{{ إسـرآء الـفـلـسـطـيـنـيـه’ ]] الــمـــ بيدك ــآيك مـــ قدك ــين

[CoOl GiRl..~]

http://files.shabab.ps/vb/images_cash/up14/110419173516t6ak.gif


عُدنآ لكم من جدبد .. مع ضيفهـ أحبهآ الجميع

وكلنآ شوق لسمآعهآ ومعرفتهآ عن قرب أكثر ||

فيآ لسآعدتنآ بكِ هآ هنآ || ~

وكلنآ آذآن صآغيهـ لكِ :ShababSmile229:


...


{{ إسرآء الفلسطينية }}


...

http://files.shabab.ps/vb/images_cash/up14/110419173519hmAb.gif


...


[ الشُروط و القوآنين ]


للأعضـآء :


بمُجرد أن يبدأ الضيف حديثه، لآ يسمحْ لكُم بالتعْليق،

لكِـن بعـدَ انتهآئـه الحديـث بقولـه : "انتهيـت"،

سـيَكـونُ المـجـآل مفـتـوح لكُــم للتـعليـق

و إبـدآء الـرأي بـمـآ طــرحــه الضـيـف ،

لــكِــن مِـن دوْن طــرحْ أي أســئـلــة ~

و أي رد مُخــآلـف للشــروط سـيـحــذف !

...


للضيــف :


طبعـاُ يحـق لكَ كتـآبه مآ تشـآء


لكِـن فــي أسبوعين،

وفي حآل لم تنتهي يمكِن تمديد المُدة

كـمآ علـيكَ أن تـضغ هذآ التوقيع

خـلآل فـتـرة الاسـتضـآفـة ~


http://files.shabab.ps/vb/images_cash/up14/110419173519hmAb.gif




...


تمنيآتنآ لكم قضآء أجمل الأوقآت .. ~

[PaLeStiNe FlOwEr]

:ShababSmile237:

يااااي اسررآآؤؤؤؤ

اختيار موفق كول :ShababSmile240:


بانتظار نتعرف عليكي عن قرب اسراء

منورة بالمايك ^^


لو بعرف انو انتي وراي كان زمان خلصتو :ShababSmile250:

[Maram .. ~]

منستنـــآكي اسرآآء

بدنا تحكي كتير ماشي :p

عوآفي كول :$

[أســـآمـة]

بنستنا إسراء ،

يعطيك العافية كوول :)

[إسراء الفلسطينية]

أنــآ جيت http://shabab.ps/vb/images/ehdaa_smilies/eh_s(9).gif

جــآي أحكي لتزهقوا مني :ShababSmile221:

رح ابدأ معكم من بكرا إن شاء الله

انتظرونـــي :ShababSmile116:

[محمود]

خلي بآلك رح أتابعك حرف بحرف :p

[محمود]

صحيح نسيت أقول : اختيار فوق الموفق ..

[حسام المصرى]

إسراء الفلسطينية ..

اختيار نايس ..

لأنى بحسك غامضة وما اعرف شخصيتك خالص حقيقى ..

رح تكون فرصة حلوة أننا نعمل focus أكتر على شخصيتك ..

مو هيك ؟؟

[إيقاع]

فرضن بدنا من هلg

!!

[إيمـان]

اهلن بسوس والله لا اوصيك ابرمي لما تزهقي اوكي

برم برم برم في شي احلى من البرم || يعن اني :p

[أبومجاهد]

sooooooooooon :P

[اسد 22]

من المتابعين

[PaLeSt!Ne SouL]

بانتظارك اسراء :)

اختيار موفق كوول

[AnGeLa]

بانتظااارك يا إم السووووس :ShababSmile229:

[عاشقة فلسطين..]

:ShababSmile229:

يـــــــــآ لسـعــآآآآآدتنآآآآآآآآآ بــوجودكِ :ShababSmile229:
بانتظآآرك ♥


يعطيكِ العافية يا عسل ^*

[إسراء الفلسطينية]

الله يسعدكم جميعاً http://shabab.ps/vb/images/ehdaa_smilies/eh_s(7).gif

كتير مبسووطة بوجودكم والله

.

.

:ShababSmile116:

[نابلسية كححح]

يا عينيي

بنستنااكي اسرااء
♥

[إسراء الفلسطينية]

السلآم عليكم ورحمة الله وبركــآته :)

.

.

خلص قررت اني أبدأ حكي هلا ..

