
الفتاة : ايه.ايه..البوشية .
شاب1 : دى حاجة ذي ما تقولي كده حقد دفين..مع شوية نازية و تترية .
شاب 2 : ( يشير بيديه ) استنجالينا وارد البيت الأبيض .
الفتاة : ياخوفى ليسمعوك فى السى..آى..( تضرب على يديها ) أاه .
شاب 2 : آي..آى.( صوت صفعة قفا..ثم يضع شاب 2 يده على قفاه )
الفتاة : إيه .
شاب1 : ومن غير ليه .
الفتاة : هتودى نفسك جوانتانامو .
شاب1 : لا وأنتى الصادقة أبو غريب..مش هيعجزوا .
العدو : عارف بيتعمل إيه فى اللى بيدخلهم .
الشاعر : أنتركهم يغصبون العروبة
شاب1 : العروبة .
شاب 2 : العروبة .
الفتاة : العروبة..( تغنى الفتاة ويردد وراءها شاب 2 ، وشاب1 )
حسرة عليها حسرة عليها..ماجت رجليها ماجت رجليها..ماجت رجليها
شاب1 : ما إحنا سبناهم..واللى كان كان .
شاب 2 : ( يتحسس قفاه ) ونازلين ضرب..وطرقعة على القفا .
العدو : وعملنا عليهم كماشة .
شاب1 : الأمريكان عينهم على البترول..يعنى دول الخليج العربي .
شاب 2 : وإنجلترا وفرنسا عينهم على بلاد الشام .
الفتاة : سوريا..هينهشوها..يعنى لما ضربوها قبل كده..كنا عملنا إيه .
شاب 2 : ولبنان فى البلاك لست..القايمة السودا .
شاب1 : والاتحاد الأوروبي طمعان فى دول الشمال الأفريقي..يعنى سايكس بيكو موديل الألفية الجديدة .
العدو : نيو لوك .
( تغنى الفتاة .. ويردد شاب 1،شاب 2معها )
( أغنية الدور) شيخ محضر ياشيخ محضر ويا عينى م اللى بيحصل
شيخ محضر ياشيخ محضر ويا خوفى م اللى هيحصل
والدور الدور الدور الدور ياخوفى يللى عليكى الدور
والدور الدور الدور الدور فيتو أمريكى وع البدروم
والدور الدور الدور الدور فوقوا ليييجى عليكو الدور
والدور الدور الدور الدور
شاب 2 : يعنى من المحيط للخليج .. وحطوا الشرق الأوسط كله فى خانة اليك.
شاب1 : وزرعوا إسرائيل شوكة فى ضهرنا..وعينهم على حلمهم القديم.
العدو : من الفرات للنيل ..وعد لازم نحققهلهم.
شاب 2 : ياخوفى عليكى يا مصر..شغالينلك على نار هادية..مية النيل من الجنوب.. وإشى إرهاب..وإشى فتن طائفية .
الفتاة : لازم نفوق..كله إلا مصر .
وتغنى والجميع ( أغنية بحبك يا مصر )
باحبك باحبك باحبك يا مصر
باحبك يا مصر يا لبن حليب باحبك يا مصر ياهلال وصليب
والمحبة عنك شمس لاتغيب باحبك باحبك باحبك يا مصر
***
يا أحمد يا حنا يا كل لبيب شبكوا ايديكو ولا فرصة لغريب
مصر أمانة والمولى رقيب باحبك باحبك باحبك يا مصر
***
باحبك يا مصر يا عسلية من شمسك سمارى ولون عينيه
باحبك يا مصر يا عسلية من شمسك سمار فاطمة ومارية
وأنتي ف قلبي أغلى ما ليه باحبك باحبك باحبك يا مصر
***
باحبك يا مصر يا عود ريحان نيلك م الجنة نهر الريان
يا أم الحضارة ونبع الحنان باحبك باحبك باحبك يا مصر
الشاعر : أنتركهم يغصبون العروبة
شاب1 : مابقاش فى العروبة شىء يغتصب..بعد ما جزأوا المقسم..وفتتوا المجزأ .
