+=أتمنــــــــــــى أن تشاركون .. لكـل لاجـئ فلسطيني =+

[فلســـ لؤلؤة ـــطين]

السلام عليكم ورحمة الله

إخواني أخواتي أعضاء هذا المنتدى الحبيب
رغم مرور أكثر من58 عاما على النكبة مازال الفلسطينيون يحملون آلام اللجوء وآمالهم بالعودة
وما تزال الذاكرة الفلسطينية تنبض وتحيى على هذا الأمل
فما رأيكم أن يكتب كل عضو قصة أبيه وجده ومعاناتهم مع النكبة وما قاسوه

مع الإجابة على هذه الأسئلة

من أين من فلسطين ؟؟ ومتى غادروه ؟؟ وما هي ذكرياتهم عن الوطن ؟؟ وكيف حالهم الآن ؟؟ وماذا سيقدمون للوطن ؟؟ وماذا يتمنون للوطن ؟؟ وما هو رأيهم بتقصير العرب ؟؟ وماذا يطلبون منهم ؟؟

أما أنت أخي من ولدت في الشتات وتربيت خارج وطنك أتمنى أن تجيب على هذه الأسئلة ...

ماذا تعني لك النكبة بشكل شخصي ؟؟ ماذا تعني لك كلمة فلسطين ؟؟
تخيل أن اليوم التاريخ 1948 م أين تتخيل نفسك وماذا تفعل ؟؟
ما ذا تعني لك هذه الكلمات ....؟؟
لاجئ – فلسطين – النكبة – المخيم

أتمنى أن تشاركونا ولكم جزيل الشكر والامتنان


فلســـ لؤلؤة ـــطين

[الريادي]

بسم الله الرحمن الرحيم

أشكرك على هذه الأسئلة الجميلة 0

النكبة حصلت في عام1948حيث شرودوا أهل فلسطين من ديارهم حفاة يجرون 0

وشكرا

[.:.!دموع الرحيل!.:.]

والله موضوع وفكرة رائــــعه

بعد إذن المشرف رح ثبتو

ولـي عودة ان شاء الله

للرد عالموضوع

[جيفارا*نابلس]

انا الحمد لله ما حدا من اهلي هاجر بس كان سفر طوعي يعني مو تهجير

[ameera]

من أين من فلسطين ؟؟ ومتى غادروه ؟؟ وما هي ذكرياتهم عن الوطن ؟؟ وكيف حالهم الآن ؟؟ وماذا سيقدمون للوطن ؟؟ وماذا يتمنون للوطن ؟؟ وما هو رأيهم بتقصير العرب ؟؟ وماذا يطلبون منهم ؟؟

أما أنت أخي من ولدت في الشتات وتربيت خارج وطنك أتمنى أن تجيب على هذه الأسئلة ...

ماذا تعني لك النكبة بشكل شخصي ؟؟ ماذا تعني لك كلمة فلسطين ؟؟
تخيل أن اليوم التاريخ 1948 م أين تتخيل نفسك وماذا تفعل ؟؟
ما ذا تعني لك هذه الكلمات ....؟؟
لاجئ – فلسطين – النكبة – المخيم
1ياستي القصة طويييييييييييييييييلة كتير مابتنحكى بدقيقو وكلمة ووييلا صفحة
2 انا من قرية صغيرة للخصوصية لاايد ذكرها ولكن من قرى 48 قضاء عسقلان
3 عام 1948م
4 للاسف والدي ولد عام 48 طبعا ولا يذكر شئ لانو كان صغير جدا اما جدتي رحمها الله فكانت دائما تذكرنا بالبلاد وبريحة البلاد وشجر البرتقال وكرم العنب والذكريات االجميلة التي ترويها كل جدة لحفيدتها وعن جد ايم زمان احلى بالف مرة من ايام اليوم
5 لا اعرف يعني ولكن في قريتنات لم يبقى احد ولكن بالطبع غالبية الكبار والذين هاجروا قد توفوا حاملين معهم حلم العودة للوطن
6 ماذا سيقدمون ياحسرتاه خليلها على الله
7 يتمنون الخير والسلام والعودى للبلاد كما تقول جدتي رحمها الله
8 يييييييي من ناحية العرب متساليش لانو بصراحة اذا بدك تسالي اسالي ايش قدموا وهو طبعا ولا اشي لانهم فشلة بطبيعة الحال
9 بالعربي مابنطلب اشي لانهم قاعدين عكراسيهم وعاضين فيها بسنانهم بدناش هالعرب الخردة
10

[.:.!دموع الرحيل!.:.]