يعني ما بدي حدا يجي ويقاطعني ها :ShababSmile226:



http://files.shabab.ps/vb/images_cash/up14/110420163518d5c0.gif




رح ابدأ بالتعريف عن حـآلي :)

إسمي إسرآء

عمري 19 سنة ..

خلقت بلبنـآن بـ 26/12/1991 ..

أصلي من الزيب / قضـآء عكـآ ..

خلقت بعين الحلوة .. أكبر مخيم للاجئين بلبنان

أهلي قرروا يسـآفروا من بعد ما إجيت ع هل دنيـآ بتقريباً شي سنة

بسبب الاحوال المأساوية يلي بعاني منها الشعب الفلسطيني

حسب ما بسمع .. فكـآنت سفرة صعبة << الحمد لله اني كنت صغيرة :ShababSmile235:

ما بعرف كيف .. بس أهلي قرروا انهم يسكنوا بالدنمـآرك

ولهلا سـآكنين هون .. وتحديداً بالعاصمة كوبنهاجن :)

//

I will be back

:ShababSmile258:

[إسراء الفلسطينية]

http://files.shabab.ps/vb/images_cash/up14/110420165152v3wl.gif (http://forum.5aa5.com/t40127.html)


[ عـآئلتي ]

انا أكبر وحدة بين أخواتي ..

وبعدين بتيجي اختي إبتسام ، خـآلد ، محمد ، عيسى :)

..

في النا قرايب هون بالدنمـآرك ..

في الي 3 أعمـآم ..

وقرايب لماما وبابا بس من بعيد :ShababSmile233:

,

,

بـآقي العيلة بلبنـآن

لهيك مننزل تقريباً كل صيفية ع لبنـآن .. منها تغيير جو ومنهـآ زيارة للاهل والاحباب :ShababSmile229:

طبعاً هل ايام يلي بقضيها هنـآك .. بتكون من أحلى أيـآم حياتي http://shabab.ps/vb/images/ehdaa_smilies/eh_s.gif

كتير بحب لمة العيلة ..

والإحسـآس بإنو الواحد مش غريب بالمكان يلي موجود فيه :)

[إسراء الفلسطينية]

[ درآستي ]

من الصف التمهيدي للصف السـآبع ..

كنت أروح بمدرسة حد بيتنـآ اسمها Raadmandsgadeskole :ShababSmile235:

مدرسة قضيت فيها ايام حلوة كتير ..


http://files.shabab.ps/vb/images_cash/up14/110420230853NMj7.jpg


::


من الصف السـآبع للتـاسع نقلت ع مدرسة تانية

ما كنت مرتاحة فيها كتير .. بس مشيت حالي :ShababSmile256:

.

.

وحالياً انا بالتوجيهي متل ما بتسموه :ShababSmile221:

أكيد أغلبكم مستغرب انو عمري 19 سنة ولساتني ما مخلصة ثانوية ؟

بس النظام هيك .. فتت مدرسة متأخرة .. وحتى لسا في بصفي أكبر مني :|

مممممـ

التوجيهي هون بعتقد انو أسهل من البلاد العربية ..

لانو بتتقسم الامتحانات ع 3 سنين

مش كلهم بيجوا بآخر سنة !

طريقة حلوة كتير .. وما بتضغط الطالب :]

بس طبعاً بتضل آخر سنة .. أصعب من السنين الباقية :ShababSmile235:

::

طبعاً كل المدارس يلي دخلتها مدارس دنماركية ..

بس بنفس الوقت دخلت مدرسة عربية كل يوم سبت

لحتى أتعلم عربي وقرآن وتربية إسلامية

يعني من يوم الإثنين للجمعة بروح ع مدرستي الدنماركية

ويوم السبت بروح مدرسة عربية :)

والأحد عطلة :ShababSmile226:

هاد برنـآمج حيـآتي من يوم ما وعيت ع هل دنيا لحديت اليوم :ShababSmile221:

[إسراء الفلسطينية]

[ درآستي ]

المدرسة العربية .. بلشت فيها لما كان عمري حوالي 6 سنين

هيي مدرسة تأسست بقلب مسجد

غريب شوي .. بس هاد يلي صار :ShababSmile221:

المسجد اسمو / الوقف الإسكندنافي

والمدرسة اسمها / مدرسة الأرقم :)

نمط الدراسة إختلف كلياً بالسنين الأخيرة ..

يعني صرنا ناخد دروس دينية أكتر من انها تكون دروس عادية !

وركزنا أكتر ع دروس التجويد .. وقريباً إن شاء الله رح آخد إجازة بعلم التجويد

إدعولي :ShababSmile229:



http://files.shabab.ps/vb/images_cash/up14/110420232948nYsp.gif





طبعاً المعلمين يلي بدّرسوا بالمدرسة ما بياخدو راتب ..

وبيجوا بدرسوا لوجه الله تعـآلى

حالياً عم بتدرب ع تدريس أولاد صغـآر بالمدرسة نفسها ..

التدريس شغلة حلوة ، بس يعني ما بحلم اني أصير معلمة :ShababSmile256:

بس حابة يكون الي شي تاني حد دراستي الاساسية ، بما انو نحنا ببلد غير إسلامي !

الاجيـآل الجاية محتاجة للتوعية ، ومحتاجة للتمسك بالدين أكتر ..

لأن بسهولة ممكن يضيع منهم :ShababSmile235:

[إسراء الفلسطينية]

هلا عنا عطلة

لان عندهم عيد الفصح :ShababSmile235:

//

المـآيك إجى بوقتو ..

يعني رح أفضالكم ع المزبوط :ShababSmile226:

.

.

بس هلا عنجد سطلت :ShababSmile235:

وصار لازم أقوم أنام

نرآكم غداً بإذن الله تعالى :ShababSmile236:

[إسراء الفلسطينية]

الذين يشاهدون محتوى الموضوع الآن : 2 ( الأعضاء 2 والزوار 0)
‏إسراء الفلسطينية (http://shabab.ps/vb/member.php?u=5471)



انو ليش ما بقدر أشوف المختفي :ShababSmile258:

.

.

ع العموم منور / ة .. مين ما كنت تكون http://shabab.ps/vb/images/ehdaa_smilies/eh_s(7).gif

[إسراء الفلسطينية]

http://files.shabab.ps/vb/images_cash/up14/110421193743C97u.gif

[ المنتدى ]

منتديـآت شباب فلسطين .. من أحلى الأشياء بحياتي ..

تاريخ تسجيلي كان بـ 11/10/2006 ..

وقتها مش متذكرة بالزبط كيف لقيت حالي بالمنتدى :ShababSmile225:

على ما أعتقد فكنت عم ببحث ع شي بجوجل ، والقدر خلاني أضغط ع رابط المنتدى :ShababSmile229:

كان أول منتدى بفوت عليه

وحتى ما كنت عارفة شو يعني منتدى :ShababSmile235:

سجلت فيه ، وصرت أشآرك ..

بتذكر اني كنت أكتب بالاحرف الانجليزية :ShababSmile221:

لاني اصلا ما كنت أستعمل العربي ع الكمبيوتر ..

أول ما قررت إني أكتب بالاحرف العربية ، تعذبت !

بس بعدين تعودت .. وصار أسهل من السهل :ShababSmile250:

[إسراء الفلسطينية]

لما إجينـآ ع الدنمـآرك قعدنا حوالي 3 سنين لحتى أعطونـآ إقـآمة بالبلد

وبهل 3 سنين كنا ساكنين بمكان خاص باللاجئين

كل عيلة بكون الها غرفة .. وبكون المطبخ والحمام مشتركين ، يعني مش النا لحالنا :ShababSmile239:

كانت أيام صعبة أكيد ..

أهلي كانوا عايشين على أعصابهم ، لان كان بين اليوم والتاني يقدروا يسفرونـآ

ما كان عنا قرايب هون .. ولا كنا نعرف حدا !

رب العالمين فرجها علينـآ .. وأعطونا الإقامة وإستقرينـآ :)

,

,

رآحت إيام واجت إيـآم .. وبلشنـآ نأسس حالنا ببلد ما منعرف شي فيها ..

بس ع الوقت الواحد بتعود :)

http://files.shabab.ps/vb/images_cash/up15/120510163658W6Ny.jpg


المنطقة يلي سكنا فيها ، ويلي ساكنين فيها لهلا ساعدتنا كمان

منظقة بيسكنها عدد كبير من العرب ..

وللاسف هي المنطقة الاكتر مشاكل :ShababSmile239:

[إسراء الفلسطينية]

شو بعد بدي أحكي ؟

يعني متل ما شايفين ما في ترتيب بالشي يلي عم بحكيه

يلي بيجي ع بالي عم بحكيه :ShababSmile250:

http://files.shabab.ps/vb/images_cash/up14/110422172329W7DQ.gif




[ شخصيتي ]

مممممـ

صعب الواحد يوصف حالو !

