الامور والاموره بحبه ببعض ،، منجوزهم ونخلص ،، بلاش فضايح

[ŶǾỰŞỆḞ λļ-ΫỐ√§ềƒ]

بسم الله الرحمن الرحيم

سلام ربي عليكم أحبتي


،، موضوعنا اليوم ،، بحكي عن آفه هيمنت على عقول أغلب الناس ، ونحن هنا نتحدث عن الشباب والشابات المسلمات ،،
والآفه هي (((( الاختلاط بين الجنسين)))))،،
خلينا افكها شوي واحكي بالعاميه ،، لارتاح بتوصيل الهدف من طرح الموضوع واريحكم بفهم الفكره
ما بدي ابعد ،، هينا هان بالمنتدى ،شباب وشابات ،، انا شب بكتب بموضوع وتعبان فيه ، بتيجي اخت فاضله بترد ع موضوعي رد بسيط ، وكلماته مرموقه وجميله وبراقه ، بقرأ الرد ، قلبي بسير يزغرت ، فبسير موضع اهتمامي اني احط مواضيع ، لاستنى ردود من هاي الفلانه ، وكمان لما تحط مواضيع ، بعمل نفس الشي ،،،،،،،،،،،،،،،،،،،........... :: قصه فاشله ،،،،،،،،،، وما بتسير ، لانه احنا بمنتدى اسلامي ،،،، نحذف القصه DELETE

نروح ع قصه تانيه ، انا شاب ملتزم والي لحيه وشخصيه ، وابن فلسطين وكل يوم بالمسجد وكل صلاه بصلاتها وبعطي دروس بالمساجد و مجاهد في سبيل ربنا وكل يوم سياره من الحركه الفلانيه بلون جديد وموديل جديد ، وكل شهرين بمسدس جديد و كل اسبوع بنوع بالزبه العسكريه ، ومره بطلع من بيتي وع وجهي اللتمه ومره لا ،، هاده شي عادي ، مو يعني اني متعلق بديني ما اعيش شبابي ،، لا عادي يا ابني عيش ،، انت انسان رائع ، يوم من الايام وانا رايح ع الجامعه مشخص ، اكيد لبسي بكون من نوع محدد ،، بنطلون منفخ وبلوزه ما فيها حركات ،، وبستار في الرجلين ومسدسي تحت البلوزه ، بس اكيد امبين ،،، لانه البلوزه مو واسعه كتير ،، عشان ابين عضلاتي ،، واكون ليا هيبه بين الناس ،، انا مو بقصدي اتكبر ،، لا ، بس بحب اكون لامع بين اقراني ،، ركبت سيارتي ورحت ع الجامعه ، بالطريق عند اشاره مرور وقفت لاستنى الاشاره تسير خضره ،، ومشغل اناشيد وصوتها مو عالي بس مسموع ،، الا هيا بنت من نفس نوعي (( يعني زي شرعي ،)) بتمشي من امامي واطلعت فيا ،،،، STOP ،،، نرجع بالشريط ،، كان مجاهد ، ابن مساجد ، على عيني وراسي ، بس كيف اطلع ع بنت ،، اقلك ،، الموضوع عادي عينه وقعت بالغلط ،، المهم ، عجبته ، الحل ،اروح عند ماما واقنعها تزوجني ، بس انت صغير ، ويادوب مصروفك من ابوك ومن جهات تانيه مكفيك ،، لا بدي اتزوج ،، ويروح لامه الطيبه ، ياما انا ابنك الي بحبك ،، بدي اتزوج ،، حاسس الفتن بدت تحوطني ، وبحاول ابعد عنها ، بس خايف اقع فيها ،، الام: والله يا ابني راسي دايما مرفوع فيك ، وبفتخر انك ملتزم ، وعشان هيك راح اكلم ابوك عشان اروح ادورلك ع وحده تصونك ، وراح نسكنك ببيتنا القديم كمان ،، الله يحفظك يا ولدي ويخليك ،، الابن : ليش ياما دوري العروسه جاهزه بس عليكم تروحي تطلبوها ،، Stopppppppppppppppppp،، هو قال ، خايف يقع بالفتن فبده يبعد ، فكيف في وحده عاجباه وبده يتزوجها ،، ،،،،،،، شو احكي ، هيك الدنيا ،،

القصه احتماليت وقوعها ضئيله ،لانه شب ملتزم ما بسوي هيك،، اوك ،،، نحذفها ،،،،،،،،،،،،،،،،،،، DELETE


