الواسطةإما الرشوة

[حسام المصرى]

للأسف ظاهرة كتير منتشرة جدا .. الواسطة .. والرشوة ..

دلوقتى لو عايز تشتغل فى شركة مثلا .. ومتعرفش أى شخص فى الشركة للأسف مش هتشتغل فيها ..


مع أنك مهندس .. ممكن تلاقى واحد خريج تجارة بيشتغل نفس وظيفتك .. متعرفش إزاى ,,


أنا نفسى لما رحت أٌدم فى شركات عشان التدريب الصيفى .. الأمن بتاع الشركة قالى " لو متعرفش حد فى الشركة متقدمش ... " وفعلا مقدمتش ..


لو معكشى واسطة بقى .. تدفع فلوس .. يعنى شركات البترول اللى بيحب يعين ابنه فيها مثلا يدفعله 20 ألف و 30 ألف عشان بس ابنه يتعتين بمرتب شهرى 1000 جنيه ..

طبعا قدمت شركات كتير والرد قريبا إن شاء الله .. لكن الموضوع بسيط خالص بعد التعب اللى أنا تعبته ده كله .. والدى كان يعرف واحد شغال فى شركة كبيرة جدا .. قدملى هناك والحمد لله اتقبلت وفى شركة أفضل من اللى قدمت فيهم كلهم ..:ShababSmile226:

بس دى مسمهاش واسطة .. إسمها شبكة علاقات شخصية :ShababSmile221:


نيجى بقى لموظفين الحكومة .. كنت رايح بدى أعمل الرخصة .. لففنى السبع دوخات .. وكل مجيله بورق .. يقولى روح هاتلى شهادة مش عارف إيه منين اكتر من مره لما تعبت .. فى الآخر رحت شتمه ومسك فيا وكنا هنضرب بعض مع أنه راجل كبير وقالى والله مهتشوف رخصة أبدا طول حياتك وهعملك محضر .. وجابلى ظابط من المرور وقله يعملى محضر تعدى على مواطن أثناء عمله .. الظابط جه لقانى شكلى محترم .. أنبنى وقالى اعتذرله .. ههه

وعشان للأسف المعظم مقتنع بأن " لو كان ليك عند الكلب حاجة قله يا سيدى " ..

اعتذرتله مع أنه هو الغلطان ..

الغرض من القصة .. أنى لو كنت ادتله من البداية مبلغ كان جبلى الرخصة وانا نايم فى البيت :ShababSmile221:

وبقيت اعملها .. كان مطلوب منى تقرير طبى لازم يكون من مستشفى حكومية عشان ختم الحكومة .. رحت لقيت طوابير .. اديت للساعى 10 جنيه .. خلصت كل الكشوفات فى نص ساعة ..

بصراحة أنا مش عارف إذا كان ده غلط ولا لأ .. بس أى حد سعات بيضطر يعمل كده


دلوقتى إزاى الانسان يواجه مشكلة الواسطة دى ؟؟

هل فعلا أن مبقاش حد يعمل لحد حاجة غير بمقابل ؟؟

هل فى مواقف تعرضت ليها .. كان لازم يبقى عندك واسطة ؟؟

هل فى مواقف اتعرضت ليها كان لازم تدفع فلوس .. وعملت إيه ؟؟

من رأيك إيه الحل للقضاء على مشكلة الواسطة ؟؟

ولو أن أنا شايف أن القضاء عليها صعب ..
لأنى لو مدير فى شركة كبيرة أكيد هيشوف إبنه أحسن واحد وقرايبه وممكن يعين منهم كتير ..

طولت عليكم .. :ShababSmile237: