صبايا بدي الكل يساعدي لو سمحتو :)

[rawaa]

مرحبا صبايا

بدي ياكم بخدمه بليز وياريت تساعدوني
انا هلا بالبيت اكبر بنت وانا اللي عم بطبخ مشان ماما مش هون ومابعرف اطبخ

باريت تعطوني هيك وصفات سهله وماتكون مقاديرها كتيره ومابدي شي يطلع جلي كتير يعني اليوم رح اكلهم مكرونه الين ماتعطوني وصفه اكل سهله بستناكم صبايا
واللي مابتعرف تروح تسال امها يلا بدي شي زاكي مشان مايدحكو على :ShababSmile221:

[PaLeStiNe FlOwEr]

شو بدك بالزبط يعني خفايف ولا طبخ

الله يشفيلك امك ويرجعها بالسلامة يارب

طمنينا عنها

بتعرفي تعملي مقلوبة وكبسة ومحاشي ولا ابعتلك الوصفات

[PaLeStiNe FlOwEr]

اسمعي انتي ضلك سوي رز

وخليهم يوكلوا ا مع لبن او سلطة زهئيهم

واكيد انتوا بالسعودية زينا بتعملوا دقوس سهل كتير

مع دجاج او مش ضروري وخلص بكفي هيك


هههههههههههه

جوعتلك اهلك

[rawaa]

مابعرف اعمل غير مجدره :)
ومكرونه والالي يعني برجر وهيك
بس انا بدي انواع رز زاكيه مندي ومقلوبه هيك شي سهل
بدي وجبه غدى بس يكون شي سهل ومابدو جلي كتير مع انو مش علي المطبخ بس مابدي ضل ميت ساعه بالمطبخ شي هيك بساعه يخلص

وتسلمي ياعسل ماما هلا بتاخد كيماوي ماتنسوها بدعواتكم

[rawaa]

شو هو الدقوس؟

[PaLeStiNe FlOwEr]

شو هو الدقوس؟

مرقة البندورة الحمرة


اسمعي انا اليوم او بكرا بالكتير رح نزلك اكتر من أكلة هون

باذن الله

والله يشفيها امك

[أم الوليد]

ممممممممممم طيب

شوفي هاي وصفة الكودو تشكن

المقادير:
-صحن صدور دجاج مشفى
-بصل اخضر
-مشروم
-بصل
-ذرة حلوة
-فلفل حلو
-مايونيز
-صويا صوص
-ملح وفلفل اسود

الطريقة

-بعدماتغسلي الدجاج قطعية لمربعات او شرحات صغيرة

-حطي بمقلى مع شوي زيت وملح وفلفل وغطيه

-وبمقلى تاني حطي شرايح الفلفل والبصل والمشروم والذرة طبعا مع شوي زيت وملح وفلفل اسود

-بعد تلت ساعة تقريبا بتنشف مي الدجاج وبتشيليه من النار

والخضرا بتكون استوت بتحطيهم عبعض..

جيبي صحن حطي فيه مايونيز مع صويا صوص واخلطي بعطيكي لون عسلي..

ضيفيهم كلهم فوق الدجاج والخضرة وحركيه كلو

بعدها جيبي بندورة مربعات صغار..وخس ..وخبز عربي..

لفي السندويش حطي مايونيز وشرايح جبنة وفوتيها المايكرويف دقيقتين بعدها حطي الخس والبندورة والخطلة

يمي يمي واي سؤال حااااضرة وصحتين وهنا

[§عاشقة غزة§]

الله يشفي الماما
ويرجعها بالسلامة
عندي اقتراح دام ما بدك طولي بالمطبخ
حاولي تعملي حاجات بالفرن
تتحضر بسرعة
وما راح ضليك تقلبيها وهيك شي
وهاي وصفة مني
http://shabab.ps/vb/showthread.php?t=110486
وممكن تلاقي ع قسم المطبخ وصفات سهلة
hard luck

[rawaa]

يسلمو لكل اللي ردو رح جربهم انشالله كلهم ماما رح بتغيب تلات شهور رح جربهم وكررهم كمان يسلمو صبايا

[Pink Rose]

مممممممم

رح اسألك ماما يا قمر ولا يهمك ^^

وان شاء الله بترجعلك امك بالسلامة :)

[rawaa]

تسلمي ياعسل انا لهلا مالئيت شو اطبخ بكره الطلبات اللي بهالوصفتين ماعندي يعني كل وحده فيها شي ناقص مش عندي بس لاخر الاسبوع مشان روح السوبرماركت
بانتظارك ياعسل وتسلمي ماتشوفي شر انتي واللي بتعزيهم يارب

[rawaa]

ماازنخكم يابنات هيك طنشتوني
وانا بحكي رح بتساعدوني :(

[امتزاج ..!]