بس أغلب الناس بقولوا اني هآدية :)

انا كمان من النوع يلي ما بحب الحكي الزيادة ..

بس وقت الحكي بحكي :ShababSmile250:

قلبي ضعيف << وزيادة عن اللزوم كمان !

هل شي بكرهو فيني :ShababSmile239:

وكمان حسـآسة كتير :S

أي موقف ممكن يأثر فيني .. :ShababSmile235:

[إسراء الفلسطينية]

اي كمان شغلة ..

لغتي العربية للأسف مش كل هل قد !

خصوصا اللغة الفصحى ..

يعني مثلا لما أكتب شي بالمنتدى

ممكن أقعد شي نص ساعة وانا أفكر يا هل ترى الجملة هيك مزبوطة..

وياما مرات أكون بدي أكتب كلمة ، وما بعرف شو معناها بالعربي :ShababSmile235:

http://shabab.ps/vb/images/icons/Shabab16.gif http://shabab.ps/vb/images/icons/Shabab16.gif http://shabab.ps/vb/images/icons/Shabab16.gif

أكيد أغلبكم ما بيعرف هل شي ..

لانو أصلا صعب تعرفوه :ShababSmile225:

مش بس بالكتابة ..

حتى لما أحكي .. مرات بتلخبط وبحكي كلمات ما الها صلة بالعربي أصلا :ShababSmile235:

وبصيروا بتمسخروا عليّ ! :(

بس الحمد لله .. بعترف انو في غيري أضرب مني بكتير

لا بيعرفوا يكتبوا ولا يقرأوا عربي .. ولا حتى بيعرفوا يحكوآ !


http://shabab.ps/vb/images/icons/Shabab16.gif http://shabab.ps/vb/images/icons/Shabab16.gif http://shabab.ps/vb/images/icons/Shabab16.gif


المنتدى ساعدني كتير بتقوية لغتي العربية ..

لان قبل ما كنت أقرأ عربي كتير .. ولا حتى أكتب

الا لما يكون عنا وظيفة كتابة بالمدرسة العربية << بكون شي بسيط كتير ، يعني مش بهل مستوى العالي ..

//

بما انو عم نحكي عن اللغات

فبعرف غير العربي أحكي دنماركي ، انجليزي وفرنسي :ShababSmile248:

[إسراء الفلسطينية]

الذين يشاهدون محتوى الموضوع الآن : 4 ( الأعضاء 4 والزوار 0) ‏إسراء الفلسطينية (http://shabab.ps/vb/member.php?u=5471), ‏حسام المصرى (http://shabab.ps/vb/member.php?u=24945), ‏Maгaм .. ~ (http://shabab.ps/vb/member.php?u=15335), ‏~ثــلــج~ (http://shabab.ps/vb/member.php?u=27230)+


حسآم ، مرآم ، ثلج :)

أسعدني وجودكم ..

منورين والله :ShababSmile240:

[إسراء الفلسطينية]

ههههههههههه

أبو مجاهد & حورية

شفت ردكم :ShababSmile233:

..

هيــآآني إجيت :]

هل ايام لانو عطلة .. فعم ننشغل كتير بالزيارات .. :ShababSmile235:

من شوي بس إجيت من السويد

السويد قريبة كتير علينآ .. ما في نص ساعة بالسيارة ولا نحنا منكون هناك :)

أهل إمي أغلبهم ساكنين هنـآك ..

فرحنا زرنا خالتي وخالي وستي :ShababSmile248:

,

,

لما رحت عند ستي حسيت بشي غريب

جدي توفى هديك السنة بـ 25/5 ..

هوي بكون جدها لامي

كتير بحبوو و وقت وفاته زعلت عليه كتير :ShababSmile223:

كل ما أروح عندهم ع البيت بحس روحه لساتها موجوده

بتذكر يوم دفنه ..

كان أول مرة بحياتي بشوف إنسان ميت قدامي !

كانوا مغسلينه ومكفنينو .. وقربت عليه وبستو ، ودموعي نزلت ع خدووو :ShababSmile223:

ما بنسى أبدا منظره وهوي ميّت :((

الله يرحمــــه ويغفرله يآآآ رب :ShababSmile223:

,

,


جدي تعذب كتير ، وانحبس 22 سنة ظلم بسوريـآ :S

كان دايماً يحكيلي عن فلسطين ..