طيب نوع جديد ،، قصه فريده من نوعها ،،
بطل القصه ، اسمه ميمي ،،" ليش علامه الاستغراب الي انطبعت ع وجهك ، اسمه الحقيقي مدحت بدلعوه ميمي ، عادي جدا ، ما فيها شي " نكمل القصه
اخونا في الله عمره 19 سنه ، بدرس في الجامعه ، بس محروم ، لانه بدرس في الجامعه الاسلاميه ، وهي مفصول فيها الجنسين ، يا حرام ، شو ذنبه الغلبان ،" نصيبه هيك "
ميمي طبعا ، شعره كبير وطويل ،، بس مو طول الشعر الي احنا بنعرفه ، لا هاده طويل لفوق ،، بعمله متل برج ،، يمكن ميمي قصير وبده يطول حاله بشعره ، عادي جدا ،، ميمي ،، ليهم بنت جيران ، بنادوها جيجي ، تستبعدوش ،، شو بده يطلع من ورا ميمي ، اكيد ما راح يطلع اسم بنت الجيران فاطمه او خديجه ،، لالا ،الطيور ع اشكالها تقع ،،المهم ، كانوه هدول العصفورين البريئين بحبه بعض ،، ياي ، بحبه بعض ،، ايوه بحبه بعض ،،
القصه بدت تحلو يا شباب ،، هههههه ،، كل يوم بشوفه بعض وهما رايحين ع الجامعه وهما مروحين بتفقوا يتقابله بمكان عام ،طبعا ميمي الدراسه بوادي وهو بوادي والاموره جيجي اكيد مش احسن منه ، مرت الايام والحال متل بعضه ، ميمي بدرس تجاره ، ومعروف اغلب شباب المساجد و المقاومه بدرسه تجاره ، ما بعرف ليش ،، بس هاي ظاهره ، المهم اتعرف ميمي على كم شب ملتزم ،" نسيت احكيلك ميمي دلوعه الماما والبابا ، يعني وحيدهم " فحكي لماما وبابا اتعرفت ع واحد زي العسل ، الماما : شو اسمه يا حبيبي ، ميمي : اسمه ابومعاذ ، الماما: يا مامي ، شو هالاسماء الارهابيه ، انا ازعل منك ، لا تعرف هيك ناس ، بدك عمو اوباما يزعل منا ،، ميمي : لا ياماما والله انه واحد كويس ومؤدب ، الماما : انا مخاصماك لعند ما تئطع علائتك بهاده الارهابي ،
ميمي اخد ع خاطره المسكين وراح كلم العصفوره التانيه ، راح حكالها القصه ، شو ردت العصفوره جيجي ،،
هدول الناس معأدين كتير ، يا ميمونتي ليش انا ما بكفيك لاكون صديئك الوحيده ، هدول الناس راح يبعدونا عن بعض ويدمره ئصه حبنا الشريفه :ShababSmile226: " الشريفه " اوك
فبعد عنهم تحت الضغط والعنفوان ،،

قصه قليله ادب ، وما بتسير عند المسلمين ،، اوك نحذفها ، انا اصابعي تعبه من الكتابه والحذف ،، DELETE


خلص ما بدي احكي قصه بدي ادخل ع الموضوع مباشره

بعد ما أنا صدعتكم ،، بدي اعرف شو رايكم بالاختلاط ،، وهل الاختلاط بالمنتديات الاسلاميه ،، مؤدب ، ولا بصير فيه ، حالات هيك وهيك ؟؟؟؟؟؟؟؟؟؟؟؟؟؟؟

وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ،؟؟؟؟؟؟؟؟؟؟؟؟؟؟


وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟؟؟؟؟؟؟؟؟؟


وهل يحق للشب او الفتاه في اي عمر الاعجاب والحب باي انسان ،، ؟؟؟؟؟؟



بستنا ردودكم بعد ما شفتم القصص الحقيقه الي بتصير بمجتمعنا المسلم

[sadness eyes]

اولا اشي راي بالاختلاط بالمنتدى اشي عادي مااظن في منتدى كلو شباب ومنتدى كلو بنات وازا اسلامي

حسب تعامل الاعضاء مع بعض ممكن يكون في احترام وممكن العكس .

تاني اشي الاختلاط العام وين مابتروح في اختلاط صار وممكن يأثر وممكن لاء حسب الشخص برضو وتربيتو.

تالت اشي الحب قبل الزواج انا ضدو وازا صار جيزه بعد قصة حب هادا مكتوب بس برأي اتجنب اشي حيوجع

راسي وما اضمن حالي حتجوز هالشخص بعد الحب هادا .

رابع اشي ومن حق اي شخص يعجب بشخص هاي مشاعر مش انت بتتحكم فيها بس بتقدر تتحكم

بتصرفاتك وماتغلط والحب اشي مو بأيدك بصراحه بس الواحد يتجنب الغلط ومايحط حالو بموقف مو حلو .