العدو : ومش ناقص غير( ينفخ فى يده ) هوف ف ف .
الفتاة : والعجب همه يتحدوا..وإحنا نتفرق..همه يعملوا اليورو..وإحنا يقولولناغوروا
(ويغنون) همه يعملوا اليورو وإحنا يقولولنا غوروا
مالنا يا ناس ف بنوكهم يتبغددوا ونهونو
قرش العرب متسلسل تقولش عليه دلدولو
وبين دولار ويورو العربى ياعينى مطحونو
همه يعملوا اليورو وإحنا يقولولنا غوروا
***
غولة طايحة وغولو نهبوا مالك وما هولو
كلاب طايحة ولولو ينهشوا لحمنا مفرومو
يادم اجرى ف عروقنا ونكونوا أو لا نكونوا
شاب 2 : دا غير الفتن..والمشاكل بين البلاد وبعضها .
العدو : نعمل إيه..استنجدوا بينا لجل ما نحميهم من بعض .
شاب1 : والنتيجة بلد تلتينها قواعد عسكرية..والتانية احتلوها وفتتتوها .
الفتاة : والسودان قطعوه.. شمال وجنوب..شرق وغرب.
شاب 2 : ولا العملا اللى بيتكلموا بره..قال إيه..بإسمنا .
العدو : فرق..تسد..إحنا بنعمل للخريطة نيو لوك .
شاب1 : دا غير الفساد اللى..عمال ينخر فى جتة بلادنا زى السوس .
شاب 2 : والتشكيك فى بعض..وبدل مانستغل هامش حرية الكلمة صح..بنهد بيه.. أكتر ما بنبنى .
شاب1 : إيه المانع إننا نقعد مع كلنا..نتكلم ونسمع بعض..والرأى الصح يمشى على الكل.
العدو : ( مخاطبا الجمهور ) مابيعرفوش يسمعوا بعض كويس..الكل بيزعق فى وقت واحد..big mouth..فنجرية بق..زى مابتقولوا.
الفتاة : الحرية مسئولية ياعالم..مش فوضى .
الشاعر : أنتركهم يغصبون العروبة..مجد الأبوة والسؤددا
الفتاة : مجد الأبوة والسؤددا..عليه العوض..ومنه العوض .
شاب1 : ( يغنى ) ودع هواك وأنساه وأنسانى..عمر اللى راح ماهيرجع تانى كان حلم وراح..إنساه وارتاح..ودع هواك ودع .
الفتاة : فين صلاح الدين..فين قطز..فين الجندى المصرى اللى عبر فى ..73فين المقاوم اللبناني اللى حرر أرضه .
شاب 2 : الحل إيه..الحل إيه .
شاب 2 والفتاة وشاب1 : ( يصرخون ) الحل إيه..الحل إيه .
الشاعر : وليسوا بغير صليل السيوف يجيبون صوتا لنا أو صدى
الفتاة : كده يبقى حطيت إيدك على الجرح .
العدو : اللى ماسك المسدس..يفرض قانونه.
شاب 2: آه فهمت..بالرغم من إننا متخصصين فى الجهاد الحنجورى..والفضائيات دوشة على الفاضى..وعلى المليان .
الفتاة : ماحدش بيسأل فينا..ما هى أمريكا واخدة الأمم المتحدة..إيجار قديم .
شاب 2: على رأيك..وأهى بتبشرق على دلوعتها ومحاسيبها .
العدو : اضرب المربوط يخاف السايب .
شاب1 : والسيوف أكلها الصدى..دا إحنا حتى بنستوردها منهم .
العدو : إحنا مابنستخدمش قوتنا..أد مابنوظف غباء اللى يعاديناونعاديه .
الشاعر: فجرد حسامك من غمده فليس له بعد أن يغمدا
شاب1 : الكلام ده نهايته خابور من الخوابير سابقة التجهيز .
