من منا افضل؟؟؟

[بنت اسدود]

:s (43): مرحبا يا امورات


زمان عنكم والله


انا غبت الكم بس في موضوع ماخد عقلي الايام هادي

حابة مشمركتكم فيه


وانا راجعة من الجامعة صادفت بنت


لابسة خمار اسود طويل وكبير ونقاب

ومو باين شي من وجها ولا ايديها ولا شي

المهم هلأ وانا وصحباتي واقفين بنسلم علي بعض

كل البنات حسيتهم مو عاجبهم منظرها

لكن انا سالت نفسي شو موقفي باليوم الاخر قدام ربنا لما

يسالني عني وعنها

فا انا بصراحة
يومها ما سمعت ولا بنت بتقول هي احسن منا

الكل كان يقول لشو التعقد هاد:icon28:

وليش هيك
هي الدنيا هيك

فا انا بصراحة لحتي الان

مش عارفة مين الصح

مع انه الحمدلله الاغلبية بيلبسوا جلباب ومسستور


بدي رايكم يا عرب

بنت اسدود
:showoff:

[وليف الدمعة]

هلا بيك بنت اسدود ونورتي المنتدي
في البداية احب ان اشكرك كثير علي طرح هذا الموضوع المهم
للا سف الشديد صارت نظرة الناس لاي شخص متزمت في عقيدة الله انة شخص متعقد
وان الدين لا يحث علي التزمت بهذا الشكل كل انسان لة الحق ان يكبر في دينة ويعز دينة
لباس البنت للنفاب قناعة شخصية ودينية وفكرية وعقائدية
فنحن ننظر اليها كانها شئ عجيب ونتسال بين انفسنا انها معقدة وان الدين لم يطلب منها ذلك
صحيح الدين يسر وليس عسر لكن واجب علينا كمسلمين ان نحمي و نحافظ علي مبادئ واسس ديننا


مشكورة كثير بنت اسدود

وشكرا لك

تحياتي

[حكيم فلسطين]

مشكورة على الموضوع الجريئ
والله وباختصار شديد
انا باعتقادي
انو النقاب الشرعي من افضل اللباس للمرأة
وايضا اذا كانت تخاف من كلام الناس
فوالله الناس يوم القيامة سوف يتخلون عنك
وانتي يا مسكينة من سوف تنالين العقوبات
لانك تزينت ليراك الناس وتثيرين الشهوات
وكل السيئات لك
فلذلك تحملي ما في الجنيا لتنالي الاخرة
وبالله التوفيق

[عاشق البندقية]

السلام عليكم ..

اول شي خيتي خليني اشكرك عالموضوع .تانيا..

اسألك سوال..

مين اهم؟؟ نرضي العباد ولا رب العباد..؟؟^^

طبعا رح تقوليلي "رب العباد"

قال تعالى"يا ايها النبي قل لنسائك وبناتك ونساء المؤمنين يدنين عليهن من جلابيبهن"

(ما بعرف ازا في غلط بالاية)

والرسول علية الصلاة والسلام لما قال لإبنته. " بما معناه" ازا بلغة المرأة ال*** , ما بيظهر منها الا هذا وهذا

وأشار لوجهه وكفية.

يعني بالنهاية ما قلك الرسول انك يا هالبنت تلبتي البرمودا ويلا نٌشطف ويلا نسبح والخزعبلات هادي .

والاحلى تكون البنت مع هالاشياء لابسه شاله "يا حبيبي"

ولا تعملي حالك خيمه "ههههههه هيك بيحكولها بالسعودية" ومش مبين منك شي.

الرسول اعطاكي شي وسط . واظن هو الافضل " جلباب مرتب مع شالة بيضه ..

خخخخخخخخخخخخخخخخخخخخخخخ

"يقبشوني وهم حاطين وشاح الكتلة" ^^

برضو ما بقلك انو اللي حكيتيه غلط .. لانو على ما اعتقد زيادة الخير خيرين..

وشكرا..

[فراشة]

هههههههه حلوة يقبشوني ...

انا مع عاشق البندقية انوو ما تكوون كتير مزوداها باللبس يكون شي مرتب ومستور وما بيلفت النظر ... هيك رايي والله يهدينا ويهدي كل الناس ..