ولما رحنا على حدود فلسطين مرة .. رآح معنـآ

كان متل الطفل .. وكان وقتها متأثر كتير !

..

سبحان الله ..

مش عارفة كيف حكيت كل هل حكي عن جدي ، مع انو ما كان ببالي أحكي عنو ..

:ShababSmile223:

[إسراء الفلسطينية]

http://files.shabab.ps/vb/images_cash/up14/110424223704ntYG.jpg

بدي أحكيلكم عن قصة صارت معي لما كنت صغيرة

ما بنساها أبداً !

كان عمري حوالي 5-6 سنين ..

مع اني كنت صغيرة ، بس متذكرة هل حادثة كتير منيح !

كنا ناقلين ع بيت جديد .. هوي كان عمار قديم ومش كل هل قد

بس قعدنا فيه مؤقتاً ..

المهم !

كنت انا واختي وامي لحالنا بالبيت ، وأبوي كان بالسويد

كنت واقفة انا واختي الأصغر مني بسنة ع الشباك

وكنا عم نتطلع لبرآ

كان تحتنا بالزبط وحدة عم بتلّعب إبنها بالطابة ..

أختي كانت مبسوطة .. وعم بتخبط ع أزاز الشباك

الشباك كان قديم طبعاً .. ومش منتبهين أهلي انو مش ثابت منيح :ShababSmile235:

وهيي عم تخبط انفك الشباك ..

تقوم أختي توقع لتحت !!

بتذكر منظرها وهيي مرمية ع الارض .. والدم متلي وجهها ..

وقتها بتذكر انو اجت الشرطة والإسعاف ..

وأخدوها ع المستشفى دغري

وانا وامي ركبنا بسيارة الشرطة :ShababSmile226:

و ع اللخمة رحت ومش لابسة برجلي :ShababSmile225:

الحمد لله انو اجت سليمة ..

مع انو الوقعة اجت ع راسها ، بس الحمد لله ما طلع في شي

كانوا الدكاترة متخوفين انو يكون صاير شي بعيونها

لان طولت لحتى قدرت تفتحهم ..

بس الحمد لله تعافت ، وكل شي رجع تمام :)

وبعدها بشي شهر نقلنا من البيت كلو !

:ShababSmile248:

[إسراء الفلسطينية]

هون لما الواحد يخلص توجيهي

ويخلص مدرسة ع الآخر .. بيعطوه متل هل طقية





http://files.shabab.ps/vb/images_cash/up14/110426192012aISa.jpg



من ورآ بكون مخيّط إسم الطالب ..

ومن العادات تاعونهم بصيروا الطلاب يكتبوا بقلبها رسائل ..

كل صيفية .. بتلاقي بالشوارع ناس كتير لابسة منها

وهل شي ببين انو نجح وخلّص توجيهي :ShababSmile226:

ما مصدقة وينتى يعطوني ياها .. وأخلص من هل هم :]

طبعاً لما وصيت عليها وأخدوا قياس راسي :ShababSmile221: قلتلهم انو ما بدي الصليب !

خليتهم يعملولي هلال ونجمة بدل الصليب تاعهم :)

لانو لازم يكون في علامة ، تبين الديانة :ShababSmile226:

ههههههههههههه شي بضحك ع فكرة :P

[إسراء الفلسطينية]

مممممـ

ما بعرف حدا من أعضاء المنتدى ع الحقيقة

الوحيدة يلي التقيت فيها هيي دموع الرحيل

التقيت فيها من سنتين لما نزلت ع لبنان

شفتها مرتين ..

وكانت لقائات ولا أحلى من هيك :ShababSmile240:

إنبسطت كتير بشوفتها ..

وإن شاء الله هل سنة ناوية ارجع شوفها هيي ووحيدة القمر :ShababSmile229:


http://files.shabab.ps/vb/images_cash/up14/110426212641aiDD.gif


نانا من أكتر البنات يلي تعلق قلبي فيهن http://shabab.ps/vb/images/ehdaa_smilies/eh_s.gif

متل أختي الكبيرة تماماً ..