العدو : كاجوال..اول سايز..تنفع للكل .
الفتاة : بعد ما بوش بوش الأنظمة العربية..البال..وال..بكام..وفرض علينا..
السى خام..وصايته .
شاب1 : وسفيره بقى مندوب سامي .
الفتاة : وإيه اللى خلاك تبوش يا بوش..ما لقاش راجل يقف قصاده .
شاب 2 : هو دا الواقع..علجم والله علجم..رامسفيلد..رامسفيلد .
الفتاة : أبو الوفا..أبو الوفا .
( ويغنون )
جوللى ولا تخبيش يازين..كل دا مستخبى فين
جوللى ولاتخشاشى ملام..طناش هادا ولا نقص علام
جوللى ولا تعرف الخوف..وحط النقط ع الحروف
الشاعر: أخي أيها العربي الأبي .
شاب1 : العربي الأبى..فيها كلام..بتوع الفرعونية والكلدانية..والآشورية..
والبابلية..والفينيقية والأمازيغية.
الفتاة : وغيرهم وغيرهم من البغبغانات.. الكلامنجية.
شاب 2: اللى عاملين زى السوس..يقوموا عليك الدنيا.
شاب 1: حاكم.. صوتهم عالى قوى .. اليومين دول..بيخطرفوا عمال على بطال .
شاب 2 : لكن هندلك على العربى الأبى..هو كل عربى بيقاوم لجل مايسترد أرضه..
من غير ما يقتل أهله وناسه..ولا يرهبهم .
الفتاة : أو بيعارض وهو جوه بلده..وما بيستقواش بعدونا..ومصلحة الوطن عنده
فوق كل إعتبار.
الشاعر : أخي أيها العربى الأبي.
العدو : أنهى عربى تقصده بالظبط .
شاب1 : آه تقصد عرب عاربة..ولاعرب مستعربة .
شاب 2: ولا عرب الأرقام..زى عرب 48 .
الفتاة : ولاالعرب الأصلية..ولا العرب التايوانى .
شاب 2 : دا غير عرب الحناجر .
الفتاة : ( ساخرة ) اللى همه عرب الشات..وعرب سد الحنك .
الشاعر : أخي أيها العربى الأبي أرى اليوم موعدنا لا الغدا
شاب 2 : موعدنا..موعد إيه..وماحدش بياخد بكلامى..يعنى لما يكون لكلامي قيمة..
كل الدنيا هتعمللي حساب .
العدو : الديمقراطية عندنا نظام حياة..بنحرص ونحافظ عليه..وممنوع حد يمسه .
الفتاة : أبعبع وأجعجع ..لا أكتر و لا أقل..وبيسموها ديمقراطية..( تغنى )
اطبطب وأبعبع..يا يقوللى أنا اتغيرت عليه .
شاب1 : ديمقراطية الفايظ..اللى بياخد الميه الزايدة بتاعة الخزان..لما تبوظ العوامة ويتملى أكتر من طاقته .
شاب 2: يعنى بيسبونا ننفس .
الفتاة : ودي اسمها..ديمقراطية..الفس..فس .
شاب1 : وقال إيه..بوش غير مناهج الديمقراطية..وهيطبقها علينا بالعافية .
شاب 2 : أصل إحنا يا ولداه صعبنا عليه .
العدو : علشان تعرفوا حنية قلبنا.
الفتاة : حنية الديابة .
شاب 2 : أى والله..كدا هوه..فتونة ..بلطجة..واللى مش عاجبه..هيبلعه .
شاب1 : ويلا خليه يتعلم .
شاب 2 : هيصدر لينا ديمقراطية..والمقاومة هتورد له جتت عساكره .
الفتاة : مع إن اللى أتلسع من فيتنام..لابد ينفخ فى العراق..دى اتفاقية اسمها الجات.
شاب1 :اللى " جات مات .. والجايات أكتر من الرايحات .
الفتاة : الله الغنى عن دى ديمقراطية..بيقتلوا بإسمها عينى عينك..ياديمقراطية منا
فينا يا إما بلاش.