وعليكم السلام ورحمة الله ..

إخواني أخواتي أعضاء هذا المنتدى الحبيب
رغم مرور أكثر من58 عاما على النكبة مازال الفلسطينيون يحملون آلام اللجوء وآمالهم بالعودة
وما تزال الذاكرة الفلسطينية تنبض وتحيى على هذا الأمل
فما رأيكم أن يكتب كل عضو قصة أبيه وجده ومعاناتهم مع النكبة وما قاسوه

فعلاً الكلامـ من اجدادنـا وأهلنـا الي عاشو جوا فلسطين

وعاصرو النكبة ببكي الحجـر

وأنا أخوف ما اخاف أن يذهب عصرهم ونفقدهمـ ولسه فلسطين ما رجعـت إلنـا ولا رجعنا الهـا

وجودهم بيننا كلامهم مهم جـداً لبنـاء جـيل محب لفلسطين متمسك بالقضية متل حالهمـ

رح احكي شوي عن جدي ابو ابوي

جدي ابو ابوي ما بعرفه ،، الله يرحمو متوفـي

اجا على لبنان خطب سـتي (( ستي لبنانيه))

وراحو بالـ 1947 قعدو سنـة وصـارت النكبة

يعنـي كان وقتها جـدي لسه بأسس وشاري أراضي

وحاطط براسو ومخطط لمشاريع

وقـت الي صارت النكبة ،، حاله متل حال اي واحد من اجدادنا من اهل فلسطين

طلع هوي وستي واجوا على لبنان

وكان كل الوقت يحكيلها ما تخافـي كلها اسبوع ومنرجع

وكان منتفائل كتير ومتأكد أنه الرجـعه قريبة جـداً

وستي تبكي وهوي يهدي فيها

لحد ما مرت الأشهر ووقتها حـس انهم انغدرو

وانها كانت تمثيليه مرض من قهره وشوي وكان رح يفقد عقلو

وهو يفكر بفلسطين لحـد ما مات قهـر ^^

الله يرحمـه يا رب

بابا خلقان هـون ما شاف فلسطين وما اله ذكريات فيها للأسـف ..

إمي كمان خلقانه هـون بس راحت فلسطين لما كانت صغيرة ..



//


مع الإجابة على هذه الأسئلة

من أين من فلسطين ؟؟

من يـــافـــــا من حـيّ المنشيـّة بالتحديد

ومتى غادروه ؟؟

بالـ 48 ^^

وما هي ذكرياتهم عن الوطن ؟؟

للأسف جدي أبو بابا ما قدرت أعرف منـه شـي الله يرحمه يا رب

بس جدي ابو امي وعم أمي لسه أكتر بيحكيني كتير

وانا متعلقه بعـم إمـي كتـير ما بصدق نطلع عندهم

عشان يقعد يحكيلي

كل مرة عنده كلام جديد

كل مرة دموعه بتكون أكتر من المرة الي قبلهـا

بيحكي عن كل شي بفلسطين

بس الأكـتر عن بطولات الشعب

وحكالي عن ايام النكبة كيف صارت المؤمرات

وكيف كان العملا همي الي ساعدو بضياع فلسطين

من كل العرب حسبنا الله ونعم الوكيل

وخالة إمـي بتحكيلي كانت كيف لما اهلها كانو طالعين ايام النكبة

هربانين على جنوب لبنان كان معهم ولادهم وكانو كتار

راح زتت الأم واحد من ولادهـا بالطريق بالبريه كمـان وضلت ماشية

لنشوف أديه شدة الهلع الي كانو فيـها إنها تركت ابنها بالبرية

ولسه بيقولو اهل فلسطين همي الي تخلو عن فلسطين

الحكي غير الشوف

وكيف حالهم الآن ؟؟


دائمـا الأمل موجـود وواثقين من العودة وانه الحق لا بد يرجـع لصحابو





وماذا سيقدمون للوطن ؟؟ وماذا يتمنون للوطن ؟؟

متأكده أنه كل شي بيقدرو يقدمو ما بقصرو ..