&

موضوع حلو يعطيك العافيه

^,^

[PaLeSt!Ne SouL]

و عليكم السلام و رحمة الله و بركاته

مش ضايل الا تعمل دليت للموضوع كله :)

عجبتني طريقة طرحك للفصص

الاختلاط بالمنتديات الاسلامية :

مش كل واحد بيكون مسجل بمنتدى اسلامي بيكون مؤدب يعني ممكن يحصل شي غلط
لكن اكيد القائمين عالمنتدى بيتصرفوا معهم
و بالغالب بيضل بحدود الادب و التعامل كاخوة


وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ؟
حسب الشخص ايمانه و خوفه من الله و درجة تاثره باللي حواليه
في ناس رح تتاثر سلبا و في ما بتاثر عليهم

لكن ما دام ما في ضرورة للختلاط ليش نفتح بابا من ابواب الفتنة
نبعد عنه احسن

وشو رايكم بالحب الفاشل ،( الي قبل الزواج ) ،، ولو كانت كمان نهايته زواج
فاشل
و حتى لو نهايته الزواج فاشل بيضله
لانه بالغالب ما في ثقة بين الطرفين
و بيصير كل واحد يحكي اكيد كان /ت تعرف حد غيري
و ما بنى على باطل فهو باطل

وهل يحق للشب او الفتاه في اي عمر الاعجاب والحب باي انسان ،، ؟؟؟؟؟؟
انه اعجب بشخص معين او بتصرف اله فهاد يضله بالقلب ما اترجمه لفعل
و بالغالب الاعجاب بيمر بسرعة يعني بعجب بمظهره لكن لما يتكلم بتتغير نظرتي اله
و ما بيوصل الاعجاب للحب انه اضل افكر فيه و هيك

اما اذا وصل للحب اعرف انه القلب فارغ لانه احب شخص ما بعرفه منيح كتير
!!
شئ غبي بصراحة



يعطيك العافية يوسف

[اسد 22]

وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ،؟؟؟؟؟؟؟؟؟؟؟؟؟؟
طبعاً إذا كان في مدرسة أو جامعة مثلاً وحكمه حرام وأتيك بالادلة أيضاً حتى في المسجد النساء في أخر صف

ومن يرى الوضع في المدارس والجامعات يعرف النتائج
وهذا لا يعني ان لا نتعلم أو لا نعلم بناتنا ولكن الدولة حسبنا الله ونعم الوكيل عليها

وفي حالة وجود مدارس للبنات فقط او جامعات بيعث البنات في الجامعات للبنات في حالة إن وجد

وفي حالة إن لم تقبل في حالة عدم وجود مجال نعلمها نعلمها ونقول حسبنا الله ونعم الوكيل عن المسؤل وذلك لكي لا يسطر الطائشين على مجتمعنا

ومستعد لأتيك بالادلة الشرعية على حرمة الاختلاط الذي يؤدي للمفاسد وليس كالحج

الأختطلاط اصطلاحاً

فهو اجتماع الرجال بالنساء غير المحارم اجتماعاً يرفع الكلفة و يزيد الألفة وهو كذلك تزاحم بالأبدان وتماسها.

اما في المنتديات ما قمنا بمنع الامرو التي تؤدي إلى المنكرات وما يكتب يرى على مرئى الاعين لا بأس

سألت فتاة احد الشيوخ انها تريد أن ترسل رسالة لأاستاذ لتسأل ولكن أمام أخوتها الشباب ما الحكم

أجابها أن كانوا هم الذين يرورن ويكتبون لا بأس

وهذا رأيي ان تحجب نفسها فالحجاب معناه هو الساتر ويُراد به في الشَّرع ما يَمنع الفتنة بين الجنسين ، ويتحقَّق ذلك بسَتْر العوْرة والغَضِّ من البصر، ومنع الخُلْوة والكلام اللَّيِّن واللَّمس.


وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟؟؟؟؟؟؟؟؟؟

رأي إن كان يحبه جد ورسالة إن كنت تحبها ما تكون بسبب غضب ربنا عليها

إن كنت تحبها خاف عليها من عذاب القبر إن كنت تحبها الرابط للعاشقين فقط

http://www.youtube.com/watch?v=GInMPafp1AA&feature=player_embedded
وهل يحق للشب او الفتاه في اي عمر الاعجاب والحب باي انسان ،، ؟؟؟؟؟؟

الحب اخ بس طبعاً سن الطفولة مقلد دون السن السابعة لا يستطيع التميز بين الصح والخطأ ويكن مقلد

والتربية لها دور فحب الله وحب الرسول وحب الصحابة والإعجاب بهم والأقتداء بهم

وليس ما نراه في واقعنا وحسبنا الله ونعم الوكيل

جزيت خيراً على الموضوع

[إيمـان]

http://shabab.ps/vb/images/icons/Shabab10.gif

بعد ما أنا صدعتكم ،، بدي اعرف شو رايكم بالاختلاط ،، وهل الاختلاط بالمنتديات الاسلاميه ،، مؤدب ، ولا بصير فيه ، حالات هيك وهيك ؟؟؟؟؟؟

حسب الاشخاص ونياتهم هيــه في حلـآت هيك وفي هيك :ShababSmile250:بس الآغلب ..{مــؤدب}..:ShababSmile229:

وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ،؟؟؟؟؟

طبعــآ لآنــو الرجآل عيونهم 6 ع 6 .. والنسوآن هل المكيآج .. والعطر :ShababSmile239:



وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟؟؟؟

آنتــآ حكيــت فآشــل ... والزوآج حيكون آفشل من الفآشل :ShababSmile239:





وهل يحق للشب او الفتاه في اي عمر الاعجاب والحب باي انسان ،، ؟؟؟؟؟؟

لـآ طبعــآ .. صــح آحنآ بنمر في سن المرآهقــه وبتصير عقولنآ تلف يمين شمآل :ShababSmile239:

بآي آنســـآن :ShababSmile239: لآطبعــآ :ShababSmile239:


http://shabab.ps/vb/images/icons/Shabab10.gif

[PaLeStiNe FlOwEr]

و عليكم السلام و رحمة الله و بركاته

مش ضايل الا تعمل دليت للموضوع كله :)

عجبتني طريقة طرحك للفصص

الاختلاط بالمنتديات الاسلامية :

مش كل واحد بيكون مسجل بمنتدى اسلامي بيكون مؤدب يعني ممكن يحصل شي غلط
لكن اكيد القائمين عالمنتدى بيتصرفوا معهم
و بالغالب بيضل بحدود الادب و التعامل كاخوة


وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ؟
حسب الشخص ايمانه و خوفه من الله و درجة تاثره باللي حواليه
في ناس رح تتاثر سلبا و في ما بتاثر عليهم

لكن ما دام ما في ضرورة للختلاط ليش نفتح بابا من ابواب الفتنة
نبعد عنه احسن

وشو رايكم بالحب الفاشل ،( الي قبل الزواج ) ،، ولو كانت كمان نهايته زواج
فاشل
و حتى لو نهايته الزواج فاشل بيضله
لانه بالغالب ما في ثقة بين الطرفين
و بيصير كل واحد يحكي اكيد كان /ت تعرف حد غيري
و ما بنى على باطل فهو باطل

وهل يحق للشب او الفتاه في اي عمر الاعجاب والحب باي انسان ،، ؟؟؟؟؟؟
انه اعجب بشخص معين او بتصرف اله فهاد يضله بالقلب ما اترجمه لفعل
و بالغالب الاعجاب بيمر بسرعة يعني بعجب بمظهره لكن لما يتكلم بتتغير نظرتي اله
و ما بيوصل الاعجاب للحب انه اضل افكر فيه و هيك

اما اذا وصل للحب اعرف انه القلب فارغ لانه احب شخص ما بعرفه منيح كتير
!!
شئ غبي بصراحة



يعطيك العافية يوسف

100%

رد دمعة .. نفس الي ببالي بالزبط ..~

موضوع رائع بطرحه

شكرا يوسف ..~

[Maram .. ~]

بعد ما أنا صدعتكم ،، بدي اعرف شو رايكم بالاختلاط ،، وهل الاختلاط بالمنتديات الاسلاميه ،، مؤدب ، ولا بصير فيه ، حالات هيك وهيك ؟

الاختلآط إشي لآ بد منو بهالوئت ..

ازا مآ كآن بالمدآرس فـ بالجآمعـآت , و إزآ مو بالجآمعآت بالشغل ..

و بالنسبة للمنتديـآت الإسلآمية // أكيد بسير فيهـآ هيك شغلآت بس إزا الإدآرة مآسكة الأعضآء مآ بكون في تجآوزآت ان شـآللهـ ,,


وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ،؟

حَسب ., إزا الشخص جآي يلعب أو غآيتو مش منيحة .. بتخرب الأخلائ طبعاً ,,

بس ازا الينت او الشب ملتزم حدودو و كل واحد بحآلو .. فـ مش كتير بتأثّر ~


وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟

99.9% زوآجهُم فآشل للأسف ..

لإنو الحب أعمى :/


وهل يحق للشب او الفتاه في اي عمر الاعجاب والحب باي انسان ،، ؟

الإعجـآب هآد مو باليـد

بس لو ضل بالئلب

أمآ يحكو لبعض و مآ بعرف شو // حكي فآضي ~


::

طريئة طرحك للئصص حلوة كتير :ShababSmile221:

و موضوعك مهم :)

يسلمو إيديكـ ~

[أســـآمـة]

شو رايكم بالاختلاط ،، وهل الاختلاط بالمنتديات الاسلاميه ،، مؤدب ، ولا بصير فيه ، حالات هيك وهيك ؟؟؟؟؟؟؟؟؟؟؟؟؟؟؟
فـي الـمنتديـات الإسـلاميه الإختلاط بالـتأكيد يكـون فـي حدود الأدب و الأخلاق ،،

و أخص هنـا المنتديات الإسلاميه فقط التي غالباً مـا تنشـر الأخلاق و الفضيله بين الأعضاء ،،

ولا شك بأن هناك حالات ستحيد عن القاعده و تخل بالآداب لكن سرعان مـا يُقضى على هذه الحالات ،،


وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ،؟؟؟؟؟؟؟؟؟؟؟؟؟؟
الإختلاط بالمؤسسات و الجامعات يؤثر و بشكل كبيـر تِبـعاً لآخلاق الـشخص و آدابه،،

إن كان الشخص حسنُ الخُلُق مُهذب النفـس فـلن يتأثـر مُطلقـاً ،،

أما إن كان الشخص نقيض الشخص السابق فمؤكـد أنه سيتأثر و سيغرق فـي مستنقع الشهوات،،


وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟؟؟؟؟؟؟؟؟؟

كـمـا أسلفت : حـب فاشـل ،،

و حتى إن إنتهى بالزواج فغالباً ستكون حياه زوجيه هشه سرعان مـا تنقضي و تفشل ،،


وهل يحق للشب او الفتاه في اي عمر الاعجاب والحب باي انسان ،، ؟؟؟؟؟؟

مُمكن ينقسـم الإعجـاب إلى إعجابيـن :

إعجاب بالشخص نفسه أو إعجاب بفعل الشخص و طباعـه،،

الإعجاب الثاني برأيي هو الإعجاب الذي ينبغي أن يكون سائد بين الأشخاص و الذي لا شيء فيه،،

[ طـرح رائـ ع و موفق دُكتور يوسُفْ ]

{:ShababSmile116:}

[Dr.Yaso]

اول شي طريئة طرحك للموضوع كتير حلوة و طريئتك بسرد الأصص.. لأ و بالاخر بتؤول خلونا

نفوت بالموضوع انا بؤول ليش مش هي هادا الموضوع؟؟ :ShababSmile221:

و هلآ ردي عليك ،،

بعد ما أنا صدعتكم ،، بدي اعرف شو رايكم بالاختلاط ،، وهل الاختلاط بالمنتديات الاسلاميه ،، مؤدب ، ولا بصير فيه ، حالات هيك وهيك ؟؟؟؟؟؟؟؟؟؟؟؟؟؟؟

سدئني الي بدو يغلط او انو بنيتو شي رح يعمل هالشي بمنتدى اسلامي او غير اسلامي

بس بتهيألي انو رح يصبر فترة بعدا بتعب و بروح.. او انو ممكن يصير هيك شي بس ع السكت

يعني انا اعجب بواحد من ردودو و كلامو بس طبعا ما بتوصل لدرجة انها تصير اصة و تكبر متل

ما حكيت لأنو منتدى اسلامي يعني كلو حيكون جواتي و ما رح يطلع لبرة

وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ،؟؟؟؟؟؟؟؟؟؟؟؟؟؟

بتهيألي هادا برجع للشخص نفسو و تربيتو.. لأنك لو متربي صح ما بتعمل شي وين ما كنت

اما لو تربايتك غلط رح تلائيلك طريئة تعمل فيها الغلط حتى لو انت بوسط مش مختلط و مع شباب بس

وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟؟؟؟؟؟؟؟؟؟

الفشل مش شرط.. الا ازا كان الامور و الامورة بعرفو ميت شخص غير هالشخص ..

اما لو هالامورين ما عرفو حدا غير بعض ممكن ينجح.. الاصة نسبية و بتعتمد ع الشخصين

وهل يحق للشب او الفتاه في اي عمر الاعجاب والحب باي انسان ،، ؟؟؟؟؟؟

لأ طبعأ لأنو الي بحب فترة المراهقة فهادا ما فينا نسميه حب ،، يعني مجرد مراهقة او نزوة

و اول ما هالشخص يكبر رح تتغير مشاعرو و يتغير تفكيرو.. فأكادي مش اي عمر بكون مناسب

بستنا ردودكم بعد ما شفتم القصص الحقيقه الي بتصير بمجتمعنا المسلم

عيش كتير بتشوف كتير :ShababSmile221:

[William Fichtner]

مسا الخير

برضو بقول بهالزمن زمن عصري غريب عجيب ،، ما بنقدر نحتكم لكل اشي بحياتنا للدين بحذافيرها ،، واركز على حذافيرها ،، بس فيه امور عامه واضحه بالدين ،، وهاد المفروض نفهمه ونمشي عليه ،

وما تفكرو انه هالدين صعب ،، بعالعكس سهل وبسيط ،، بدو شوي عقل وتوكل على الله وبس

مش رايح احكي عن الاختلاط بالمنتدى ،، لانه بدنا نقعد نفتي مش رايحين نخلص ،،

والاختلاط بالاماكن العامه واضح ، عادي ،، طالما متوافر فيه عدم وقوع حرام تم ذكره بالشرع

الحب قبل الزواج عادي ،، خصوصا لو كان بمجال العمل ،، لانه بكون حب واقعي قدام عينينا ،، شايفين بعض وبنعرف شو بنفكر ،، والعواطف والمشاعر هاي من الله ،، بس بهالعالم الافتراضي لا اعتقد فيه أمل ،، ولا سالم هههه

مش عارف فيه جواب على حق الانسان بالحب ،، مين احنا تا نحكي او نقول انه بحق للشخص انه يحب ولا لا ،، يعني ما فيه اجابه عندي ،، بس بالنهايه الانسان اجتماعي بحب يتعرف وهالتعارف لا بد من ثمرات واحدى هالثمرات الاعجاب ،، وهالاعجاب يا بعطي ثمار طيبه يا سيئه

لك الورد والود

[ŶǾỰŞỆḞ λļ-ΫỐ√§ềƒ]

أول شي يا اخ William Fichtner
لما يكون إسمك المستعار إسم ممثل اجنبي ، هاده بدل ع حاجات كتير ، اكيد كلامي واضح
تاني الشي ، التفتح إلا انت فيه ما بنصحك فيه ، لانه بدون زعل جهل
وشو هالروناسيه هاي (((مش عارف فيه جواب على حق الانسان بالحب ،، مين احنا تا نحكي او نقول انه بحق للشخص انه يحب ولا لا )))
اسمع يا حبيبي يا طيب أولا الحب هاده قبل الزواج بتسمى حب حقير وسافل ، ومين احنا لنحكي عن حق شخص ليحب ، ههههههه هاده اكيد مو قصدك علينا ،، احنا الناس إلا الحق ، او شي تاني ، إذا راضي لاختك او اي حد من اهلك انه يحب وانت ما الك الحق بالحكم عليه او يحب في العمل لانه قدام عيونا ومشاعرهم واضحه ،، يا حجي انت مسلم او انا غلطان
اسمك المستعار بدل انه لا ، بس فالنفترض انك مسلم ، اذا اصحى ، احنا عنا إلي بفكر بهيك امر قبل ما يتزوج بنفصل راسه عن جسمه ، هاده دينا وقصه الحذافير ،، احنا دينا دين كامل ، يعني تطبيقه يكون بحذافيره وبكل كلمه وغير هيك بتكون مذنب اما قصه الحب الي معلق عليها والرومانسيه هاي ، وفرها للزواج ،، بس نصيحه من اخوك إلتزم بالحذافيؤ لتحفظ حالك،، لانه الي بتحكي عليه ما بده احنا ولا مو احنا لنحكم فيه ، لانه حرام انحكم عليه من سابع سماء

وسامحني لو كنت غليظ ، وانت الوحيد الي رديت عليه ،، لانه وجدت في باقي الاعضاء الروح الايمانيه الفذه ،، فكلامهم رد لكلامي مو محتاج تعليق ،، بس كلامك قتلني ،،

اتمنى ما تزعل بنضلنا اخوه ،،


سلام عليكم

[MoHaDe]

السلام عليكم ورحمه الله وبركاته
يعطيك العافيه اخوي
بس قبل ما ابلش بالرد عالاسئله والنقاش اسمحلي بانتقاد بسيط او زي ما تحكي نصيحه بتمنى تتقبلها مني بصدر رحب
بس اخوي لو سمحت لما تكتب موضوع وتكون جدي بالنقاش ابعد عن هادا الاسلوب مع احترامي الك بس بقلل من قيمتك وبخلي الناس تاخد الموضوع مسخره وكتير منهم بفهموش شو مطلوب من الموضوع اطرح الافكار عزيزي بشكل سلس ومتسلسل بدون الاسلوب الهجومي بعدين حط رايك عزيزي بالافكار الل كاتبها وتقبل افكار غيرك وراي غيرك عزيزي وبتمنى تتقبلها مني من اخ لاخو

وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ؟

مش شرط عزيزي يخرب الاخلاق او حتى ياثر عليها
الشخص اللي متربي مزبوط ومحترم دينه وعنده اخلاق بتاثرش باشي بكون اله بحاله
الله خلق للانسان عقل يفكر فيه عزيزي عشان يميز بين الصح والغلط فلما الواحد يشوف اشي غلط قدامه بفكر في وبشوف اذا صح او غلط واذا غلط ببعد عنه بحاول يصلحو بس اذا مزبطش ببعد عنه وبهيك بنكتشف انه اللي بخرب الاخلاق الشخص نفسه هو بسمح لحاله انه يقلل ادب وبكونش ملتزم بالاداب العامه وبالتالي بكون عنده خلل بتربايته اللي بتتاثر احلاقه باللي حواليه

وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟

عفوا اخوي بس عاي اساس اعتبرته فاشل
اذا الرسول يا اخي ما انكرش عالناس انهم يحبو وبتقدر تدور بتلاقي كتير احاديث بهالشان مضمونها انه دواء المحبين انهم يتجوزوا وانه اذا كان في شخصين اتقدمو لفتاه واحد بتحبه وبحبها والتاني عادي حكى الرسول انه الاهل يعطو البنت اللي بتحبه واللي دخل قلبها
المشكله عنا عزيزي الناس بتخلط بين الحب وشغلات تانيه
لانه اغلب الناس بتعرفش شو الحب المزبوط وبفكرو القصص بالمسلسلات او اللي بشوفو بحياتهم هو الحب وهادا غلط كبير لانه اغلب الناس اللي بحكو انهم بحبو بكون قصدهم ونيتهم سيئه وبكون اغلبهم تقليد وبكونوا يفكرو بشهوه وبالتالي عزيزي هادا بتقدرش تسمي حب ولا حتى اعجاب لانه مش العاطفه والحب اللي بطون بين الشخصين اللي بحكو انهم بحبو بعض
الحب الحقيقي انه الشخصين يهتمو لبعض وتكون نيتهم سليمه وميعملوش اشي غلط يضر حد منهم ويضر دينهم لانهم مش عاملين اشي من الكبائر يعني لما شب وبنت يحبو بعض وميعملوش اي اشي منكر وتكون نيتهم سليمه بدهم يتجوزوا وتكون اخلاقهم منيحه والتنين مبسوطين عبعض وبخافو عبعض واللي محركهم مشاعرهم شو المشكله بهيك حاله بالعكس بعيشو احسن من اي حد وبزمانا هادا هاي الطريقه احسن من التقليدي لانه شو استفدت اذا تزوجت من شخص كان عامل السبعه وذمتها قبل الزواج واضل بمشاكل لاني ما قدرت اتكيف مع الشخص اللي خطبته

وهل يحق للشب او الفتاه في اي عمر الاعجاب والحب باي انسان ؟

العواطف والحب والمشاعر الله خلقها بكل انسان عزيزي واجا الدين هذبها وبين طرقها ونتيجتها
وفش مانع اذا تنين اعجبو ببعض وكان اختيارهم سليم وحبو بعض وتكون نيتهم سليمه من الاساس انه بدهم الاشي الحلال اللي هو الزواج اللي المفروض يكون نتيجه الحب واهم اشي ميكونوش عاملين اشي غلط او اشي ضد الدين وبهيك عزيزي لكل الواحد الحق انه يعجب ويحب لانها الشغله مش بايده اصلا

تحياتي عزيزي وارجو ان تتقبل رايي بصدر رحب
واسف عالاطاله

[مشرفة عام]

مرسي عالموضوع وعلى طرحك الرااااااااائع تحيااتي

[Moon Tears]

السلام عليكم ورحمة الله وبركاته :

شكلي جايه متأخرة ع الموضوع..بس ولو كان حابه اعطي رايي فيه

ولو انو اظن ما حيعجب معظمكم ..لانو بخالفكم تقريبا بكل اشي : )


بعد ما أنا صدعتكم ،، بدي اعرف شو رايكم بالاختلاط ،، وهل الاختلاط بالمنتديات الاسلاميه ،، مؤدب ، ولا بصير فيه ، حالات هيك وهيك ؟؟؟؟؟؟؟؟؟؟؟؟؟؟؟


ممممم الاختلاط حاليا صار اشي اجباري مفروغ منه ..بالمدارس بالجامعات بالشغل بالشارع وين ما رحت في اختلاط
شو ممكن يصير نتائج عن الاختلاط هادا بيرجع للاشخاص نفسهم
ما دخل نحكم ع المنتديات الاسلاميه ومش اي حد بفوت منتدى اسلامي معناتو ههو ملتزم ..والله في ناس من فوق بتقول عنهم ادب وتربايه واخلاق ..بس تتعرف عليهم شوي بتلاقيهم ناس من حثاله المجتمع وصارت معي اكتر من مرة خخخ

وهل الاختلاط باي مكان عام او الشغل او الجامعه ، بخرب الاخلاق ، او بأثر عليها ،؟؟؟؟؟؟؟؟؟؟؟؟؟؟

هو ما بخربها اكيد بيأثر مهما كان يعني في شغلات بتكون شايفها كتير كبيره والمجتمع شايفها عادي مع الزمن بيصير تساهل بهالامور برضو بيرجع للبني ادم نفسه


وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟؟؟؟؟؟؟؟؟؟

انا مش شايفته فاشل ؟؟
ع أي اساس حكمتو انو فاشل ..تجربه اكم شخص ما بتعمم التجربة على الكل
وتجربة كل تنين مختلفه عن الاشخاص التانيين فانا بشوف انو كل تنين هم اللي بحكمو ع نجاح او فشل هالتجربه مش اي حد تاني ..وانا بعارض الاخوة اللي حكو ..مابني على باطل فهو باطل ..او لو تجوزو عمرها ما بتكون تجربه ناجحة لانو بيفقدو الثقه ببعض ..هالحكي مش مزبوط ..اللي بتحكو عنهم اللي بتكون مصاحبتلها عشرين واحد وحابه منهم 19 ..وهو مصاحبلو مليون بنت وحابب عشر ملايين هدول فعلا ما بيكون بيناتهم ثقه وان كانت ما بتطول !


وهل يحق للشب او الفتاه في اي عمر الاعجاب والحب باي انسان ،، ؟؟؟؟؟؟


يا سلااااام محسسيني انو اللي بيعجب بحد عامل شي جريمة لا تغتفر او غلط كبير ...كلكم مريتو بتجربه اعجاب ..وما حد يحكي ما مريت ..مستحيل
لانو هاي طبيعه البشر ومشاعر البشر اشي فطري موجود بكل انسان ..والاعجاب او يتطور لحب او غيرو عادي اشي طبيعي
بس الفرق انو في ناس بتتسلى بهالمشاعر ..وناس تانيه بتكملها بالزواج ..!

واخيرا بتمنى ما اكون دايقت حد بردي : )

شكرا ع الموضوع
تحياتي

[PaLeSt!Ne SouL]

وشو رايكم بالحب الفاشل ،( الي قبل الزواج ) ،، ولو كانت كمان نهايته زواج ؟؟؟؟؟؟؟؟؟؟


انا مش شايفته فاشل ؟؟
ع أي اساس حكمتو انو فاشل ..تجربه اكم شخص ما بتعمم التجربة على الكل
وتجربة كل تنين مختلفه عن الاشخاص التانيين فانا بشوف انو كل تنين هم اللي بحكمو ع نجاح او فشل هالتجربه مش اي حد تاني ..وانا بعارض الاخوة اللي حكو ..مابني على باطل فهو باطل ..او لو تجوزو عمرها ما بتكون تجربه ناجحة لانو بيفقدو الثقه ببعض ..هالحكي مش مزبوط ..اللي بتحكو عنهم اللي بتكون مصاحبتلها عشرين واحد وحابه منهم 19 ..وهو مصاحبلو مليون بنت وحابب عشر ملايين هدول فعلا ما بيكون بيناتهم ثقه وان كانت ما بتطول !


و انا كيف بدي احكم انه الشخص هذا حب مليون و لا هي حبت الف

علما بان نادر ما تلاقي حد بيعترف بانه حب قبل

كل واحد بيبين للتاني انه اول مرة اتعرف ع شب او بنت

مع انه بيعرف قبل كتير


يعني ما في دليل او شي يوجد القفة بين الطرفين

و بالغالب فاشل

اذا سمعتي قصة وحدة ناجحة بيكون مقابلها 1000 فاشلة !

[Moon Tears]

دمعة اسى :
و انا كيف بدي احكم انه الشخص هذا حب مليون و لا هي حبت الف

علما بان نادر ما تلاقي حد بيعترف بانه حب قبل

كل واحد بيبين للتاني انه اول مرة اتعرف ع شب او بنت

مع انه بيعرف قبل كتير


يعني ما في دليل او شي يوجد القفة بين الطرفين

و بالغالب فاشل
اهلا اختي ..بالنسبه لتعليقك انا رح اجاوبك كيف ؟!
اول شي هدول التنين اللي حبو بعض ما حبو بعض بين يوم وليله ..هيك اول ما شافها او شافتو حبتوووو ...هالاشي مستحيل ممكن تكون اعجبت فيه اما مش حبتو
وعلى هالاساس وبناءا على حكم الوقت ..رح تعرفي انو حب قبلها ستين مرة او تسلى بغيرها مليون مرة
واظن البنت الذكيه بتعرف كيف تكتشف انو هالشب بيحبها جد او بتسلى فيهااا ...
وهو نفس الشي بامكانه يحكم عليها مع الوقت والمعررفه ..وتأكدي الايام ما بتخلي اشي مخبى كل شي بيبان

وبالنسبه للثقه انا حكيتلك ما بعمم اي تجربه في ناس صريحين مع بعض وما انفقدو من هالعالم لسا في ناس منيحه
وانا شهدت اكتر من تجربه نجحت ..بنفس الوقت انا ما بحكي انهم يخالفو الشرع او يعملو اشي منكر زي ما تفضل الاخMoHaDe ولا يضلهم صايعين و 24 ساعه مع بعض
واذا مش عاجبك بعرف ناس شخصيا تعرفو ع بعض ع النت وتزوجو وماشاء الله عنهم وخالفو نظريات كل العالم انو زواج نت اول شي وعن حب تاني شي ...وبالاخر مش مهم حبو بعض قبل ولا بعد ولا كيف تعرفو ع بعض ..المهم انهم متفاهمين وهادا المطلوب ..والتفاهم ما بينفقد بين ليلة وضحاها الا اذا كانو من البداية بيكزبو على بعض ..ومن هون انا بقلك نجاح هالتجربه او فشلها بيعتمد ع الطرفين ونيتهم انو فعلا يتزوجو او يتسلو ببعض !!!!

كل الود غاليتي : )