قلبي من جوآ بحبهـــآ هل بنت http://shabab.ps/vb/images/ehdaa_smilies/eh_s.gif

تعرفت عليها من أول ما سجلت بالمنتدى

النا ذكريات حلوة كتير مع بعض

سهرآآتنا ع النت .. وأكلنا وشربنا مع بعض :ShababSmile229:

عنجد إيـآم ما بتنتسى :ShababSmile223:

الله يسهل عليهـــآآ حبيبة قلبي .. ويوفقهـــآ http://shabab.ps/vb/images/ehdaa_smilies/eh_s.gif

[إسراء الفلسطينية]

" هههههههههه أوكي يا حسام رح أحكيلك عن الدراسة :) "


[ درآستي ]

ممممـ بعتقد الدراسة هون أهون من البلاد العربية

يعني ما في حفظ عن غيب .. ولا في شي من هل نوع :ShababSmile233:

دروسنـآ والمواضيع يلي منكتبها كلها لازم تنكتب ع الكمبيوتر

وقليل لتلاقي استاذ بيقبل تسليم موضوع بخط الإيد

ممنوع أصلاً نكتب ع الورق .. الا الملاحظات والنوتس الخاصة فينا طبعاً

بيعتمدوا ع الكمبيوتر بشكل كبير ..

يعني بصفنا ممكن بحصة عادية تلاقي طلاب فاتحين الكمبيوتر .. وبيكتبوا فيه !

حتى الاستاذ لما بدو يشرح .. بستخدم اللوح الالكتروني يلي بكون موصول بكمبيوتر :)

,

,

لما كنت بالصف السادس والسابع

كناا ناخد حصص سباحة ، وحصص طبخ ، وفي سنة كنا ناخد فيها حصص نجارة كمان :ShababSmile221:

آآه وحصص موسيقى هههههههههه

هاي الحصص كل طالب لازم ياخدها ، يعني ما دخلها بالمدرسة ..

..

لما أخلص هل سنة إن شاء الله .. حابة أدرس IT AND HEALTH

هاي دراسة جديدة نوعا ما .. بتندرج تحت الهندسة

بس كلها عن التكنولجيا .. وتصميم آلات للعلاج ..

و الله أعلم طبعاً وين بيطلع نصيبنا بالدراسة :ShababSmile221:

//


بس ككل .. فنظام الدراسة سهل ومش معقد

والحمد لله :ShababSmile229:

[إسراء الفلسطينية]

{ طفولتي }


http://files.shabab.ps/vb/images_cash/up14/110428201302tqys.gif


أهلي بيحكوا انو طفولتي كانت غير كل أخواتي

بقولوا انو من انا وصغيرة ذكية وهادية :ShababSmile221:

كان عمري حوالي 4 سنين وكان بابا محفظني سور قرآن قصيرة ، وأول صفحة من سورة الرحمن

من أنا وصغيرة متعلقة كتير بأبوي .. ولحد هلا أكيد :ShababSmile229:

عندي أبوي بالدنيا كلها

وعلاقتي فيه قوية كتير ..

ما بشوف أب متلو :ShababSmile223:

منحكي كل شي لبعض .. وكإننا رفقة مش بس أب وبنتو !

بابا بيعنيلي كتير وأكتر ما بتتصوروا .. حيـآتي من غيرو عنجد سلطة :ShababSmile229:

الله يخليلنا ياه وما يحرمنـآ منو أبداً http://shabab.ps/vb/images/ehdaa_smilies/eh_s.gif

[إسراء الفلسطينية]

الذين يشاهدون محتوى الموضوع الآن : 3 ( الأعضاء 2 والزوار 1) ‏إسراء الفلسطينية (http://shabab.ps/vb/member.php?u=5471), ‏أبو يقين (http://shabab.ps/vb/member.php?u=4611)


يا هلا أبو يقين

منوّر والله :ShababSmile240:

[إسراء الفلسطينية]

[ حرب تموز ]


http://files.shabab.ps/vb/images_cash/up14/110501201203VL0W.gif



بسنة 2006 وقت حرب تموز كنا بلبنان

كان أول مرة بحيـآتي بعرف كيف الحرب ..

طبعاً الحرب بدأت فجأة .. ونحنا بإجازة هناك

وقت ما انخطفوا الجنود ، صرت اتمسخر وأقول .. أيواا بدكم هلا يصير في حرب :ShababSmile221:

انا حكيت هل حكي .. وبعد كم ساعة كانوا اليهود موجودين جواً وبحراً :ShababSmile235:

كنت خـآيفة كتير .. وأول مرة كنت بشوف هيك شي !