الشاعر : أخي أقبل الشرق فى أمة ترد الضلال وتحيى الهدى
شاب 2: دا لما كان الشرق فايق لنفسه..ومالك قراره..وثرواته..وإرادته .
الفتاة : وكان صف واحد..وإيد واحدة..وقلب واحد..وروح واحدة.
شاب1 : البترول حطوا ايديهم عليه..بالبلطجة السياسية.
العدو :الطاقة شغلنا الشاغل..وأهى عندكم عملتوا بيها إيه..؟! حتى القمح بندوهولكم معونة.
الفتاة : والمصانع بتعبي اللى بيبعتوه.
شاب 2: والمحلات بتبيع اللى هم بيصنعوه.
العدو : واللي يرفع رأسه..ولا حتى يفكر يقول لأ..يقطعوا عنه المعونة..والمنح..
والقروض..والتكنولوجيا..واطعم الفم تستحى العين..ولا نخزأها..واللى مش محتاج نعرف ازاى نحوجه لينا.
شاب 1: ما هو اللى يأكل من حلة جاره.. يستاهل اللى يجراله.
شاب 2: يعنى المعونة الأول..ولا الإرادة .
الفتاة : المعونة ولا الإرادة..الإرادة ولا المعونة.
(تتبادل الفتاة وشاب 2 الا ستفهام )
شاب1 : مربط الفرس..هو العلم والعمل..والانتاج..علشان ما نمدش ايدينا وساعتها تتحرر الارادة.
العدو : take it easy..take it easy (مخاطبا الجمهور ) ..ومسا التماسى يا مسا التماسى..يا ورد قاعد على الكراسى.
الشاعر : أخي إن فى القدس أختا لنا أعد لها الذابحون المدى
شاب1 : والجدار العازل..والسلاح النووي .
شاب 2 : والإبادة الجماعية .
الفتاة : والتشريد..وهد البيوت..وقلع شجر الزيتون..وتجريف الأرض..والحصار.
الشاعر : صبرنا على غدرهم قادرين وكنا لهم قدراً مرصدا
طلعنا عليهم طلوع المنون فصاروا هباء , وصاروا سدى
شاب 2 : صبرنا صبر العاجز .
الفتاة : واللي ما صبرش بيقاوم على قد جهده..المقاومة اللى لولاها ومن غيرها.. قول على الأمة يا رحمن يا رحيم .
شاب1 : إحنا ولحين إشعار أخر..ما قدمناش غير أفعال الاستكانة..شجب..أدان.. استنكر..استكان..هان..ودى أفعال بتجزم الفعل .
العدو : يعنى بتدوسه بالجزمة..بالشوز يعنى .
شاب 2 : وبتمسخر..كل من الفاعل والمفعول .
الفتاة : والجار والمجرور.
شاب1 : والمضاف والمضاف إليه .
شاب 2 : وبترفع المبتدأ من الخدمة..وبتنصب على الخبر .
الفتاة : لأنها حال منيل بستين نيلة .
شاب 2 : ومن العجب..إنهم مختلفين..دى مقاومة..ولا إرهاب .
شاب1 : وقال إيه..بيفتوا فى مدى شرعيتها..وبيلاقوا اللى بيفتى لهم .
الفتاة : والخلاصة قتلنا على إيديهم حلال..ومقاومتنا ليهم حرام .
الشاعر : صبرنا على غدرهم قادرين وكنا لهم قدراً مرصدا
طلعنا عليهم طلوع المنون فصاروا هباء وصاروا سدى
الفتاة : كفاية كلام عن الماضى..كلمنا عن الحاضر..الواقع المر .
شاب 2 : كفاية كنا وكان .
(ويدخل رجل يغنى على الربابة)
ياسادة كان ياما كان..فى سالف الأزمان
راجل شجاع وهمام ..دا كان جد بابا
ولو شاف اللى إحنا فيه.. ليجيله إحباطا
شاب 2 : أمسى ينفق أموال البترول مبعثرا الدولارات .