لكـن بقول هالكبار بالعمر الي عاشوا بفلسطين

وعايشو النكبة مجرد وجودهم بيننـا ليذكرونـا دايمـا هو بحـد ذاته

تقديم لفلسطين ،، أنهم يزرعو حب فلسطين بقلب كل حفيد الهمـ

وشو بيتمنو للوطـن ...

طبعـا أنه يرجـع لأهله

هاي أول أمنية لكل فلسطيني ..

وما هو رأيهم بتقصير العرب ؟؟ وماذا يطلبون منهم ؟؟

يا ويلي ،،

حقدهم على الحكام العرب كبـير

وبيحكو بحرقة قلب عليـهم

شو بيطلبو منهم ؟؟ ما بعرف

يعنـي يا يكونو حكـام رجـال يا يموتو ويريحونـا من حالهم << هي أنا جاوبـت عنهم



أما أنت أخي من ولدت في الشتات وتربيت خارج وطنك أتمنى أن تجيب على هذه الأسئلة ...

ماذا تعني لك النكبة بشكل شخصي ؟؟

آآخ النكبة نكبة للعمر كلـه

بإني اضطريت اخلق برا وطني

وعيش برا وطني

واني شوف شعبي بيتعذب كل هالعذاب

وإني شوف مدينتي ساكن فيها ارذل الخلق

احساسي لما شوف مناظر وصور من اراضي الـ 48

وهمي ساكن فيهـا غيرنـا

تفكيري بينشل ومش رح اقدر اكتب شو بحس

بس بنفس الوقـت رب العالمين ما بريد لخلقه الا الخير

يعنـي بقول رب العالمين اختارنـا ليطلع من شعبنـا

المجاهدين والأبطال والصابرين

والله انهم رمز وفخر للأمة كلهـا

يمكن لو ما صار بفلسطين الي صـار

كانت رح تكون متلها متل اي بلد تـاني ووطـن تـاني

يمكن لو اخلقت بداخلها وكان كل الامور ماشية عادي

وما في لا حرب ولا شـي

مـا كنـت رح اعرف قيمتـها هيك،،

بس رب العالمين اختارنـا

والحياة الدنيا والأمور الدنيوية زائله

بفضل انه شعبي يعيش مجاهد وصابر وو

ومستعصم بالله كل عمرو

ولا أنه يكون وطنـي متل بقية الأوطان الي

صار ما تمشي البلد الا بمعصية الرحمـن

عشان هيك عسى أن تكرهو شيئا وهو خير لكمـ

واذا كل الشعوب اخدت وظفرت بالحياة الدنيـا

"ويا ريتهم متهنيين "

انا بشكر ربي ليل نهـار أنه اختار شعبي

للحياة الآخرة

وثوابهمـ بالآخرة

وقضو حياتهم حياة جهاد وعز وإباء ومجد رغم كل العذاب




ماذا تعني لك كلمة فلسطين ؟؟

باختصار كل شي بحياتي

وكل نفس بتنفسو

والحمدلله عند كل نفس إنـي من هالوطن العظيـم




تخيل أن اليوم التاريخ 1948 م أين تتخيل نفسك وماذا تفعل ؟؟

والله مش عارفه ،،

يمكن لو كنـت هلأ بال 48

وكانت اول حرب بتمر عليي

ولسه ما عرفت بغدر العالم الي حواليي

وما عرفت انه في هيك خونـة بين العرب

يمكن كنت صدقت فكرة اليومين وطلعت من فلسطين

وعلى اساس ارجع بعد يومين ويكون الجيش العربي الموقر قام بمهمتو

أمـا لو هل بعد ما عرفنا وفطنا اهمال وخيانة العرب

وانا كنت داخل فلسطين

لا ما بطلع والموت في سبيل الله وعلى ارض الوطـن

هو اسمى الغايات


ما ذا تعني لك هذه الكلمات ....؟؟


لاجئ

لقب رافقنـي من يوم ما فتحت عيونـي

بفتخر فيه كتـير

طالما أنـه بعده بتجي كلمة لاجئ "فلسطيني"