السلام عليكم ~

كيفكـ روآء .. الله يرجع لكـ الوالدة بالسلامة يااارب ..
ولا يحرمك من حنانها ووجودها ان شاء الله ..
ولو ولا يهمكـ رح آعطيكِ كذا وصفه ع السريع و بنفس الوقت لذيذة وسهلة ^^
لاحظي آنو آنا صايمه يعني الوصفات رح تطلع من عيني :p


عندكـ آكيد رز !!
وأكيد أكيد عندك قشطة !!
وأكيد كمان عندك بصل وثوم وفلفل آخضر وجزر مبشور !!
طيب المطلوب شو ..
اسلقي الرز سلق عادي ..
بعدين حطي ع القلاية شوي زيت عشان تحمري فيهم البصل والثوم ..
بعد مايصير لونهم ذهبي فاااتح حطي عليهم الفلفل الآخضر والجزر وقلبيهم مع البهارات والملح ..
الآن حطي الرز المسلوق ع الخلطة هاي ..
وقلبيهم لحد ما يختلطوا تماماً ..
هاتي صينيه وحطي الرز بالخلطة وافتحي علبة القشطة فوقهم وع طوووووووول حطيه بالفرن
عشان يآخد لون ..
هيكـ رح يكون عندكـ صينية رز طعمــــــه كثير ^^

//

الوصفة الثانية ..

آممممممم

المعكرونة .. الأكلة هاي ممكن تتفني فيها
وبأي شكل رح تطلع زاكيه ..
مثلاً ..
معكرونة آسلقيها عادي ..
وعلى جنب هيك تكوني محضرة تونة وبصل وفلفل آخضر وعليهم الملح والبهارات ..
اخلطي كلووو على كلووو
وحطي فوقهم ملعقتين كبيره جبنة سايلة آو علبة زبادي آو مايونيز ..
واذا بدك حطي ملعقة من هون وملعقة من هون وملعقة من هون ^^
خبيصه مو ههههههه بس والله طعمها زااااااكي


//


شو كمان اممممم

طيب ..
اذا عندك خضآر ممكن تعملي آيدام طعمو روعه وبنفس الوقت محتفظ بقيمة الخضار الغذائية ..
جيبي الملفوف الابيض وقطعيه ..
الكوسا كمان ..
الجزر .. كزبرة خضرا
الفلفل الآخضر واهم شي الثووووم ..
حاولي تكثري ثوم ودقيه لحد ماينعم ..
طيب الحين حطي شوي زيت في طنجرة وحطي الثوم والكزبرا الخضرا ..
بعدين اكبسي عليهم باقي الخضرة وحطي ملح ع اساس يطلع ماء الخضار ويتسبكـ
انتِ بعدين صبي شووووي مي يعني تقريباً نص كاسه او كاسة الا ربع ..
وغطي الطنجرة منيح وخليه يطبخ ع نار هاديه ولا تكشفي الغطا كثير حتى ماتطير الفايتمينات
يعني حاولي انو النار تكون هاديه عشان ماتحترق الخضرة وهي ان شاء الله ماراح تحترق
شغلة ربع ساعة هيكـ والخضار مستوي وطعمو يمي ^^
آه صح حطي عليهم بعدين ليموون آو اذا بتحبي تحطي ملعقتين خل طبيعي ..


//

آمممممم

اذا عندك جبنة سايلة وملفوف وبصل ممكن تعملي صحن مقبلات انما إيه ^^
حطي شوي زيت ع القلايه واضيفي الملفوف المقطع والبصل [ جوانح ]
وقلبيهم لحد ماتحسي آن الملفوف والبصل بلشوا يذبلوا وبعض الملفوفات اتحمرن شوي :p
الحين حطي ملعقة كبيره جبنة سايله وحركي الخليط
طفي النار وحطي شوي ملح - اذا بتحبي -
زيني الصحن بنعناع نآشف آو طازج
ولاتنسي عصرة ليمونة ^^

والله الوصفات كثيرة ان شاء الله رح آرجع لكـ كل فترة وآكتب لكـ شوي ..
ان شاء الله يارب بكون سآعدتكـ وآعطيتكـ آفكار سهلة وطعمها حلو ..



موفقة حبيبتي ^^

[rawaa]

تسلمي حبيبتي مابتعرفي اديش حايسه بهالطبخ انشالله بجربهم كلهم يعطيكي العافيه :)

[لالا-فلسطين 48]

شوفي روااااااء،


انا عالاكيييييد الاكيييييييييد ما بغدر اساعدك...

لاني خلقة الله بفهمش بالمطبخ اشي، وبعرفش غير افرم سلطة واقلي بطاطا.....

غير هيك ما بعرف، وانا لو محلك كنت ظليتني أكلهم بطاطا وسلطة (اللي بسمعني بحكيانها طبخة، بس بالنسبة لالي ازكى طبخة)....


بس والله وضعك منيح يا بنت بتعرفي تعمليلك اكمن شغلة، والمجدرة شو مالها فش ازكى منها!

ضلي اعمليلهم مجدرة، اصلا هي طبخة نباتية وصحية وغير انها زاكية، وانا الطبخة الوحيدة اللي بحبها وباكلها بشهية!

(كل ما تتحير امي بالطبخة بحكيلها اطبخي مجدرة، طلعت من عينها!!!!)




بس انا كل تواجدي هون منشان شغلة وحدة...

منشان احكيلك الله يشفيلك امك ويقومها بالسلامة!!!!!!


اهم اشي تضلي قوية وتحسيسها انو كل اشي تمام وغادرة انك تتأقلمي مع الوضع وتدبري حالك، هي اكيد رح تنبسط!!


بالشفا العاجل من الله...


تحياتي..
لالا-فلسطين 48.

[rawaa]

تسلمي لالا

وانا كتير بحب المجدره وبرضو متلك ماما بس تحكي شو اطبخ بحكيلها مجدره حتى لو مكلاها ابل بيوم :)

المشكله اللي بالبيت مابحبوها كتير مشان هيك

وهلا عملتلهم ملوخيه :)
شتوره سايره عم بتعلم

تسلمي حبيبتي على المرور نورتي صفحتي والله

[rawaa]

تسلمي لالا

وانا كتير بحب المجدره وبرضو متلك ماما بس تحكي شو اطبخ بحكيلها مجدره حتى لو مكلاها ابل بيوم :)

المشكله اللي بالبيت مابحبوها كتير مشان هيك

وهلا عملتلهم ملوخيه :)
شتوره سايره عم بتعلم

تسلمي حبيبتي على المرور نورتي صفحتي والله

[&نسيم الروح&]

هلا ازا لهلا بدك مساعده بعرف انه انا كالعاده اخر من يعلم واخر من يأتي عشان هيك رح اعطيكي وصفه من مطبخي انا هههههههههههههههه

جيبي جاج مئطع ونضفي منيح "ازا ما كان منضف"

بدك فلفل اسود وملح وبهار حار "بكون فلفل احمر ناشف ومطحون"

جيبي زيت زيتون وحطي في كل البهارات الي فوء البهار حسب الرغبه

جيبي بطاطا وبصل وجزر وئطعيهم قطع كبيره

بعدين حطي الزيت المبهر على الجاج وتبلي بايديكي وحطي عليه الخضره وكمان خلطيها معاهم لحتى تاخد البهار

وحطي كل اشي بصينيه البايركس او اي صينيه عاديه وغطيها بالقصدير بدها شي ساعه ونص لحتى ما تستوي لازم تتاكدي من انه الجاج استوى بانك تشكي بالشوكه وتشوفي والمي تاعته لازم تخف ويضل شويه بس هي صوص بنحط على الرز

اما لما يستوي الجاج شيلي القصدير عنه وخلي يتحمر شوي مو ينحرء

هلا نيجي للزر

جيبي رز بسمتي حطي بمي انئعي يعني وئد ما فيكي خلي يطول بالنئع بطلع زابط اكتر

هلا الرز البسمتي كل كاسه رز بدها كاسه ونص مي سخنه يفضل تكون مغليه

اما الشي المهم والرز منئوع حطي زيت ئلي بالطنجره الي بدك تتطبخي فيها لحتى ما تعملي عجئه جلي وافرمي بصله ناعمه وحطيها بالزيت لما يحمى شوي بس لحتى تدبل ما تحرئيها خليكي حركي فيها لحد ما تدبل

وبعدين سئطي الرز على الزيت بعد ما تزيحي الطنجره عن الغاز المولع وحطي بس ملح ما تحطي اي نوع بهار خلي ابيض

وئلبيهم مع البصله وبعدين حطي المي السخنه عليهم وزي ما حكيت كل كاسه رز بدها كاسه ونص مي بس وخلي الغاز على العالي لحد ما تروح المي بعدين وطي على الاخر وخلي على نار هاااااااااااااااااااااااديه لحد ما يستوي بالمره بهي الفتره دوئي الرز ازا بده كمان مي هو بالعاده ما بكون بده بس تاكدي ما فيها شي وطول ما الرز عليه مي حركي اما بس تنشف ما تحطي المغرفه في بخبص

على فكره الرز البسمتي شو ما عملتي في بزبط ما بده شي بجد وعلى العموم هاد من مطبخي لما ما اعرف شو بدي اعمل بعمل هي الطبخه

وصحه وعافيه واي سؤال عن الاكله احكي وازا بدك كمان اكلات بجيبلك انشالله

[rawaa]

يسلموو ياعسل عنجد طبخه طيبه بس انا بحط لكل كاسه رز كاستين مي وبتركو الين مايغلي وبوطي النار ومابحركو بحط المعلئة بوسط الرز ازا حسيت في مي بتركو وازا لا بافل النار
انا بدي اكلات لشهرين كمان:)
يعطيكي العافيه..........

[&نسيم الروح&]

طريقه جديده واسهل من الي انا بعملها بس انتي مو عارفه هي طريقه بابا وهو شيف لهيك بحكيلك ياها

على العموم زي ما انتي بتعرفي تعملي اعملي وصحه وعافيه

[rawaa]

تسلمي
انا بحس بالنسبه اللي طريئتي اسهل بس بيجي يوم وبستفيد من طريئتك

يعطيكي العافيه ياعسل