[حلوة وعارفة حالي]

مرحبا بنت اسدود

يسلمووو على طرحك للموضوع

اول شي انا كمان اوقات لما اشوف البنات قديش مزودينها بحس حالي حجابي

مش حجاب بالنسبة الهم


بس والله في عالم بيزودوها

يعني ما بعتقد انو لازم كلنا نلبس خمار للركبة مشان نصير مسلمات

يعني العباية والشالة بتادي الغرض

وحتى ممكن نتنقب بس مش نطول المنديل كتير هيك

انا بشوف شكلمه مش مرتب بالمرة

يعني الوحدة لازم تراعي يكون لبسها مستور ومرتب


بذكر مرة مدرسة القران

حكت النا في محاضرة انو المرأة يجب ان تخرج من بيتها رثــــــــــــــة

حتى اذا راها الرجال صرفوا عنها نظرهم

وبعتقد انو هدا القول قالو احد من الائمة والله ماني فاكرة اسمه

انا بعتقد كلامها جدا جدا جدا مبالغ فيه


بس بدنا الصراحة البنت الي بتكون لابسة خمار طويل طويل طويل

ما بعتقد حدا بيسترجي يحكي معها كلمة وحدة بس

تحياتي للجميع

[خيـرَ أُمـة]

الموضوع خلاف بين العلماء

بس في الاخر اتفقو على انو حسب البلد وحسب المفتي في البلد ..

لذلك حتى في السعودية رجال الهيئة ما بحكو مع المقيمة الي كاشفة الوجه لانو معروف انو طبيعي في بلدها ..

اختي انت بتسألي على شغلة اختلف فيها العلماء .. اختلفو بتفسير الاية الي ذكرها أخونا عاشق البندقية ..

: " يا أيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يُعرفن فلا يؤذين وكان الله غفوراً رحيماً " صدق الله العظيم ..

الاختلاف كان على تعريف معني كلمة جلباب و أصل الاختلاف من اللغويـين ..
على العموم حسب المفتي في البلد الي انت فيها أختي .. والله أعلم

[سالي بنت فلسطين]

النقاب يا اختي مش فرض
لانو في حديث عن الرسول بقول فيما معناه استرو كل اشي ماعدا الوجه والكفين فاللبس المحتشم والجلباب مع منديل عادي هو الصح اما ازا بتكون الوحده خارقه الجمال تحط نقاب عاد انا بشوفو بدعه ابتدعوها والله اعلم مش بفتي ازا حدا عندو ادله غير هالحكي يقول

[خيـرَ أُمـة]

http://www.islamonline.net/servlet/Satellite?pagename=IslamOnline-Arabic-Ask_Scholar/FatwaA/FatwaA&cid=1122528600876

[لولو اليبناوية]

النقاب شي حلو ...لانو سترة لوجه المراة..
بس مش معناتو اكيد انوالي مو مغطية وجها انها مش مستورة لا...
النقاب زيادة بالاجر...
يسلكوو اختي :)

[فراشة]

انا كمان نفسي اوضح شي ..انو كتير من الناس بيحكو لما الوحدة تكون مش لابسة جلباب او عباية يعني مو مستورة ولبسها حرام مع انو في لبس بيلتبس غيرهم بكون محترم ومحتشم ...زي مثلا بنكون شايفين بنات لابسين عبية ومنقبين بس راسمين عيونهم بشكل فظيع ولا العباية تؤولي فستان سهرة ... انا اللي اقصدة انو في كل شي من اللبس المحشم واللي لا ، بس البنت هية اللي بتحدد اللي بدها تلبسو ..

[خيـرَ أُمـة]

مهوي يا فراشة الاحتشام جسمي ونفسي :)

والي مثل هيك ما بتسيء للحجاب وانما بتسيء لنفسها .. مرات (وانا ما بحكي عنك لانك محجبة) بنسمع من بنات انو ليش ما بدها تتحجب .. بتكون حجتها انو في بنات محجبات وبعملن كذا و كذا و كذا ..

فالرد عليهن انو انا عرفت ناس بصلو وبعكلو السبعة وذمتها فهل هاد معناه نترك الصلاة :| مش معقول ..

فعلا مرات بنشوف لنت محجبة ولابسة بنطلون ما بعرف كيف فاتت جوا -اسف على التعبير-بس هاد الي بصير هاي الايام :(( ... فالي مثل هيك بتسيء لنفسها مش لحجـاب .. :)))

[سالي بنت فلسطين]

يا بنت الحلال انتي التانيه احنا بنحكي عن الفكره كفكره وهي النقاب مش في ناس شو بسوا بشوهوا صورتو برسم عيون

وميك اب بخزي بكونو بس عيونهم مبينيم ومش مخليين اشي الا وحاطينو مش هون الفكره الفكره عن النقاب هل هما صح

[العمر ماشي]

أختي

انا اتردد الى مكان لا يوجد به اي محجبه .. أنا محجبه وارتدي العبا .. في بداية الأمر احسست بأني شاذه عن الجميع ولكن مع مرور الوقت أيقنت أني أفضل من الجميع برغم أعتباري متخلفه ومعقده .. فأنا ارحب بتخلف اذا كان هكذا ....

لماذا أصبحت الفتاه المستره .. (( شاذه )) ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لقلت تمسكنا بالدين
بالنسبة لي كم أفرح عندما ارى فتاه في متوسط عمرها تغطي وجهها .. نحن نعلم ان الفتاه بهذا العمر تريد ان تظهر صباها وجمالها .. ولكن تلك الفتاه التي ايمانها اكبر من اي شيئ تستحق كل التقدير


تحياتي : العمر ماشي

[احلي ابتسامة فلسطينية]

يسلمووووووووووو بنت اسدود علي طرحك للموضوع

مالكم كلكم هلأ بشوفكم مع النقاب

والله النقاب انا بشوف هلأ الو مزايا والو عيوب كمان

مشان هيك انا بفضل الحجاب بدون نقاب

بعدين هلأ صرنا نشوف اي وحدة بدهل تعمل عملة مو منيحة لسمح الله

بتروح تلبس نقاب

لدرجة انا والله احيانا صرت اخاف من المنقبات

كتيييييييير صارت بالجامعة سرقة وبالاخر بيعرفوا انو الي عملت هيك وحدة منقبة

صارت لخبطة بالامور

وبعدين الايمان بالقلب والمعاملة

يعني ما نزودها كتييييير بالمعني مش ضروري البس منديل طولي مشان

اقول للناس انا ملتزمة ولا البس عباية بتلبس بلد

في ملابس كتيييييييييييير مستورة ومرتبة وحلوة

البس عباية وشالة مرتبة متلا

بكون زي شرعي ومرتب

انا هيك رايي

سلاموووووووووووووو

[قسامي غزة]

اختي انا برايي انوا البنت الي شفتيها هي الصح
تعرفي شو المصيبة انوا الناس صاروا يقولوا عن الصح غلط وعن الغلط صح
اختي هناك حساب وعقاب وجنة ونار والله لن ينفعنا سوي اعمالنا
هاد مش تعقيد هاد هوا الصح انتي بدك اياها تكون لابسة بنطلون مشان ما تكون معقدة
نسال الله لنا ولكم الهداية

[رومنسية بس عسبية]

هادا الشي بيرجع للقتاعات

بس انا بشوف

انو اي شي مستور عاادي ممكن يلتبس

مش ضروري البس خماار تولي مدام في شي تاني

بيأدي الغرض

يسلمووووووو بنت اسدود

على الموضوع المفيد

سلامووو يا حلوين

[Twin]

والله ما بعرف بس صرنا ما نستغرب من المنقبات لانوو هادا الزي الشرعي بس برايي كمان ازا لبسنا تنوره اوبنطلون واسعين وما يكونوا ملفتين عادي يعني بظن انهم حللوها .. شكرا الك عالموضوع الجميل .. والله يهدينا ونصير نلبس نقاب كمان ..

[خيـرَ أُمـة]

حقك علي ..

انا حمسح ردي وانت امسحي ردك .. اتفقنـا ..

بس ديري بالك الصورة الشخصية بتعكس صورتك لباقي الاعضاء .. وفي قانون بالمنتدى بمنع هيك صور :)))

[بنت اسدود]

مرحبا

بشكركم كتير علي ردودكم الحلوة واللي بتبين كل واحد وجهة نظره

انا ا استاد احمد اكس ويا امورة رومنسية بس عسبية ما نزلت الموضوع ميشان تقفوا لبعض متل ديوك الحبش

خليكم حلوين والعبوا سوا سوا

وعندي احلي مشاركة للحج قسامي غزة اي والله نور الموضوع

نرجع للمهم

انا براي انه الخمار مو غلط والنقاب مو غلط والجلباب مو غلط

بس الصح انا نحن نخلي الناس يحبوا هاد الشي من تصرفاتنا وافعالنا

وانا عن راي كمان انه البنطلون مو حرام لانه اهل الدين والمعرفة بيقولوا كله عل هوا العرف اي علي هوا البلد

اللي انت ساكن فيه يعني مثلا نحن بفلسطين في بيلبسوا خمار في بيلبسوا بنطلون في بشعورهم

يعني عادي لو تطلعي ببنطلون بس بالشروط المعروفة ولو كنا بافغانستان حرام شرعا نلبس بنطلون

وعلي ما اظن الفكرة واضحة

ويسلمووووووووووووووووووووااا

بنت اسدود

[خيـرَ أُمـة]

احنا ما وقفنا لبعض .. وكل واحد ابدا رايو بحرية ...

وانا انتقدت اشي هي غيرتو وهوي الصورة الي كانت حاطاها لانها عيب تنحط بالمنتدى ...

على الاقل احسن من نقاشاتكو العقيمة في موضوع "ليش يا بنات"

والي كان هادف وفجأة صار تافه ..

مدامك أختي صريحة انا كمان بدي اكون صريح ..

سلامي للجميع

[بنت اسدود]

مرحبا

بشكركم كتير لمشاركاتكم

بس انا بجد عصبت منكم

شو هاد اي والله الاولاد الصغار ما عمولها

عيب عليكم

انتوا كبار وبقيتوا عرسان وعرايس

عيب

ههههههههههههههه

سلام

بنت اسدود

[خيـرَ أُمـة]

:)))) مشيها بنت الرملة ..

مش محرزة الشغلة :)))