فهو عز وشرف إلي

متمسكة فيه

وان شاء الله بنضل لاجئين

لحـد ما نصير العائدين بإذن الله

مش حاملين جنسية اخرى متل ما الكل ناوي يعمل فينـا



– فلسطين

كلي فلسطين

– النكبة –

حكيت عنها فوق ومنرجع منقول عسى أن تكرهو شيئاً وهو خير لكـمـ


المخيم

ما عمـري جربت العيشة بمخيم

يعنـي مش رح اعرف أكتب شعوري شخصياً

تجاه التجربة الشخصية للعيشة بمخيم

بس اوقات كتير بحب انزل عند رفقاتي الي بصور

وروح مخيم الراشديه وشوفهم كيف عايشين

لأني بحس حالي موجودة بقطعه من فلسطين



طولت بالحكـي

بس الكلام عن معشوقتـنا ما بيخلص

ويعطيك الف عافيه لؤلؤة موضوع وفكرة رائعـه بجـد

[سنا القمر]

السلام عليكم ورحمة الله
وعليكم السلام وررحمة الله
إخواني أخواتي أعضاء هذا المنتدى الحبيب
رغم مرور أكثر من58 عاما على النكبة مازال الفلسطينيون يحملون آلام اللجوء وآمالهم بالعودة
وما تزال الذاكرة الفلسطينية تنبض وتحيى على هذا الأمل
فما رأيكم أن يكتب كل عضو قصة أبيه وجده ومعاناتهم مع النكبة وما قاسوه
الآلام لا زالت بداخلنا .. تجرعنا كل يوم المر والحنظل :icon5:


من أين من فلسطين ؟؟
من يافا الحبيبة .. وسأذكر لكم القصة :
والد جدي واخوته كانو يعملون في يافا على شاطئ البحر في صيد السمك ومن هذا جاء اسم عائلتي ..
بعد النكبة سافر جدي الى مصر وانجبوا هناك والدي ثم عادوا الى غزة ثم جاءوا الى الأردن .. فجنسيتنا الان غزاوية ونحمل وثيقة ..
ومعاناتنا في أرض اللجوء لا تنتهي .. فمن الفلسطينين اللاجئين من أخذ الجنسية الأردنية وتمتع بالحقوق ..أما نحن فلا ....
ومتى غادروه ؟؟
لا أدري متى تحديدا ولكن أظن عام النكسة

وما هي ذكرياتهم عن الوطن
ذكريات رائعة .. كان جدي رحمه الله دائما يحدثنا عن يافا فقد كان لهم بيت على شاطئ البحر .. وعندما يعلو الموج كان يدخل في بيارتهم .. :icon31:

وكيف حالهم الآن ؟؟
والله يعانون ونعاني
وماذا سيقدمون للوطن ؟؟ وماذا يتمنون للوطن ؟؟ وما هو رأيهم بتقصير العرب ؟؟ وماذا يطلبون منهم ؟؟
لا نطلب منهم شيئا فمسلسل الخذلان لا زال مستمرا

أما أنت أخي من ولدت في الشتات وتربيت خارج وطنك أتمنى أن تجيب على هذه الأسئلة ...

ماذا تعني لك النكبة بشكل شخصي ؟؟
تعني الخسران فأنا لم ار فلسطين في حاياتي كلها .. ولدت في الخارج وعشت في الخارج ..

ماذا تعني لك كلمة فلسطين ؟؟
حلمي المنشودتخيل أن اليوم التاريخ 1948 م أين تتخيل نفسك وماذا تفعل ؟؟
أهم شئ أنني لن أخرج من فلسطين مهما حدث .. فتجرع المصيبة مع أهلك في وطنك خير من تجرعها في أرض الغربة ..
ما ذا تعني لك هذه الكلمات ....؟؟
لاجئ – اللقب الملصق بي دائما .. وصمة عار على جبهتي للأبد .. ولكني بإذن الله سأعود سأعود
فلسطين – هي كل حياتي .. باختصار
النكبة – يوم اسود ..
المخيم - عاش فيه ابائي يوما .. فيه يتجرع أبناء وطني مر الحياة معا

وشكرا أختي على الموضوع القيم

جزاك الله كل خير ..

[فلســـ لؤلؤة ـــطين]

يعطيكم الف عافية اخواني اخواتي اعضاء هالمتدى العزيز على مشاركتكم

واتمنى من الجميع المشاركة

فنحن بحاجة الى احياء ذكرى النكبة بطريقة جديدة

تحياتي لكم

[**love-angel**]

من أين من فلسطين ؟؟

من يافا ...:icon26:

ومتى غادروه ؟؟
في بداية الحرب عام 48

وما هي ذكرياتهم عن الوطن ؟؟

لمن اجي اسال تيتا عن فلسطين ما بقدر اني اكمل النقاش معها لانها بتدمع عينها وبتكتئب..:ولكن الي عرفت منها ... البيارات ...وروعتها ... وبحر يافا ...هواها المنعش ... جيرانها ... تيتا ام بابا ... ولدت بابا يوم الحرب بنفس اليوم وبعد فترة انطلقنا على الاردن وعشنا فيها مدة من الزمن...وفي حرب الايلول الاسود رحنا على الكويت ... وفي حرب الخليج ...رجعنا على الاردن

وكيف حالهم الآن ؟؟

اكتئاب شديد وبتمنو يرجعو ولو ليوم واحد ...

وماذا سيقدمون للوطن ؟؟

مستعدين يقدمو روحهم وكل ما عندهم كرمال وطن حر...

وماذا يتمنون للوطن ؟؟

النصر القريب والتحريروالعودة للوطن

وما هو رأيهم بتقصير العرب ؟؟ وماذا يطلبون منهم ؟؟

العرب ... يا حراام ... دخلو في سبات عميق ... والله اعلم متى بيصحو .... الله يهديهم
وما بدهم شي من العرب غير الدعاء لاهل فلسطين ... عسانا ننتصر من دعاهم لنا


ماذا تعني لك النكبة بشكل شخصي ؟؟

الحزن ... الضيق الشديد ....:icon5:

ماذا تعني لك كلمة فلسطين ؟؟

الحب ... العناء ... التضحية ...الاقدام ... الشهادة

تخيل أن اليوم التاريخ 1948 م أين تتخيل نفسك وماذا تفعل ؟؟

بتخيل حالي جا لسة على البحر اتأمل .. معانيه الجميلة
واول شي رح اعملو اني ادافع بكل قواي عن ارضي الحبيبة ...ومستحيل اتخلى عنها او اطلع منها مهما كان السبب

ما ذا تعني لك هذه الكلمات ....؟؟

لاجئ : العودة للوطن
فلسطين: الحب والوفاء
النكبة: الحزن
المخيم: التمسك بالوطن




لؤلؤتي الغالية ....
سلمت اناملك الوردية ...
موضوع راائع .....
انتظر جديدك بشوق ...
لـــــــ منتهى الحب ــــــكِ:icon26:

[حبيبة السماء]

السلام عليكم ورحمة الله وبركاته

هذا اقل شيء يمكن ان نفعله من اجل قضيتنا

وقضية اللاجئين الفلسطينيين

بارك الله فيكم على هذا الموضوع

وان شاء الله يعود كل الاسرى إلى فلسطين الغالية

بعد التشريد والويلات التي حلت بهم ، والتهجير

[سارة]

من أين من فلسطين ؟؟صفد
ومتى غادروه ؟؟ 1948
وما هي ذكرياتهم عن الوطن ؟؟ ما بعرف
وكيف حالهم الآن ؟؟اموات
وماذا سيقدمون للوطن ؟؟ كل ما يستطيعون
وماذا يتمنون للوطن ؟*
وما هو رأيهم بتقصير العرب ؟؟هم سبب ضياع القضيه
وماذا يطلبون منهم ؟؟الصحوه من النوم

أما أنت أخي من ولدت في الشتات وتربيت خارج وطنك أتمنى أن تجيب على هذه الأسئلة ...

ماذا تعني لك النكبة بشكل شخصي ؟؟ بداء دمار الامهوغلطه تارخيه
ماذا تعني لك كلمة فلسطين ؟؟ الوطن الساكن داخلي كلاجئه
تخيل أن اليوم التاريخ 1948 م أين تتخيل نفسك وماذا تفعل ؟؟متمسك بالارض ولن اتخلى عنها كما فعلوا اجدادي
ما ذا تعني لك هذه الكلمات ....؟؟
لاجئ – هم القضيه الفلسطينيه
فلسطين –الوطن الي من المستحيل الوصول اليه

النكبة –بداء دمار الامه العربيه
المخيم :المأساه التي يعيشه كل لاجى بسب سوء الاحوال بداخله