ما كنت أنام الليل .. وكنت دايماً خايفة :S

وقتها كنا ساكنين بشقة ع جبل .. يعني كل شي واضح من هناك

ما في شي بيتخبى !

http://files.shabab.ps/vb/images_cash/up14/110501201203VL0W.gif

بيوم من إيام الحرب .. كان رايح كم ساعة من غير قصف او اي شي

نزلت ع الدكانة يلي بنفس بنايتنا مشان أشتري ..

أنا فتت ع الدكانة من هون .. وقصفوا بمكان قريب كتير علينا من هون :ShababSmile235:

البناية كلها حسيتها اتحركت !!

وصار يوقع حجر صغير من فوق البناية ..

صرت أصرخ .. وما لقيت حالي الا نازلة تحت الطاولة

والزلمة صاحب الدكانة يقولي .. يا عمو ما تخافي .. خلص ما صار شي :ShababSmile250:

وانا ما كنت أستوعب !

يومها عنجد انحرجت ، بس ما كان بإيدي والله :ShababSmile221:

هل موقف لهلا ببالي ، وما بنساه أبداً !

[إسراء الفلسطينية]

الذين يشاهدون محتوى الموضوع الآن : 2 ( الأعضاء 2 والزوار 0) ‏إسراء الفلسطينية (http://shabab.ps/vb/member.php?u=5471), ‏أبومجاهد (http://shabab.ps/vb/member.php?u=189)+


هلآآ أبو مجاهد

منوّر الســآحة http://shabab.ps/vb/images/ehdaa_smilies/eh_s(9).gif

[إسراء الفلسطينية]

بحب السفر كتير !

سبحان الله .. الواحد بسافر من بلد لبلد وبلاقي إختلاف كبير

إن كان بالناس أو بالبلد نفسو ..

::

سافرت ع تركيا .. وكانت سفرة ولا أحلى

بلد كلها حضارة .. وفيها اماكن كتير بتحكي عن التاريخ الإسلامي

ما في متل الشعب التركي ، خصوصي مع الفلسطينيين

بحبونا كتير ، وبس كانوا يعرفوا اني فلسطينة كانوا ينبسطوا :ShababSmile229:


http://files.shabab.ps/vb/images_cash/up14/110501210905hTkO.gif


رحت ع المانيا أكتر من مرة

أهلي عندهم معارف كتير هناك ..

منروح لهناك بالسيارة

بتاخد معنا الطريق حوالي 7 ساعات :ShababSmile235:


http://files.shabab.ps/vb/images_cash/up14/110501210905hTkO.gif


وحكيتلكم عن السويد

مع انها بلد تاني .. بس لما أروح لهناك ما بحسها سفرة

لان يا دوب بتاخد الطريق نص ساعة :)


http://files.shabab.ps/vb/images_cash/up14/110501210905hTkO.gif


كمان سافرت ع لندن

مدينة حلوة .. وأحلى شي فيها الشقلبة يلي عايشين فيها

بالنسبة للسيارات يلي بتمشي عكس السير

شي بدوخ :ShababSmile235:


http://files.shabab.ps/vb/images_cash/up14/110501210905hTkO.gif


رحنا ع سوريا كمان ..

كنا ناويين نروح شمة هوا اسبوع ، ومن هناك نسافر ع لبنان

بس صار شي ما كان ع البال :ShababSmile239:

رح أحكيلكم عن هل سفرة إن شاء الله ..

[إسراء الفلسطينية]

ع حظكم انشغلت كتير هل ايام :ShababSmile235:

الدرآسة ماخدة كل وقتي ..

بـ 17/5 آخر يوم مدرسة ، ومن بعد هيك بصير بروح بعمل إمتحانات وبس

لهيك عم نعمل إمتحانات تجريبية هلا و حـآلة لا توصف :ShababSmile225:

..

فوق هيك عندي إمتحان تجويد يوم السبت

ضل الشفهي بس

اذا نجحت يوم السبت ، رح آخد الشهـآدة ..

إدعوولي ..

كل ما الاقي وقت عم فوت أكتب شوي

إتحملوني :ShababSmile248:

[إسراء الفلسطينية]

لما كنت صغيرة كنت أروح ع دروس سباحة

كتير بحبها !