الفتاة : بات نديما للكأس والطاسات .
شاب1 : أضحى مغيبا تائها لا توقظه آهات..ولا آنات.
شاب 2 : مابرح..ما انفك..أصبح فى عداد الأموات .
شاب1 : ومازال يعاقر الحسرات..جرعات تلو جرعات .
العدو : ليس لمثله تسمع شكاية فى المحافل والمؤتمرات .
الشاعر : أخي قم إلى قبلة المشرقين لنحمى الكنيسة والمسجدا
شاب 2 : قبلة المشرقين..يا قدس..أقولك إيه..اعذرينا ..اعذرينى..اعذرينا.
شاب1 : لما حرقوا المسجد الأ قصى..وبيحفروا تحتيه..عملنا إيه .
الفتاة : وكنيسة القيامة..وكنيسة البشارة..لما اعتدوا عليهم..عملنا إيه .
الجميع : عملنا إيه..عملنا إيه..عملنا إيه.
الشاعر : أخي قم إليها نشق الغمار دما قانيا ولظى مرعدا
أخي ظمئت للقتال السيوف فأورد شباها الدم المصعدا
أخي إن جرى فى ثراها دمى وشب الضرام بها موقدا
ففتش على مهجة حرة أبت أن يمر عليها العدا
الفتاة : كفاية تأنيب وملام .. إيه الهوان اللى إحنا فيه ده..ربنا يحيل عليهم المارد الأصفر..دعوة بنية عربية..ساعة مغربية . (وتغنى والمجموعة )
الله حى..الله حي والمارد الأصفر جى
شنج هو..شنج هو جى جى بصوا شوفوه
شنج هو..شنج هو يا خلق بصوا شوفوه
بنج لى ..بنج لى فوقوا فوقوا واصحولى
الفتاة : كفاية..كفاية..وإحنا دورنا إيه.
الشاعر : خذ راية الحق من قبضة جلاها الوغى ونماها الندى
وقبل شهيداً على أرضها دعا باسمها الله و استشهدا
فلسطين .
الجميع : يا بلاد العرب من المحيط للخليج .
الشاعر : يفدى حماك الشباب وجل الفدائي والمفتدى
الشاعر : فلسطين
الجميع : يا بلاد العرب من المحيط للخليج .
الشاعر : فلسطين تحميك منا الصدور فإما الحياة و إما الردى
الفتاة وشاب 2 وشاب 1 : فإما الحياة و إما الردى .( 3 مرات )
( موسيقى حزينة..صوت خطوات الجنود..وصيحاتهم..تتعالى تدريجيا..وسط دهشة وخوف الشباب..يهرعون نحو الشاعر الذى يرقد فى قبره..والشباب يضربون )
( ويظلم المسرح..وتتصاعد موسيقى أهم الأنباء..ويظهر مذيع ومذيعة )
المذيعة : أيها المشاهدون الكرام .
المذيع : أسعد الله مساءكم بكل خير .
المذيعة : مع موجز لأهم الأنباء .
المذيع : الأخبار دى جديدة .
المذيعة : أعلن مصدر أمنى مسؤول بقوات التحالف .
المذيع : اللى ناويين لنا على نية سوده ومهببة.
المذيعة : أن قوات من المايونيز.
المذيع : هو إحنا فى نشرة أخبار ولا طبق اليوم.
المذيعة : عفوا..أن قوات من المارينز..قد داهمت عدة مناطق عشوائية فكرية..فى أنحاء متفرقة من الوطن العربى..إلا أنها فشلت فى إعتقال زعيم التنظيم الشعرى الإرهابى القومى..المهندس على محمود طه الملقب بشاعر الجندول لوفاته فى17 نوفمبر..1949أىمنذ 57عاماً..ورغم كده بيطاردوه وعجبى.
المذيع : وقد صرح مصدر مسؤل بال CIA وكالة المخابرات المركزية الأمريكية بأن مصادرها أخفقت فى الإيقاع بالشاعر..والقبض عليه..إذ أنه..شاعر منشق وقصيدته فلسطين وراء أعمال المقاومة فى فلسطين..والعراق..وجنوب لبنان
المذيعة : الشاعر ساهم بقصيدته فى تطويرأسلحة الدمار الشامل بالشرق الأوسط..لما تحتويه من مخصب للقومية العربية..إيه اه..وترياق شاف ضد مخططات العم سام جدا..جدا..وذلك لمحاولته تذكير العرب بمجد أجدادهم..واليقظة من الغفلة المطينة ( تنطقها خطأ )
المذيع : إيه يا أستاذة..مطينة إيه..الغفلة المطينة بطين اللى همه فيها.
المذيعة : شارون ستون يطالب بمحاكمته بتهمة معاداة السامية .
المذيع : شارون ستون إيه..دا شارون بتاع إسرائيل.
المذيعة : شارون يطالب بمحاكمة الشاعر.. بتهمة معاداة السامية..ومناهضة البوشية.
المذيع : البوشية..بوشية إيه يا ولية.. دامش كده وبس.. وتجريد اللواء الدكتور
محمد عبد الوهاب من رتبته العسكرية .
المذيعة : هو مش مات من 15سنة .
المذيع : لقيامه بغناء وتلحين ثلاث قصائد للشاعر على محمود طه..وهى كليوباترة الجندول..وقصيدة فلسطين..ومصادرة عوده..وتحريز النوت الموسيقية الخاصة بالعمل..والقبض على أي شخص يردد تلك الأغنية المحرضة على الإرهاب..والتهديد بدك القنوات الفضائية..والإذاعات التي تذيع الأغنية.
المذيعة : وفى تصريح لأحد الكلامنجية .
المذيع : الأونطجية.
المذيعة : أكد أن الشاعر دأب على الدعوة للقومية العربية..وهى من وجهة نظر الكلامنجية تعتبر من مخلفات الماضى..وضارة ببيئة العولمة.
المذيع : لما تسببه من إزعاج دائم لسيدهم وتاج راسهم ..القطب الأوحد.
المذيعة : وقد عقد ت الجامعة العربية اجتماعا طارئا..استنكرت وشجبت..وأدانت فيه ما يحدث جملة وتفصيلا..ويعلو..ويعلو ويعلو..صوت الشخير..
( وتتثاءب ويبدو المذيع فى غفوة تهزه لتوقظه وتتثاءب ) من مقر جامعة الدول العربية.
المذيع : قدمنا لكم سيداتي سادتى..حدوتة قبل النوم.
المذيعة : إيه.
المذيع : قصدي نشرة الأخبار..كان معكم..اسم المذيعة.
المذيعة : وأشرف فؤاد.
( صوت عالى..هأقول يعنى هأقول..براحتى..ثم يغنى موال )
هأقول ولا حد يقدر يمنعني وأغنى لجل الدنيا تسمعني
عجب العجب يا زمن اتفرعن فيه الأندال
بعد ما جرى اللى جرى راح أقول المفروض ينقال
(يظهر المطرب مقلدا شعبان عبد الرحيم ويغنى ومعها لشباب الثلاثة..وينضم إليهم المذيعة ثم المذيع..وهم يرددون)
أخي جاوز الظالمون الظالمون المدى
فحق الجهاد وحق الفدا
وإيه ...إيه
فجرد حسامك من غمده
فليس له بعد أن يغمدا
وإيه ...إيه
وليسوا بغير صليل السيوف
يجيبون صوتا لنا أو صدى
وإيه ...إيه
يفدى حماك حماك الشباب
وجل الفدائى والمفتدى
وإيه ...إيه
طلعنا عليهم طلوع المنون
فطاروا هباء وصاروا سدى
وإيه ...إيه
يفدى حماك حماك الشباب
وجل الفدائى والمفتدى
أخي جاوز الظالمون الظالمون المدى
فحق الجهاد وحق الفدا
بس خلاص