ولهلا كمان :)

لما يصحلي أروح ع مسابح نسائية ما بقصر :ShababSmile248:

//

ممممـ

أبدا ما بحب القرائة :ShababSmile235:

زمان كنت أقرأ ، بس هلا لا

قليـــل كتير ، يعني بالصدف لالاقي شي كتاب يجذبني !


http://shabab.ps/vb/images/icons/Shabab15.gif http://shabab.ps/vb/images/icons/Shabab16.gif http://shabab.ps/vb/images/icons/Shabab15.gif


النت وما ادراك ما النت :ShababSmile235:

بقضي وقت طويل عليه ..

ع المنتدى ومواقع الاخبار و ع المسن كمان :ShababSmile226:

أغلب دراستي ع الكمبيوتر .. بس الحمد لله عندي سيطرة ع هل شي

يعني وقت الدراسة دراسة وبس :ShababSmile248:


http://shabab.ps/vb/images/icons/Shabab15.gif http://shabab.ps/vb/images/icons/Shabab16.gif http://shabab.ps/vb/images/icons/Shabab15.gif


ممممـ بحب قعدة البيت كتير :ShababSmile233:

يعني لو كان في عطلة ، فيه يمرق كم يوم من غير ما أطلع من البيت

وهاد شي عادي عندي :)

بنبسط بالبيت أكتر من أي مكان تاني..

بس طبعاً هاد ما بيعني اني ما بطلع مشاوير :ShababSmile226:

[إسراء الفلسطينية]

تأخرت كتير بهل موضوع :s

بس والله مش بإيدي

رح أحاول أخلص بهل يومين ان شاء الله

سامحونــآآ

:)

[إسراء الفلسطينية]

http://shabab.ps/vb/images/icons/Shabab17.gif [ رفقاتي ] http://shabab.ps/vb/images/icons/Shabab17.gif

الحلو لما الواحد يكون عايش ببلد مش بلدو

انو بيتعرف ع ناس أشكال ألوان !

يعني عندي رفقة / عرب من جنسيات مختلفة ، سوريين ، لبنانيين ، عراقيين ، مغاربة ، مصاروة

وعندي رفقات أتراك ، أكراد ، باكستان ، أفغان و صومـآل كمان :ShababSmile237:

//

لما كنت أصغر من هيك كنت مرافقة بنات دنماركيات

بس بعد هيك ، بطّلنا نتفق ..

لان بتصير إهتمامتهم ما بتناسبني ،

ولهيك صارت علاقتنا سطحية .. وفي منهم إنقطعت العلاقة معهم بالمرة :)

[إسراء الفلسطينية]

{ فلسطيـــن .. ~

من نحنا وصغار كانوا أهلي دايما يحكولنا عن فلسطين

ودايمـاً كنا نتابع كل الفعاليات يلي بتتعلق بفلسطين :)

إتعلق قلبي فيهـآ ، من غير ما أشوفها..

مجرد الحكي عن فلسطين .. خلآني أحبها كتير .. كيف لو شفتها وعشت فيها !

..

مرة لما كنت بالصف الخامس ..

رحت ع المدرسة ، ولبست حطّة فلسطين ( هاي يلي عليها علم فلسطين ع كل جنب )

قالتلي المعلمة .. إسراء أحسن لو بتقيميها .. !

انا ما قبلت وضليت لابستهـآ !

فجأة ما بلاقي الا مديرة المدرسة طالبة تحكي معي

نزلت لعندها ، وقعدت تحكيلي .. انو هل شي يلي انتي عملتيه ما بصير

لان عنا بالمدرسة ما بدنا نعمل أحزاب ، ونفرق الطلاب ومش عارفة شو :ShababSmile235:

وقتها قامتلي ياها غصبن عني ..

وقالتلي روحي ضبيها بشنتتك وما تعودي تلبسيهـآ ع المدرسة مرة تانيه :(

شافتني زعلت .. وقال راضتني بشوكولاته :ShababSmile108:

صرت بعدين بالجئارة ألبسها بالسرقة هههههههههههه

مفكرة حالها انها ضحكت عليّ :ShababSmile226:

[إسراء الفلسطينية]

الذين يشاهدون محتوى الموضوع الآن : 3 ( الأعضاء 2 والزوار 1) ‏إسراء الفلسطينية (http://shabab.ps/vb/member.php?u=5471), ‏نابلسية كححح (http://shabab.ps/vb/member.php?u=9039)+


نـآبلسية ..

يا هلا والله :ShababSmile237:

..

وبالزائر كماان .. منوّر مين ما كنت تكون :ShababSmile221: